Display Style:
Column Style
अमेरिकाया संसदय् जूगु दंगाय् ट्रम्पया ग्वहालिमिपिं तक्यन
ञंलागा तृतीया ११४१, असोज ८ शुक्रवाः
अमेरिकाया संसद भवन क्यापिटोल हिल’ य् जूगु दंगाय् पूर्व राष्ट्रपति डोनाल्ड ट्रम्पया लिक्कसंया ग्वहालिमिपिं तक्यंगु दु ।
वंगु जनवरी ६ तारिखय् संसदं राष्ट्रपति चुनावया लिच्वः प्रमाणिकरण याःगु इलय् ब्वज्यामितयेसं क्यापिटल भवनय् हताः याःगु खः । उमिसं संसद भवन छुं ई नियन्त्रणय् काःगु खः ।
थुगु घटनाया छानविन यायेत दयेकुगु समितिं न्हापांखुसिइ ४म्ह आरोपितयात मुद्दा न्ह्याकेत निवेदन बिउगु दु । उपिं ४म्ह हे पूर्व राष्ट्रपति ट्रम्पया ग्वहालिमि लिसे कर्मचारी जूगु दु ।
तत्कालिन राष्ट्रपति ट्रम्पया चिफ अफ स्टाफ मार्क मिडोज, डेपुटी चिफ डान स्काभिनो, पूर्व सल्लाहकारपिं स्टिभ बानन व काश पटेल निशानाय् लाःगु खः ।
उमित चुनावबारे दुष्प्रचार याना चुनावी लिच्वः अःखः यायेत ट्रम्पया समर्थकतयेत ग्वाकुगु द्वपं बिउगु लाःगु दु । ४म्ह लिसें बयान कायेत समितिं थ्वहे अक्टोबर १४ व १५ तारिखय् सःतूगु दु ।
हलिंया चिमि देय्तयेत थप ५०गू क्वःति फाइजर खोप बिइगु अमेरिकाया घोषणा
ञलाथ्व द्धितीया ११४१, असोज ७ विहीबाः
अमेरिकां विकासशील देयेतयेत कोरोना भाइरस विरुद्धया फाइजर खोप थप ५० गू क्वःति डोज बिइगु जूगु दु ।
अमेरिकी राष्ट्रपति जो बाइडेनं वइगु दँ २०२२दुने उगु खोपया मात्रा चूलाकेगु घोषणा यानादीगु खः । संयुक्त राष्ट्रसंघया महासभाया झ्वलय् कोभिड–१९ सम्बन्धि साइडलाइन सम्मेलनयात सम्बोधन यासें वयेकलं खोपया पहुँच विस्तारया नितिं ग्वहालि बिइगु घोषणा यानादीगु खः ।
अमेरिकां थ्वयान्ह्यः चिमि देयेतयेत १६गू क्वःति डोज खोप बिइधुंकुगु दु । विश्व स्वास्थ्य संगठन (डब्लुएचआें) थुगुसिइया अन्त्यतक्क हलिंया फुक्क देशय् म्होतिइ ४०गू प्रतिशत मनूयात खोप बिइगु आज्जु तःगुलिइ उगु आज्जु पूवनिगु संभावना म्हो जुयावंगु दु ।
चिमि देशय् आःतक्क निगू प्रतिशत जनसंख्यायात जक खोपया न्हापांगु डोज बिउगु दु । खोपया पहुँच समतामूलक जुइमा धइगु आज्जु लिसें डब्लुएचओया न्ह्यलुवाय् स्थापना जूगु कोभ्याक्स अभियान अन्तर्गत अनुदान वा ग्वहालिइ वइगु खोप वितरण जुइगु याः ।
राष्ट्रसंघ महासभाय् थःपिनि ब्वति दयेमाःगु तालिवानया माग
ञलाथ्व द्वादशी ११४१, असोज ६ बुधबाः
अफगानिस्तानया तालिवान सरकारं संयुक्त राष्ट्रसंघया महासभाय् सम्बोधन यायेदयेमाःगु माग याःगु दु ।
तालीवान सरकारया बिदेश मन्त्री आमिर खानं संयुक्त राष्ट्रसंघया महासचिव एन्टिनियो गुटेरेसयात पौ च्वया राष्ट्रसंघया नितिं थौं कन्हय् नियुक्त जूम्ह अफगान राजदुत सुहैल शाहीनयात महासभामा सम्बोधन याके बिइत अपिल याःगु खः ।
