स्वीडेनया न्हापाम्ह मिसा प्रधानमन्त्रीपाखे राजीनामा
लहनान्युज | कछलागा षष्ठी ११४२, मंसीर ९ बिहीवाः
![](https://www.lahananews.com/sites/default/files/sweden.jpg)
स्वीडेनया न्हापाम्ह मिसा प्रधानमन्त्रीइ नियुक्त जुम्ह म्याग्डलेना यान्डरसनं छु घण्टाय् हे राजीनामा बिउगु दु।
यान्डरसन म्हिगः प्रधानमन्त्रीइ नियुक्त जुगु खः। तर वयकःया गठबन्धन सरकारें साझेदार दल ग्रीन्सं समर्थन लितकायेवं राजीनामा बिउगु खः।
यान्डरसनं राजीनामा बिइवं स्वीडेनमा बजेट पारित याये फुगु मदुनि। ग्रीन्सं उग्र दक्षिणपन्थीनाप मस्यौदा याउगु बजेट स्वीकार याये फइमखु धका धयावया च्वंगु खः। यान्डरसनं आः एकल पार्टी नेतृत्वया सरकार प्रधानमन्त्री जुइगु कुत? यानाच्वंगु दु।
स्वीडेनय् मिसापिन्त मतदान यायेगु अधिकार बिउगु १०० दँ लिपा प्रधानमन्त्री ५४ दँ दुम्ह सोसियल डेमोक्र्याट नेता यान्डरसन नियुक्त जुगु खः। संसदय् ३४९ म्ह सांसदपि मध्ये १७४ म्ह विपक्षय् मत कुहावंगु खः।
वयकःया समर्थनय् ११७ म् सांसदपि नाप थप ५७ म्ह तटस्थ च्वंगु खः।
युरोपय् मार्च तक्क कोरोनां थप ७गू लख मनूत सिइफइगु डब्लूएचओया ख्याच्वः
कछलागा पञ्चमी ११४२, मंसीर ६ बुधबाः
![](https://www.lahananews.com/sites/default/files/corona_10.jpg)
विश्व स्वास्थ्य संगठनं वइगु मार्च महिना तक्क युरोपय् कोरोनां थप ७ गू लख मनूत सिइफइगु ख्याच्वः बिउगु दु ।
लिपांगु दिंलय् तच्वकं संक्रमण फयाच्वंगु युरोपेली देय्त व युरोपलिसे लिक्कसं दूगु एशियाली देशय् तःधंगु ल्याःखय् मनूत सिइफइगु ख्याच्वः डब्लुुएचओं बिउगु खः । डब्लुएचओं युरोप क्षेत्रय् दूगु ५३ गू देशय् आः तक्क १५गू लख अप्वः मनू सिइधुंकुगु दु ।
वइगु बसन्त तक्क थुगु ल्याः २२गू लख थ्यनिगु दबाी नं डल्युएचओं याःगु दु । मार्च तक्क युरोपेली देय्या अस्पतालया सघन उपचार कक्षय् भयंकर चाप अप्वःइगु नं डल्युएचओया प्रक्षेपण दु ।
युरोपया आपालं देशय् आः कोरोनाया अनिवार्य खोप व लकडाउनया विरोध जुयाच्वंगु दु । नेदरल्याण्ड, अष्ट्रिया, बेल्जियम लिसेंया देशय् हिंसात्मक ब्वज्या तकं जूगु दु ।
जर्मनी, फ्रान्स, ग्रीस लिसेंया देय्तयेसं धाःसा निगुलिं खोप कायेधुंकुपिन्त बुस्टर डोज बिइगु तयारी याःगु दु । लिपांगु दिंलय् रुसय् जक न्हियान्हिथं मृत्युदर १२म्ह थ्यंगु दुसा युरोपय् ४ द्वः व २सःम्ह थ्यंगु दु ।
खोप मकाःपिनि हताहती व डेल्टा भेरियन्टया लिच्वः तसकं खतरनाक खनेदूगु धका विश्व स्वास्थ्य संगठनं आपालं सिवें आपालं मनूया ज्यान ल्यंकेगु नितिं सकसिया उतिकं दायित्व जुइगु धाःगु दु ।
जर्मनी “कि खोप कयाः लंकि नत्र सिनाहुँ” धासें सरकारं बिल चेतावनी
कछलागा चर्तुर्थी ११४२, मंसिर ७ मंगलबाः
![](https://www.lahananews.com/sites/default/files/germany_0.jpg)
कोरोना संक्रमण नियन्त्रणया लागिं युरोपन्यंक लकडाउन जुयाच्वंगु इलय् जर्मनीं थः नागरिकयात खोप अनिवार्य यायेगु तयारी याःगु दु ।
जर्मन सरकारं कि खोप कयाः लंकि मखुसा सिनाहुँ धकाः चेतावनी जारी यासें अनिवार्य खोप ज्याझ्वः न्ह्याकेगु छुमा क्यंगु खः । जर्मन स्वास्थ्य मन्त्री जेन्स स्पानं थ्व हिउँदया अन्ततक्कय् प्रत्येक जर्मन नागरिकयात कि खोप कयाः सुरक्षित दयेकेगु वा सीत त्वःताबीगु धयादीगु दु ।
