Display Style:
Column Style
कोरोना महामारीया कारण सीकेगु ह्वःताः दुगु डब्लुएचओया धापू
कौलाथ्व नवमी ११४१, असोज २८ विहीबाः
विश्व स्वास्थ्य संगठन डब्ुलएचओं कोरोना महामारीया कारण सीकेगु लिपांगु ह्वःताः दुगु धाःगु दु ।
डब्ुलएचओं थौंकन्हय् तिनि गठन याःगु २६ दुजःया विज्ञ पुचःया लागिं कोरोनाया उत्पति सीकेगु लिपांगु ह्वःताः जुइगु न्ह्यथंगु खः । डब्ुलएचओं थगुनेनिसें हे चीनया वुहान सहरं न्ह्याःगु कोरोना महामारीया कारणबारे अध्ययन यानाच्वनागु न्ह्यथंगु दु ।
डब्लुएचओलिसें थीथी संस्थां कोरोना भाइरस उत्पतिया कारणबारे ताः इलंनिसें अध्ययनया कुतः न्ह्यानाच्वंसां चीनं माक्व ग्वहालि मयाःगु द्वपं बियावःगु दु ।
वुहान सहरं कोरोना न्यंगु पुष्टि जूसां उकिया कारण धाःसा अझं अस्पष्ट तिनि । गुलिसिनं वुहानय् दुगु प्रयोगशालां कोरोनाया जिवाणु मनुखय् पुंगु न्ह्यथंसां उकिया आधिकारीक पुष्टि जुइमफुनि ।
वंगु फेब्रुअरीइ डब्लुएचओया टोली चीन वंसां सरकारं माक्व ग्वाहालि मयाःगुलिं बिचाः यानाकथं अनुसन्धान यायेमफूगु न्ह्यथंगु दु । डब्लुएचओया महानिर्देशक डा टेड्रोस अधानोम गेब्रेयससं चीनं माक्व ग्वहालि मयाःबलय् अनुसन्धानय् पंगः जूगु धयादिल ।
डब्लुएचओं चीनय् कोरोना भाइरसबाहेक मेगु तःधंगु जोखिमं जाःगु ल्वय्या बारेय् नं अनुसन्धान यायेगु न्ह्यथंगु दु । चीनं ग्वहालि याःसा कोरोनाया उत्पति बारे अध्ययन यायेगु तःधंगु ह्वःता चूलाइगु डब्लुएचओया ठहर दु ।
नर्वे बाणं कयेकाः न्याम्ह सित, निम्ह घाःपाः
कौलाथ्व नवमी ११४१, असोज २८ विहीबाः
नर्वेया छगू सहरय् सशस्त्र मनूया हतालं न्याम्ह सीगु दु । दक्षिण पूर्वी नवेया कोङ्सबर्ग सहरय् बाणं कयेकाः उमित स्यानाब्यूगु बीबीसीं न्ह्यथंगु दु ।
घटनाय् निम्ह घाःपाः जूगु दु । घटनाय् ल्हाः दुगु आशंकाय् प्रहरीं छम्हेसित नियन्त्रणय् कयागु न्ह्यथंगु दु । आक्रमणया कारणबारे अनुसन्धान जुयाच्वंगु प्रहरीं धाःगु दु ।
तर प्रहरीं घटनाया थप अनुसन्धान जुयाच्वंगुलिं संधिग्दबारे आः हे यक्व कनेमफइगु धाःगु दु । प्रहरीया कथं उम्ह मनुखं सहरया थीथी थासय् बाणं कयेकाजूगु खः । नर्वेया प्रहरीं थुगु घटनाय् आतंकवादीतय् ल्हाः दूगु मदुगु बारे अनुसन्धान यायेगु धाःगु दु ।
नर्वेया प्रधानमन्त्री एर्ना सोलबर्गं संधिग्द मनूया हतालं सर्वसाधारण ग्याःगुलिं दोषीयात कारवाही जुइगु धयादिल । प्रत्यक्षदर्शीया कथं उम्ह मनूयाके मेगु ल्वाभः नं दुगु खः ।
अफगानिस्तानय् आर्थिक ग्वहालि यायेत जी २० पुचः राष्ट्रत तयार
कौलाथ्व अष्टमी ११४१, असोज २७ बुधबाः
जी २० पुचः राष्ट्रतय्सं अफगानिस्तानइ् आर्थिक ग्वहालिया लागिं प्रतिवद्धता प्वंकूगु दु ।
भर्चुअल सम्मेलनय् उगु राष्ट्रतय्सं अफगानिस्तानय् न्यूनतम मानविय ग्वहालि माःगु ठहर याःगु खः । संयुक्त राष्ट्र संघं अफगानिस्तानय् दातृ राष्ट्रतय् आर्थिक ग्वहालि माःगु धाःगुलिसें जी २० पुचः राष्ट्रत अफगानिस्तानयात ग्वहालि यायेत तयार जूगु खः ।