राष्ट्रसंघं धाःसा वयेकया पौया खँय् लिसः बिउगु मदुनि । अफगानिस्तानया सत्ताय् तालिवान वयेधुंका राष्ट्रसंघका तत्कालिन राजदुत गुलाम एम इसाकजाईयात चिइका शाहिनयात नियुक्त याःगु खः ।
उखे महसभाय् धाःसा इसाकजाईया कुर्सी यथावत तयातःगु दु । वयेकलं सेप्टेम्बर २७ य् महासभाय् सम्बोधन यानादीगु ज्याधलः दु ।
महासभाय् दुथ्यागु अमेरिका, चीन व रुसया प्रतिनिधीतयेसं तालिवानया प्रस्ताव कथं महासभाय् उमिसं नियुक्त याःम्ह राजदूतया ब्वतिया संभावना म्हो दूगु धाःगु दु ।
अष्ट्रेलियाय् ६गू रेक्टरस्केलया शक्तिशाली भुखाय् ब्वल
ञलाथ्व द्वादशी ११४१, असोज ६ बुधबाः
अष्ट्रेलियाय् थौं सुथय् शक्तिशाली भुखाय् ब्वःगु दु ।
बुधबाः सुथय् स्थानीय ई कथं जःछि वं ९ ताः इलय् भिक्टोरिया राज्यया राजधानी मेलवर्न लिक्क केन्द्रविन्दू दयेकाः ५गू फुति ८गू रेक्टरस्केलया भुखाय् ब्वःगु खः ।
भुखाचं मेलवर्न शहर व जःखःया क्षेत्रय् आपालं छेँ दुंगु दु । भुखाय्या हुनिं विद्युत आपूर्ति बन्द जूगु दु । भुखाय्या धक्का सलंसः किलोमिटर तापाक्क सिड्नी, एडलेइड, न्यु साउथवेल्स लिसेंया शहरय्तक्क नं महशुष जूगु खः ।
भिक्टोरिया राज्य सरकारं मनूतय्त छेँय् दुने मच्वनेत व लिभुखाय्प्रति सचेत जुइत धाःगु दु । मेलवर्न शहरय् मनूतयत् सुरक्षित थासय् ल्ह्यःगु दु । भुखाय् ब्वयेधुंकाः ४गू रेक्टरस्केल जःखःया लिभुखाय् ब्वःगु धाःगु दु ।
अष्ट्रेलियाया इतिहासय् थ्व हे दक्कलय् तःधंगु भूखाय् धाःगु दु । अमेरिका भ्रमणय् दीम्ह अष्ट्रेलिया प्रधानमन्त्री स्कट मोरिसनं वासिङ्टनय् पत्रकारतलिसे खँ ल्हासें आःतक्क मानवीय क्षति वा सुं घाःपाः जूगु बुखँ मवःगु धयादीगु दु ।
अमेरिका चीकल यात्रा प्रतिबन्ध
ञलाथ्व प्रतिपदा ११४१, असोज ५ मंगलबाः
अमेरिकां कोरोना महामारीया दथुइ तःगु यात्रा प्रतिबन्धयात वइगु नोभेम्बरनिसें चायेकेगु योजना न्ह्यःने हःगु दु ।
ह्वाइटहाउसया कोभिड–१९ कजि जेफ जियन्ट्सं न्हूगु नियम घोषणा यासें कोरोना महामारी नियन्त्रणय् देय् स्वयां मनू हे सतर्क जुयाच्वनेमाःगु धासें यात्रा प्रतिबन्ध चायेकेत्यनागु जानकारी ब्यूगु दु ।
अमेरिकां बेलायत, युरोपियन युनिएन व मेगु छुं राष्ट्रय् वंगु दँनिसें यात्रा प्रतिबन्ध तःगु खः । कोरोनाबिरुद्धया पुर्ण खोप काःपिं व कोरोना परिक्षण यानाः रिपोर्ट नेगेटिभ वःपिं यात्रुतय्त अमेरिका दुहांवयेके बीत्यंगु दु ।
अमेरिकां शुरुइ चिनियाँ यात्रुयात तःगु प्रतिबन्ध बुलुहुँ बेलायत जुयाः मेगु राष्ट्रय् नं लागु याःगु खः । १८दं क्वय्या खोप मकाःनिपिनिगु हकय् धाःसा निर्णय याःगु मदुनि ।
