Display Style:
Column Style
हलिंया नेतापिनिगु गोप्य सम्पती
ञलागा द्वादशी ११४१, असोज १८ सोमबाः
पन्डोरा पेपर्सं हलिंया नांजाःपिं नेता व अर्वपतितय् गोप्य धन व लगानी ट्याक्स हेभन देशय् दुगु खुलासा याःगु दु ।
गुकी पदय् दुपिं अले पूर्व यानाः ३५ राजनीतिक मनूत दु । अथे हे, ३सः स्वयां अप्वः सार्वजनिक पदय् दुपिं अधिकारी व सेलिब्रेटीतय् नं अफसोर कम्पनीइ लगानी दु ।
जोर्डनया जुजु अवदुल्लाहया ७० मिलियन अमेरिकी डलर लगानी दुसा बेलायतया पूर्व प्रधानमन्त्री टोनी ब्लेयर व वय्कःया जहानं लण्डनय् अफिस न्याःबलय् ३ लख पाउण्ड स्वयां अप्वःया घोटाला याःगु दाबी नं पेपर्सय् याःगु दु ।
अथे हे, रुसी राष्ट्रपति भ्लादिमीर पुटिनं फ्रान्सया मोनाका टापुइ गोप्य सम्पती दुगु दाबी याःगु दुसा चेक गणतन्त्रया प्रधानमन्त्री आन्दे्रेज बाबिसं नं अथाह सम्पती गोप्य तरिकां तयातःगु दाबी पेपर्सय् याःगु दु ।
उत्तर कोरियाया ख्याच्वः
ञलागा द्वादशी ११४१, असोज १८ सोमबाः
उत्तर कोरियां संयुक्त राष्ट्र सुरक्षा परिषदयात थःगु मिसाइल प्रक्षेपण ज्याझ्वया आलोचनाया खँय् प्रतिक्रिया बिउसें गम्भीर लिच्वः फयेमाःगु ख्याच्वः बिउगु दु ।
संयुक्त राष्ट्र सुरक्षा परिषदं वंगु शुक्रबाः आपतकालिन मुँज्या आव्हान यासें फ्रान्सं उत्तर कोरियाया मिसाइल प्रक्षेपण ज्याझ्वलय् खँय् गम्भीर ध्यानाकर्षण जूगु धायेधुंका उत्तर कोरियां थुकथं ख्याच्वः बिउगु खः ।
उत्तर कोरियाया बिदेश मन्त्रालयं छगू वक्तब्य पिकाना उत्तर कोरियाया निजी मामिलाय् हस्तक्षेप मयायेत संयुक्त राष्ट्र सुरक्षा परिषद्यात ख्याच्वः बिउगु खः । उत्तर कोरियां दक्षिण कोरियालिसे वार्ता यायेत मनंतुंगु नं धाःगु दु ।
अमेरिकां उत्तर कोरियायात तःगु प्रतिबन्धया हुनिं छुं मछिंगु स्थिति ब्वलनेधुंका दक्षिण कोरियालिसे वार्ता यायेत मनंतुगु आंकलन याःगु दु ।
इटली बिमान दुर्घटना जुल
ञलागा द्वादशी ११४१, असोज १८ सोमबाः
इटलीया मिलानय् छगः निजी बिमान दुर्घटना जूबलय् ८ म्ह सीगु दु । इटालीया सार्डियाना टापुया नितिं उडान जायेकुगु बिमान ब्वयेवं मिलानया छगू खाली भवनय् कुतुंवना दुर्घटना जूगु खः ।
दुर्घटनाया हुनिं उगु भवनया पार्किङय् तयातःगु आपालं कारय् मिंनया ध्वस्त जूगु दु । रोमानियाया ६८दँया पाइलट अर्वपति डान पेटे«स्कु स्वयम चालक दूगु विमानय् सीपिंलय् वयेक लिसें वयेकया तिरि, काये व मेपिं छेजःया दुजः दु ।
