Display Style:
Column Style
थम्हं हाइपरसोनिक मिसाइल परीक्षण यानागु उत्तर कोरियाया दाबी
ञंलागा नवमी ११४१, असोज १३ बुधवाः
उत्तर कोरियां म्हिगः याःगु मिसाइल हाइपरसोनिक मिसाइलया परीक्षण यानागु धाःगु दु ।
उत्तर कोरियाया सरकारी मिडियां ह्वासङ–८ नांया हाइपरसोनिक मिसाइलया परीक्षण सुथां लाःगु दाबी याःगु खः । वंगु न्यादँय् याःगु ल्वाभः परीक्षणय् थ्व तसकं महत्वपूर्ण जूगु दाबी नं उत्तर कोरियां याःगु दु ।
वंगु जनवरीइ हे उत्तर कोरियाली नेता किम ऊन सुङं हाइपरसोनिक मिसाइलया लागिं वैज्ञानिकतय्सं ज्या यानाच्वनागु छुमा ब्यूगु खः । सुरक्षा इष्टकोस्टस्थित समुद्रय् सतीगु दुरीया मिसाइल प्रक्षेपण यानागु दाबी दक्षिण कोरियां याःगु दु ।
उत्तर कोरियां म्हिगः सुथय् जापानी समुद्रय् मिसाइल प्रक्षेपण याःगु खः । दक्षिण कोरियां न्हूगु पनडुब्बीया उद्घाट्न याःगु छुं घौ न्ह्यः उगु प्रक्षेपण जूगु खः ।
उखे अमेरिकी सेनाया इण्डो प्यासिफिक कमाण्डं उत्तर कोरियां प्रतिबन्धित मिसाइल प्रक्षेपण याःगु विषययात सतिकं स्वयागु धासें तत्काल अमेरिका व वया ग्वाहालिमियात छुं हे खतरा महसुश मजूगु धाःगु दु ।
उत्तरी नाइजेरियाय् विद्रोहीया आक्रमणय् २२ सुरक्षाकःमिलिसें ५६ सित
ञलागा सप्तमी ११४१, असोज १२ मंगलबाः
उत्तरी नाइजेरियाया थीथी राज्यय् जूगु श्रृंखलावद्ध आक्रमणय् दर्जनौ सर्वसाधारण सीगु दु ।
उत्तरपश्चिम राज्य कड्डुना राज्यया छगू गामय् बन्दुकधारीं आक्रमण याःबलय् म्ह्वतिं ३४ सीगु खः । आक्रमणय् लानाः न्हय्म्ह घाःपाः जूगु बीबीसीं न्ह्यथंगु दु । बन्दुकधारीया अज्ञात पुचःया आक्रमणय् कौराया मदमाई गामय् आक्रमण याःबलय् ३४ सीगु अनया राज्य सुरक्षा आयूक्त शमूएल अरुवानं धाःगु दु ।
आक्रमण धुनाकथं सुरक्षाकःमिं छुं संधिग्दतय्त नियन्त्रणय् कयाः अनुसन्धान न्ह्याकूगु अनया अधिकारीतय्सं धाःगु दु । आक्रमणकारीतय्सं चर्चय् मुनाच्वंपिं सर्वसाधारणायत आज्जु दयेकूगु बुखँय् न्ह्यथनातःगु दु ।
अथे हे, उत्तरपश्चिमी सोकोटा राज्यय् २२ नाइजेरियाली सुरक्षाकःमि सीगु दु । राज्य विधानसभाया दुजः अमीनु गोबीरं आइतबाः १७ व सोमबाः तँसा न्याम्हेसिया सीम्ह लूगु पुष्टि याःगु दु । सीपिंलय् १४ सैनिक, न्याम्ह प्रहरी व मेपिं स्वम्ह नागरिक सुरक्षा बलया अधिकारी लाःगु धाःगु दु ।
सरकारी अधिकारीतय्सं थ्व आक्रमणय् इस्लामिक स्टेट समर्थित लडाकूतय् ल्हाः दुगु जुइफुगु आशंका याःगु दु । इस्लामिक स्टेट सन् २०१६ निसें अफ्रिकाया थीथी क्षेत्रय् सक्रिय रुपं सशस्त्र संघर्ष यानाच्वंगु दु ।
भारतय् गुलाब नाँया धाकु फय्या लिच्वः
ञलागा षष्ठी ११४१, असोज ११ सोमबाः
भारतय् गुलाब नाँया धाकु फय्या हुनिं पूर्वी राज्यपाखें १०द्वःम्ह मनूयात सुरक्षित थासय् चिइकुगु दु ।
आइतबाः सनिलय्निसें तच्वकं वःगु व वाफय्या वयेकगु झ्व न्ह्यानाच्वंगु दुसा धाकुफय्या लिच्वः बंगालया खाडीतक्क वयेधुंकुगु दु । धाकुफसं खुसिबाः व चलःया जोखिम नं अप्वयेकुगु दु ।
