Display Style:
Column Style
क्यानडाय् संसदीय निर्वाचन क्वचाल
ञलाथ्व प्रतिपदा ११४१, असोज ५ मंगलबाः
क्यानाडायय् संसदीय निर्वाचन क्वचाःगु दु । प्रधानमन्त्री जस्टिन ट्रूडों नियमित ई स्वयां निदँ न्ह्यः हे याकादीगु आकस्मिक चुनावय् वय्कःया हे लिबरल पार्टीं धाःसा विपक्षी कञ्जरभेटिभ पार्टीं कडा चुनौती फयेमालीगु खनेदु ।
२ क्वःति ७० लख मतदातां ब्वति काःगु चुनावय् लखौं भोट हुलाक व इमेलपाखें नं याःगु दु । स्थानीय ई कथं मंगलबाः चान्हय्तक्कय् चुनावी लिच्वः वइगु अपेक्षा याःगु दु ।
कोरोना भाइरस नियन्त्रण अले ब्यवस्थापनय् बांलाक ज्या ज्याःगु विश्वासलिसें तँसा बहुमतया लागिं आह्वान याःगु चुनावया झ्वलय् प्यंगूगु चरणया महामारी न्ह्यानाच्वंगु इलय् चुनाव याकूगु धकाः प्रधानमन्त्री ट्रूडोयात तसकं कुंखिंगु खः ।
चुनावय् विपक्षीपाखें कडा टक्कर फयेमाःसां बयस्क मतदातात राजनीतिक स्थिरताया पक्षय् खनेदुगुलिं ४० दँया ट्रूडो हाकनं शक्तिइ लिहांवइगु संभावना दुगु धाःगु दु ।
चुनाव प्रचारया झ्वलय् अनिवार्य खोपया विषय तसकं हे चर्चाय् दुगु खःसा स्वास्थ्य क्षेत्रय् लगानी, मस्तय्त सुसाःकुसाः, आवासया विषय चर्चाय् दुगु खः ।
फ्रान्सं बेलायतलिसेया रक्षा वार्ता रद्द यात
ञंलाथ्व चतुर्दशी ११४१, असोज ४ सोमबाः
अमेरिका, अष्ट्रेलिया व बेलायतदथुइ एशिया प्रशान्त सुरक्षा सहमतिलिपा तं चाःगु फ्रान्सं बेलायतलिसेया वार्ता मयायेगु धागु दु ।
बेलायत व फ्रान्सया रक्षामन्त्रीदथुइ च्वनी धयातःगु वार्ता आवलिं मजुइगु फ्रान्सं धागु दु । बेलायती रक्षामन्त्री बेन वालेन्स व फ्रेञ्च रक्षामन्त्री फ्लोरेन्स पार्लेदथुइ थ्वहे वालय् लण्डनय् वार्ता जुइ धयातःगु खः ।
तर आःवयाः फ्रान्सं वार्ता मयायेगु घोषणा याःगु दु । त्रिदेशीय सम्झौतालिपा अष्ट्रेलियां फ्रान्सलिसे सन् २०१६ लय् ३७गू अर्ब डलरय् १२गः पनडुब्बी न्यायेगु सहमति हाचाँ गायेवं फ्रान्स तं चाःगु खः ।
सुरक्षा सहमति कथं आः अष्ट्रेलियां अमेरिकी पनडुब्बी न्याइ । उगु सम्झौतायात फ्रेञ्च विदेशमन्त्री जाँयब्स ल दरियनं ल्यूनं चुपिं त्यूगु थें जूगु धयादीगु दु ।
लिच्वः कथं फ्रान्सं अमेरिका व अष्ट्रेलियां थः राजदूततय्त तकं लितसःतूगु दु । उखय्, अष्ट्रेलियाया प्रधानमन्त्री स्कट मोरिसनं धाःसा फ्रान्सया थासय् अमेरिकालिसे पनडुब्बी न्यायेत याःगु निर्णयया बचाऊ यानादीगु दु ।
बोको हरामं अपहरण यानायंकूपिं १०म्ह मिसा मस्तय्त त्वःतल
ञंलाथ्व चतुर्दशी ११४१, असोज ४ सोमबाः
अफ्रिकी देय् नाइजेरियाया विद्रोही पुचः बोको हरामं अपहरण यानायंकूपिं १०म्ह मिसा मस्तय्त त्वःतूगु दु ।
अझं २१म्हेसित नियन्त्रणय् कयाःतःगु नाइजेरियाली सरकारं धागु दु । वंगु जुलाईलय् हरामया पुचलं स्थानीय बेथेल ब्यापटिष्ट ब्वनेकूथी दुहाँवयाः सछि व २०म्ह मिसा मस्तय्त अपहरण यानाःयंकूगु खः ।
