Display Style:
Column Style
चुनाव त्याकेत अप्वः खर्च याःगु मुद्दाय् फ्रान्सया पूर्व राष्ट्रपति निकोलस सार्कोजी दोषी ठहर
ञंलागा दशमी ११४१, असोज १५ शुक्रवाः
चुनाव त्याकेत कानुनं क्वजिउगु सिवें अप्वः खर्च याःगु मुद्दाय् फ्रान्सया पूर्व राष्ट्रपति निकोलस सार्कोजी दोषी ठहर जूगु दु ।
सन् २०१२ य् जूगु राष्ट्रपतीय निर्वाचनय् सार्कोजीं चुनाव त्याकेत कानुनं क्वजिउगु सिवें अप्वः ध्यबा खर्च याःगु धका पेरिसया छगू अदालतं वयेकयात दोषी क्वजिउगु खः । सार्कोजीं सन् २०१२य् जूगु चुनाव त्याके धाःसा मफूगु खः ।
सार्कोजी थ्वलिसें निगू मुद्दामा दोषी ठहर जूगु दु । वयेक सन् २००७ निसें २०१२ तक्क फ्रान्सया राष्ट्रपति जुयादीगु खः । अदालतं वयेकयात ई सजाय धाःसा क्वजिउगु मदुनि । वयेकयात दच्छिया केद सजाय क्वजिइ फइगु अनुमान याःगु दु ।
थुगु मुद्दाय् अदालतं दोषी क्वजिउसा नं सार्कोजीं आःतक्क कानुन सिवें अप्वः खर्च यानागु स्वीकार याःगु मदुनि । वंगु जुनय् वयेकलं अदालतय् थुगु खँय् थःगु संलग्नता मदूगु बयान बिउगु खः ।
सार्कोजीं थःगु चुनावी अभियानय ्खर्च याये दइगु सिवें निदुगः खर्च याःगु आशंका याःगु खः । वयांलिपा सन् २०१४ य् अभियोजनकर्तां अनुसन्धान न्ह्याकुगु खः । अभियोजनकर्तातयेसं याःगु अनुसन्धानं पूर्व राष्ट्रपति सार्कोजीं म्होतिइ ४ गू क्वःति २०गू लख युरो खर्च याःगु सीदूगु खः ।
वंगु मार्चय् सार्कोजी मेगु मुद्दाय् नं दोषी क्वजिउगु खः । न्यायीक छानविनया गोप्य सूचं चूलाकेत न्यायाधीशयात घुस बिइत स्वःगु घटनाय् वयेक दोषी ठहर जूगु खः । उकिइ नं वयेकलं थःगु गल्ती नालामकाःगु खः । वयेकयात अदालतं ३दँ जेल सजाय तकं न्यंकुगु खः । गुकिइ निदँ कैद मिनाहा तकं याःगु खः । तर वयेक आःतक्क जेलय् च्वंगु मदुनि ।
इथियोपियां राष्ट्रसंघया ७म्ह उच्च अधिकारीयात देश निकाला यात
ञंलागा दशमी ११४१, असोज १५ शुक्रवाः
अफ्रिकी देय् ईथियोपियां थःगु देशय् ज्या यानाच्वंपिं संयुक्त राष्ट्रसंघया ७ म्ह उच्च अधिकारीयात देशं निकाला याःगु दु ।
इथियोपियाया आन्तरिक मामिलाय् हस्तक्षेप याःगु व विचौलिया जुइत स्वःगु द्वपं लिसें उमित देय् निकाला याःगु खः । इथियोपिया सरकारं ७२घौ दुने थःगु देय् त्वःतेत उमित आदेश बिउगु दु ।
इथियोपियाया द्धन्द्धग्रस्त टिग्रे क्षेत्रय् मानविय संकट जूगु विषयलय् राष्ट्रसंघया अधिकारीतयेसं तक्वःमछि सः थ्वयाच्वंगु खः । राष्ट्रसंघया अधिकारीतयेसं थःगु देय्या आन्तरिक मालिमाय् मालिगु सिवें अप्वः प्रचारवाजी याःगु लिसें छुं गम्भिर विषयलय् तकं हस्तक्षेप यायेत स्वःगु इथियोपियाया विदेश मन्त्रालयं जारी विज्ञप्तीइ धयातःगु दु ।
थःपिनि उच्च अधिकारीत इथियोपियां निष्काशनय् लायेधुंका राष्ट्रसंघया महासचिव एन्टोनियो गुटेरेसं धाःसा थः अजूताःगु प्रतिक्रिया बियादीगु दु ।
इक्वेडरया छगू जेलमा कैदीपिं दथुई ल्वापु जुबलय् सच्छिं मल्याक सीत
ञलागा नवमी ११४१, असोज १४ विहीबाः
इक्वेडरया छगू जेलय् जूगु ल्वापुइ सच्छि सिवें अप्वः सीगु दु ।