ब्वयेवं बिमानया इन्जिनय् मिं नःगु प्रत्यक्षदर्शीतयेसं धाःगु दु । घटनाया खँय् अनुसन्धान न्ह्याकुगु दु ।
अमेरिकाय् गर्भपतनया माग यासें ब्वज्या
ञंलागा द्धादशी ११४१, असोज १७ आईतवाः
अमेरिकाय् गर्भपतनया समर्थनय् द्वलंद्वःम्हेसिनं प्रदर्शन याःगु दु । टेक्सस राज्यय् गर्भपतनया अधिकारय् छुं परिमार्जन यायेधुंकाः उकिया विरोध यासें प्रदर्शन जूगु खः ।
मेगु राज्यय् नं कानुन परिमार्जन जुइफुगु धासें उकिया विरुद्ध मिसा अले अधिकारकःमित प्रदर्शनय् कुहांवःगु खः । अमेरिकाय् सन् १९७३य् हे गर्भपतनयात कानुनी मान्यता ब्यूसां रिपब्लिकनं इलय् ब्यलय् गर्भपतन सम्बन्धि प्रावधानयात परिमार्जन यायेगु याः । रिपब्लिनया सरकार दुगु टेक्ससय् ६ वाःया गर्भपतन यायेत प्रतिबन्ध तःगु दुु ।
गुलि ईया गर्भपतन यायेदइगु धइगु विषय न्ह्याबलें विवादय् लानावःगु दु । अमेरिकी सर्वोच्च अदालतय् विचाराधीन दुगु थुगु विषयया सुनुवाई न्ह्याःवनाच्वंगुलिं नं अधिकारकःमित सडकय् कुहांवःगु खः । देय्न्यंकनं मिसा अले अधिकारकःमितय्सं गर्भपतनया पक्षय् प्रदर्शन यानाच्वंगु इलय् छुं पुचलं धाःसा उकिया विरोधय् नं प्रदर्शन याःगु दु ।
छिकपिनिगु ल्हातय् निर्दोष मचाया हि बुलातःगु दु धइगु प्लेकार्ड ज्वनावःपिं प्रदर्शनकारीयात सुरक्षाकःमिं मूख्य सडकय् पिहां वये ब्यूगु मदु ।
ब्राजिलय् राष्ट्रपति बुल्सोनारोविरुद्ध द्वलंद्वः प्रदर्शनकारी सडकय्
ञंलागा द्धादशी ११४१, असोज १७ आईतवाः
ब्राजिलय् राष्ट्रपति जैर बुल्सोनारोया बिरोधय् द्वलंद्वः प्रदर्शनकारीत सडकय् कुहांवःगु दु ।
बिपक्षी दल व ट्र्ेड युनियनया मंकाः ग्वसालय् याःगु प्रदर्शनय् द्वलंद्वः सर्वसाधारणया ब्वति दुगु खः । राष्ट्रपति बोल्सोनारां कोरोना महामारी नियन्त्रणय् लापरवाही याःगु हुनिं ६ लख स्वयां अप्वःया ज्यान वंगु धासें उमिसं राष्ट्रपतिया राजिनामा माग याःगु दु ।
राष्ट्रपतिया हुनिं देशय् भ्रष्टाचार, गरिबी, भोकमरीया समस्या वःगु धासें लोकतन्त्र रक्षाया लागिं जनता छधी जूगु प्रदर्शनकारीतय् तर्क दु । ब्राजिलया रियो दि जेनेरियोलिसें सच्छि व ६० शहरय् छगू हे इलय् मुंपिं प्रदर्शनकारीं राष्ट्रपतिं पदत्याग मयाःतल्ले प्रदर्शन न्ह्याकातयेगु धाःगु दु ।
थ्व हे दथुइ, राष्ट्रपतिबिरुद्ध ब्राजिलया क्वय्या सदनय् महाअभियोगया मुद्दा दायर जूगु दु ।