जर्मनीया गुलिखे क्षेत्रय् तच्वःगु संक्रमण दरया हुनिं लकडाउन यायेमाःगु व अस्पतालत विरामीं जायावःगु सन्दर्भय् स्वास्थ्यमन्त्री स्पानं थथे चेतावनी ब्यूगु खः । सत्तां पिहांवयाच्वंम्ह चान्सलर एंगेला मर्केलं नं कारोना नियन्त्रणया लागिं सरकारं ल्ह्वंगु नियन्त्रणकारी पलाः मगाःगु धासें संक्रमणया गति नाटकीय रुपं अप्वःगुलिं कडा पलाः जरुरी खनेदुगु धयादीगु दु ।
जर्मनीइ हरेक वालय् संक्रमित दर निदुगलं अप्वयाच्वंगु दु । म्हिगः सोमबाः जक ३०द्वः स्वयां अप्वः संक्रमित लूगु दुसा ६२ सीगु दु । उखे, जःलाखला अष्ट्रिया देय्न्यंक पूर्ण लकडाउनय् वनेधुंकूगुलिं जर्मन सरकार दबावय् लाःगु दु ।
खोप अभियानप्रति नागरिकतय्सं बेवास्ता याःबलय् जर्मनीलिसें युरोपन्यंक संक्रमण नियन्त्रण थाकुयावंगु दु ।
युरोपय् कोरोना नियन्त्रणया मापदण्डप्रति जनआक्रोश अप्वयावल
कछलागा तृतीया ११४२, मंसीर ६ सोमवाः
![](https://www.lahananews.com/sites/default/files/lockdown_3.jpg)
कोरोना संक्रमण नियन्त्रणया लागिं युरोपया थीथी देशय् लागु याःगु लकडाउनप्रति जनआक्रोश अप्वयावंगु दु ।
इटाली, बेल्जीयम, नेदरल्याण्ड्स, अष्ट्रियालिसेंया देशय् लकडाउनविरुद्ध सर्वसाधारणं बृहत प्रदर्शन याःगु दु । छुं थासय् ला प्रदर्शन हिंसात्मक जुयाः हाथ्या अप्वःगु दु । बेल्जीयमय् म्हिगः झण्डै ३५द्वः सर्वसाधारणं लकडाउनया विरोधय् प्रदर्शन यात ।
राजधानी ब्रसेल्सय् प्रदर्शनकारी व प्रहरी दथुइ झडप नं जूगु दु । कोरोनाविरुद्ध पूर्ण मात्राय् खोप मकाःपिन्सं सार्वजनिक थासय् प्रवेश निषेध यायेगु कथं सरकारं मापदण्ड जारी यायेधुंकाः प्रदर्शन न्ह्याःगु खः ।
उमिसं थः शरिरयात थःगु अधिकार दय्माःगु मागलिसें खोप मकाःसां सार्वजनिक थासय् निर्वाध दुहां वयेदय्माःगु माग तःगु दु ।
युरोपेली देशय् कारोना नियन्त्रणया मापदण्डय् तच्वकं विरोध
कछलागा द्वितिया, मंसीर ५ आइतबाः
![](https://www.lahananews.com/sites/default/files/covid_1.jpg)
युरोपय् कोरोना संक्रमण नियन्त्रणया नितिं न्हूगु स्वास्थ्य मापदण्ड लागू जुइधुंका युरोपया थी थी थासय् सडक ब्वज्या जूगु दु ।
ब्वज्या हिंसात्मक नं जुयावंगु दु । नेदरल्याण्डय् कोरोना नियन्यत्रणया नितिं सरकारं न्हूगु स्वास्थ्य मापदण्ड लागू यायेधुंका आक्रोशित जूपिं सर्वसाधारण व प्रहरी दथुइ वंगु चान्हय् ल्वापु जूगु दु ।
ल्वापुं तच्वगु रुप काःबलय् द हेग, रोटरडम लिसेंया शहरय् दंगा न्यंगु दु । प्रहरीं ब्वज्यामितयेत गोलीं कयेकेधुंका सर्वसाधारण झं उग्र जूगु दु । उमिसं बाचाय् थाय् थासय् आगजनी व तोडफोड याःगु दु ।
उगु झ्वलय् बागु दर्जन प्रहरी घाःपाः जूगु व दर्जन अप्वः ब्वज्यामियात नियन्त्रणय् काःगु दु । शक्रुबाः चान्हय् नं थाय् थासय् ब्वज्या जूगुलिइ प्रहरीं लाठीचार्ज याःगु लिसें आपालंसित नियन्त्रणय् काःगु खः ।
नेदरल्याण्डसं कोरोना संक्रमण तच्वयेधुंका आंशिक लकडाउनया नीति अवलम्बन याःगु दु । खोप मकाःपिन्त छेँय् हे सीमित यायेगु सरकारी नीतिया विरोधय् शान्तिपूर्ण ब्वज्या जुयावःगुलिइ शनिबाः सनिलय्निसें विुरोध आक्रोशय् हिउगु खः ।
प्रहरीं न्ह्योनेलाथें ज्वनेगु, पसलेतयेत दुब्र्यवहार यायेगु व लँजुवातयेत यःयःथे चेकजाँच यायेगु न्ह्याकेधुंका सर्वसाधारण आक्रोशित जूगु खः ।
अथेहे अष्ट्रियाय् नं आंशिक लकडाउनया विरोध याना द्वलंद्वःम्ह मनूत सडकय् कुहाँवःगु दुसा इटली व क्रोएसियाय् नं तच्वकं ब्वज्या जूगु दु । फ्रान्सय् नं सडक ब्वज्या जुइगु ग्याचिकुं सुरक्षा ब्यवस्था तच्वयेकुगु दु ।