प्रति घौ ९५गू किलोमिटरया गतिं वयाच्वंगु धाकु फय् बाचां उडिसा व आन्द्रप्रदेशय् नं दुहाँवंगु दु । धाकु फसं लिच्वः लाःगु राज्यपाखें द्वलंद्वःम्ह मनूयात सुरक्षित थासय् चिइकुगु दुसा खुसिा सिथय्, नहर व समुद्रि सिथय् मवनेत ख्याच्वः बिउगु दु ।
आन्द्र प्रदेशय ्जक ८५ द्वः छेँजःया दुजःपिन्ँत सुरक्षित थासय् चिइकुगु दुसा धाकु फसं लिच्वः लाःगु लागाय् उद्धार टोलीत खटे याःगु दु ।
वंगु मे महिनाय् वःगु यास नाँया धाकु फसं नं भारतय् द्वलंद्वःम्ह मनूयात विस्थापित याःगु खः ।
जर्मनीइ क्वचागु निर्वाचनय् सत्तारुढ पार्टी बुत
ञलागा षष्ठी ११४१, असोज ११ सोमबाः
जर्मनीइ म्हिगः क्वचागु निर्वाचनय् सत्तारुढ क्रिश्चिय डेमोत्र्mयाटिक युनियन बूगु दु ।
मत गणना लिपांगु चरणय् थ्यंबलय् मध्यमार्गी सोसल डेमोक्र्याटिक पार्टी (एपीडी) दक्वःलय् तःधंगु दलया रुपय् खनेदूगु दु । एसपिडीं मेगु पार्टीतयेत चिधंगु अग्रता कायम याःगु दु ।
चान्सलर एङ्गेला मर्केलया पार्टी धाःसा निगूगु थासय् थ्यंगु दु । मत गणना लिपांगु चरणय् थ्यंबलय् एसपिडीं २५गू फुति ८गू, सिडियूं २४गू फुति ३गू, ग्रिन पार्टीं १४गू फुति ६गू, एफडिपीं ११गू फुति ५गू, एएफडीं १०गू फुति ४गू, लिंकं ४गू फुति ८गू व मेगु पुचःलं ८ गू फुति ७ गू प्रतिशत सिटय् जित चूलाकुगु दु ।
एसपिडीया नेता स्कोल्जं आः सरकारया नेतृत्व थःपिन्सं हे यायेगु धाःगु दु । तर एसपीडीं संसदय् बहुमत मुनेत धाःसा मेगु दलतयेलिसे गठबन्धन यायेमालिगु अवस्था दु ।
बहुमत तंसा निगूगु नम्बरय् थ्यंगु सत्तारुढ सीडीयुया नेतृ आर्मिन लान्सेटं नं सरकार गठनया दाबी धाःसा त्वःतुगु मदुनि । सन् २००५ निसें मदिक्क जर्मनीया चान्सलर जुयावम्ह मर्केलया बहिर्गमनलिसें वयेकया पार्टी नं सत्तां पिहाँवनिगु जूगु दु ।
हुवावेया अधिकारी वानजाउया मुद्दा लित कायेत अमेरिका तयार
ञलागा चर्तुर्थी ११४१, असोज ९ शनिबाः
अमेरिकां चिनियाँ कम्पनी हुवावेया मुख्य वित्तीय अधिकारी मेन वानजाउया मुद्दा लित कायेत तयार जूगु दु ।
अमेरिकी अभियोजनकर्तातय्सं वय्कःविरुद्धया मुद्दा लित कायेत सहमति क्यंगुलिसें मेन क्यानडा त्वःतेत तयार जूगु धाःगु दु । चीन व अमेरिका दथुइ न्ह्यानाच्वंगु द्वन्द्व क्वचायेकेत थ्व पलाः प्रभावकारी जुइगु अधिकारीतय्सं अनुमान याःगु दु ।
वासिङ्टन व वेइजिङ दथुइया दंदँ न्ह्यःनिसेंया कुटनीतिक टकराव क्वचायेकेत मेनया मुद्दा लित कायेगु पलाः प्रभावकारी जुइगु धाःगु दु । अमेरिकाया वारेन्टय् सन् २०१८ य् मेनयात भ्याकुभर अन्तर्राष्ट्रिय विमानस्थलं गिरफ्तार याःगु खः ।
सन् २०१३य् वय्कःयात इरानय् दूरसञ्चार उपकरणया व्यापारिक कारोबारया झ्वलय् बैंक व तार ठगिया द्वपनय् दोषी क्वःज्यूगु खः । मेनया गिरफतारीलिसें क्यानडा नं प्रकरणय् विवादय् लाःगु खः ।
अमेरिकी अधिकारीतय्सं मेनं थःत लाःगु द्वपं स्वीकार याःगुलिसें मुद्दा लित कयागु धाःगु दु । तर हुवावेया प्रवक्तां धाःसा अमेरिकी अधिकारीतय् दावीया खण्डन याःगु दु ।