गुवायान्छिल जेलय् परस्पर विरोधी प्ुचः दथुइ जूगु ल्वापुइ उगु घटना जूगु खः । कैदीतये दथुइ जेल दुने हे ल्वापु जूगु अनया अधिकारीतयेसं न्ह्यथंगु दु । लागू वासः तस्करतयेत तयातःगु उगु जेलयात नियन्त्रणय् कायेत ४सः सिवें आपा सुरक्षाकर्मी खटे यायेमाःगु खः ।
इक्वेडरय् लागु वासःया नेटवर्क न्ह्याकिपिं मेक्सिकन पु्चःया आदेशय् उगु ल्वापु जूगु धाःगु दु । घटनास्थल नियन्त्रणय् कायेत वंपिंं सुरक्षाकर्मीतयेसं घटनायात तच्वकं त्रासदीपूर्ण धाःगु दु ।
जेलय् दूगु थी थी पुचःतये दथुइ गोली व बम हानाहान जूगु अधिकारीतयेसं धाःगु दु । जेल दृुने सुयागु हैकम न्ह्याकेगु धइगु कचवंया हुनिं ल्वापु जूगु खः । घटनाय् ५० सिवें अप्वः कैदीत घाःपाः जूगु न्ह्यथंगुृ दु ।
दक्षिण कोरियालिसे हटलाईन स्वापू यायेगु उत्तर नेता किमया मनंतुृना
ञलागा नवमी ११४१, असोज १४ विहीबाः
उत्तर कोरियाली नेता किम जोङ ऊनं जःलाखला दक्षिण कोरियालिसे हटलाइन संचार स्वापू पुनस्थापना यायेत मनंतुनागु धाःगु दु ।
निन्हू न्ह्यः सुपरसोनिक मिसाइल प्रक्षेपण यागु उत्तरया नेता किमं संसदया वार्षिक सदनयात सम्बोधन यासें थुकथं धाःगु खः । अमेरिकां धोकापूर्ण नीति कायम याना कूटनीतिक स्वापूया नितिं प्रस्ताव याःगु धासें उनं अन्तर्राष्ट्रिय जगतयात झंगः लायेगु नितिं जक अमेरिकांं अथे याःगु द्वपं नं बिउगु दु ।
तर दक्षिणलिसे विच्छेद जूगु हटलाईन स्वापू धाःसा अक्टोबरया शुरुवातनिसें हे पुनस्थापना यायेत मनंतुनागु धाःगु अनया सरकारी समाचार एजेन्सी केसीएनएं न्ह्यथंगु दु ।
नेता किमया केहँे वंगु वालय् दक्षिणलिसें हाकनं वार्ता यायेत मनंतुना धाःगु शिलशिलाया हे निरन्तरताय् रुपय् थुगु खँयात स्वःगु दु ।
थगुने निगू देय् दथुया शिखर वार्ता सुथांमलया्धुंका थुपिं निगू दथुइ निखेरया स्वापू तकं विच्छेदया अवस्थाय् दु ।
फ्रान्स व ग्रिस दथुइ रणनीतिक सुरक्षा सम्झौता
ञंलागा नवमी ११४१, असोज १३ बुधवाः
युरोपेली देय्त फ्रान्स व ग्रिस रणनीतिक सुरक्षा साझेदारी यायेत तयार जूगु दु ।
फ्रान्सया राजधानी पेरिसस्थीत राष्ट्रपति भवनय् याःगु मंकाः पत्रकार सम्लेलनमार्फत निगू देय्या शिर्ष नेतातय्सं थ्वबारे जानकारी ब्यूगु खः । न्हूगु सुरक्षा सम्झौता कथं ग्रिसं फ्रान्सलिसें ६ निसें ८ आधुनिक युद्धपोत न्यानाकाइ ।
थ्वलिसें फ्रान्सं ग्रिसयात प्रतिरक्षा प्रणालीइ नं ग्वाहालि याइ । निगू देय् दथुइया सम्झौतायात ग्रिसया प्रधानमन्त्री क्रियाकोस मित्सोताकिसं युरापेली रक्षा स्वाधिनताया लँय् न्हापांगु पलाःया नां बियादीगु दु ।
फ्रान्सं वइगु न्यादँ दुने थ्व युद्धपोत ग्रिसयात उपलब्ध याकी । अमेरिका, अष्टे«लिया व बेलायत दथुइया त्रिपक्षीय अकस सुरक्षा सम्झौतां तंम्वःगु फ्रान्सं ग्रिसलिसे न्हूगु सम्झौता यासें थुकिया लिसः ब्यूगु खः ।
फ्रान्सं थ्वयां न्ह्यः हे हलिमय् सैन्य साझेदारीइ ह्यूपाः वयेफुगु व पुलांगु गठबन्धन दथुइ असन्तुलन ब्वलनेफुगु चेतावनी ब्यूगु खः ।