वंगु अगस्टय् अमेरिकी सेना लिहांवंगुलिसें तालिवानीं अफगानिस्तानया सत्ता कब्जाय् कायेधुंकाः मानविय संकट ब्वलनावंगु खः । ताः ई अमेरिकी सेनाया नियन्त्रणय् दुगु अफगनिस्तानय् तालिवानीलिसेया द्वन्द्वया हुनिं लखौं सर्वसाधारण विस्थापित जूगु दु ।
तत्कालया लागिं वासः व नसाया लागिं तःधंगु ग्वहालि माःगु राष्ट्र संघं न्ह्यथंगु दु । सम्मेलनय् अमेरिकां स्वतन्त्र अन्तर्राष्ट्रिय संगठनमार्फत अफगानिस्तानय् ग्वहालि यायेमाःगुलिइ बः ब्यूगु दु ।
अथे हे, युरोपियन युनियनं नं अफगानिस्तानया शरणार्थीतय् ग्वाहालिया लागिं तयार दुगु धाःगु दु । तालिवानीं सत्ता कब्जा याःगुलिसें अफगानिस्तानय् यक्व बैंक अले वित्तीय संस्थात बन्द जूगु दु ।
थीथी सरकारी अले गैरसरकारी संस्थाय् ज्या यानाच्वंपिं कर्मचारीं ताः ईतक्क तलब सुविधा कायेमखंनि ।
इराक निर्वाचनय् शिया धर्मगुरु मुक्तदा अल सद्रया पार्टीं अग्रता
कौलाथ्व अष्टमी ११४१, असोज २७ बुधबाः
इराकय् वंगु आइतबाः क्वचाःगु संसदीय निर्वाचनय् प्रभावशाली शिया धर्मगुरु मुक्तदा अल सद्रया पार्टीं अग्रता काःगु दु ।
संसदया ३सः व २९ सीटय् वय्कःया पार्टीं ७३ सीट त्याकूुगु दु । देशय् विदेशी प्रभावया विपक्षय् सः तयावःम्ह मुक्तदा अल सद्रं जीत सुनिश्चित जुइधुंकाः सम्बोधन यासें इराकी जनतां फयावःगु समस्या ज्यंकेत थः जायेगु धासें देशय् विदेशी प्रभाव जुइकेमबीगु बचं बियादिल ।
राजधानी बग्दादलिसें मेगु १८ प्रान्तय् वय्कःया पकड बल्लाःगु सर्वेक्षणं क्यंगु दु ३द्वः ४सः व ४९म्हेसिनं उम्मेदवारी ब्यूगु चुनावय् प्रारम्भिक लिच्वः कथं शिया पुचःया पूर्व प्रधानमन्त्री नुरी अल मलिकीया पार्टी निगूगु थासय् दु ।
इराकय् सद्दाम हुसेनया निष्कासन धुंकाः जूगु थ्व खुगूगु संसदिय चुनाव खः । थुकी ४१ प्रतिशत मतदान जूगु दु ।
चीनया छगू अन्तरिक्ष यान चन्द्रमाया चट्टान हयेत ताःलात
कौलाथ्व चतुर्थी ११४१, असोज २५ सोमबाः
चीनया छगू अन्तरिक्ष यान ४० दँया इतिहासय् न्हापांखुसिइ चन्द्रमाया सतहया चट्टान संकलन यायेत ताःलाःगु दु ।
चिनीयाँ अन्तरिक्ष एजेन्सीया कथं चीनया चाँग ई ५ मिसनं ४०दँया इतिहासय् चन्द्रमाया चट्टान कया पृथ्वीइ लिहाँवयेत ताःलाःगु चिनियाँ समाचार संस्था सिन्ह्वां न्ह्यथंगु दु ।
उगु मिसनय् दुथ्यागु अमेरिकाया वाशिङटन बिश्वबिद्यालयया बिशेषज्ञ बै्रड जोलिफं उगु चट्टानया आयु थ्यंमथ्यं २ गू अर्व दँया जुइगु ताकं याःगु दु । वयेकया कथं चन्द्रमा लगभग ४ गू अर्ब दँ पुलांगु खः, थ्व पृथ्वी थें हे पुलांगु खः ।
बैज्ञानिकतये टोलीं चन्द्रमा जःखःया क्षेत्रया दँ निर्धारणया नितिं चट्टानया नमुना संकलन याःगु न्ह्यथंगु दु । जोलिफं चीनया बेइजिङ प्रयोगशालाय् थुगु चट्टानया खँय् थप अनुसन्धान याना याकनं हे न्हूगु तथ्य सार्वजनिक यायेगु न्ह्यथंगु दु ।
चीनं चांग ई ५ मिसन वंगु २४ नोभेम्बरय् प्रक्षेपण याःगु खः । थ्वहे मिसनं ४गू दशकया इतिहासय् चन्द्रमाया सतहया चट्टान पृथ्वीइ हयेत ताःलाःगु खः ।