उकि मध्ये छुंया ल्याखय् मस्तय्त थ्वसिवे न्ह्यः हे त्वःतूगु दु । लिपांगु ईलय् १०म्हेसित त्वःतूसां अझं २१म्ह इमिगु हे नियन्त्रणय् दनि । नाइजेरियास्थित युनिसेफ प्रतिनिधि पीटर हाकिन्सं बोको हरामं दछिदुने द्वछि व ४सःम्ह ब्वनामिपिन्त अपहरण याःगु दाबी यानादिल ।
इमित त्वःतकेत पहल न्ह्यानाच्वंगु हाकिन्सं धयादीगु दु । बोको हरामया पुचलं आःतक १६म्ह मस्तय्त स्याःगु धागु दु ।
हुथी पुचःल ९म्हसित मृत्युदण्ड बिल
ञंलाथ्व चतुर्दशी ११४१, असोज ३ आंईतवाः
यमनया हुथी पुचःलं थःपिनि सर्वोच्च नेतायात स्यागुलिइ दुथ्यापिं ९म्हसित मृत्युदण्ड बिउगु दु ।
३दँ न्ह्यः हुथी पुचःया सर्वोच्च राजनीतिक परिषदया प्रमुख सालेह अल–सामदया हत्या प्रकरणय् दुथ्यापिं ९ म्हसित मृत्यु दण्ड बिउगु खः । राजधानी सानाया छगू चुकय् गोलीं कयेका उमित मृत्युदण्ड बिउगु खः ।
हुथी पुचःया छगू अदालतं दोषी क्वजिउपिं १६म्ह मध्ये ९ म्हसित मृत्युदण्ड बिउगु खः । हुथी अदालतं साउदी अरबया राजकुमार मोहम्मद बिन सलमान व अमेरिकी पूर्व राष्ट्रपति डोनल्ड ट्रम्पलिसें मेपिं ७म्हसित नं मुद्दा न्ह्याकुगु खःसा उमित नं हुथी अदालतं मृत्युदण्डया सजाय न्यंकुगु दु ।
सन् २०१८ या अप्रिलय् यमनया पश्चिमी प्रान्त होडैडाय् जूगु हवाई हतःलय् समाद लिसें मेपिं ६म्ह सीगु खः । साउदी अरबं उगु हवाई हताः थःपिन्सं यानागु पुष्टि याःगु खः ।
चीनया ख्याच्वः
ञंलाथ्व एकादशी ११४१, असोज १ शुक्रवाः
अमेरिका, अष्ट्रेलिया व बेलातय दथुइ एशिया प्रशान्त क्षेत्रय् न्हूगु सुरक्षा रणनीति लागू यायेगु सहमतिया चीनं भत्र्सना याःगु दु ।
त्रिदेशीय सम्झौतायात चीनं तसकं हे गैरजिम्मेवार व चिबालाःगु मानसिकताया उपज धका धाःगु दु । ३गू देय् दथुइ वंगु बुधबाः एशिया प्रशान्त क्षेत्रय् आणविक शक्तियुक्त पनडुब्बी सञ्चालन यायेगु व सुरक्षा प्रविधि व खुफिया सूचं कालबिल यायेगु सम्झौता जूगु खः ।
उगु सम्झौतायात एशिया प्रशान्त क्षेत्रय् चीनया लिच्वः पनेगु पलाःया रुपय् व्याख्या जुयाच्वंगु इलय् चीनं नं सम्झौताया तच्वकं कुँख्यंगु खः । चिनियाँ विदेश मन्त्रालयया प्रवक्ता चाओ लिचियानं त्रिदेशी सम्झौतां उगु क्षेत्रया शान्ति सुरक्षायात क्षति याइगु व ल्वाभः धेंधेंबल्लायात अप्वयेकिगु धाःगु खः ।
सम्झौतायात शीतयुद्दया धङ्धङ्गी धका वयेकलं थुकिं उमिगु हे हितयात हानी याइगु तर्क नं याःगु दु । चिनियाँ सत्ताया मुखपत्रया रुपय् म्हस्युगु ग्लोबल टाइम्सं नं उगु हे आशयया सम्पादकीय च्वया अष्ट्रेलिया नं चीन विरोधी मोर्चाय् थ्यंगु टिप्पणी याःगु दु ।
ओकस नाँया उगु सम्झौता कथं अमेरिकां वंगु ५० दँया ई दुने बेलायतयात जक चूलाकुगु थःगु हे पनडुब्बी प्रविधि अष्ट्रेलियायात नं चूलाकिगु जूगु दु । उखे, अमेरिकां ओकस सम्झौताय् फ्रान्सया नं ब्वति दुथ्याये फइगु छुमां बिउगु दु ।
सम्झौताय् मुक्कं युरोपिय युनियनयात वास्ता मयाःगु धका फ्रान्सं असन्तुष्टि न्ह्यथनेधुंका अमेरिकी विदेशमन्त्री एन्टोनी ब्लिंकनं थःपिं इण्डो प्यासिफिक सुरक्षा रणनीतिइ युरोपया सक्रिय ब्वतिया पक्षय् दूगु धाःगु खः ।
