अमेरिकां कोराना खोप काःपिं विदेशी आगन्तुकयात प्रवेश अनुमति
कछलाथ्व चतुर्थी ११४२, कात्तिक २२ सोमबाः
![](https://www.lahananews.com/sites/default/files/usa_11.jpg)
अमेरिकां कोरोना महामारी न्यनेधुंका बन्द याःगु प्रतिबन्ध चिइका थौं चान्हय्निसें डबल डोज खोप कायेधुंकुपिं विदेशी आगन्तुकया नितिं प्रवेश अनुमति बिइत्यंगु दु ।
अमेरिकां २०ला निसें तःगु प्रवेश प्रतिबन्धं युरोपेली युनियन सम्वद्ध देय्त, बेलायतलिसें ३०गू देय्या नागरिक प्रभावित जुयावःगु दु । उमित अमेरिकाय् दूपिं छेँजःया दुजःत नापला वनेत अनुमित नं बिउगु मदुनि ।
अमेरिकी प्रतिबन्ध चिलिगु बुखँ लिसें एअरलाइन्सय् टिकट बुकिङया चाप अप्वःगु ट्राभल एजेञ्सीतयेसं धाःगु दु । कोरोना भाइरस न्यनेधुंका तत्कालिन राष्ट्रपति डोनल्ड ट्रम्प प्रशासनं शुरुइ चीनं वइपिं आगन्तुकयात प्रतिबन्ध तःगु खःसा बुलुहुँ उकिया चाकः अप्वयेका युरोपेली युनियन, बेलायत, भारत, दक्षिण अफ्रिका, इरान, ब्रजिल लिसेंया देय्या आगन्तुकयात नं प्रतिबन्ध तःगु खः ।
न्हूगु नियम कथं आः अमेरिका वनेत मनंतुनिपिन्सं डबल डोज खोप काःगु दसि, ३न्हू दुनेया कोरोना नेगेटिभ रिपोर्ट व अमेरिका थ्यनेधुंकाया सम्पर्क नम्बर चूलाकेमाः । तर पर्यटकतयेसं अमेरिका थ्यंका क्वारेन्टिनय् धाःसा च्वनेमालिगु मखु । अथेहे क्यानडा व मेक्सिकोलिसेया सिमाना नं चायेकिगु जूगु दु ।
सीमा नाका चालिगु बुखँ लिसें उकिया लव कया अमेरिका दुहाँवनेगु आशाय् मेक्सिको सिमानाय् द्वलंद्वःम्ह मनूत मुनेधुंकुगु बुखँ नं दु ।
भारतया राजधानी दिल्ली व उत्तर प्रदेशय अप्वल जिका भाइरसया संक्रमण
कछलाथ्व चतुर्थी ११४२, कात्तिक २२ सोमबाः
![](https://www.lahananews.com/sites/default/files/india_9.jpg)
भारतया राजधानी दिल्ली व उत्तर प्रदेशय् जिका भाइरसया संक्रमण अप्वयेधुंकाः सतर्कता नालाकाःगु दु ।
भारतया स्वास्थ्य अधिकारीतय्सं जिका भाइरसका किटाणु अप्वयाच्वंगु अवस्थाय् खनेदुगुलिं शहरबासीयात सचेत जुयाच्वनेत इनाप याःगु दु । उमिगु कथं छन्हुं हे उत्तर प्रदेशय् ४३म्हेसिके थुगु भाइरस खनेदुगु खः ।
उत्तर प्रदेश राज्यय् लिपांगु इलय् थ्व भाइरसया प्रकोप तसकं अप्वःगु धाःगु दु । सरकारी स्वास्थ्य अधिकारीतय्सं वंगु निवाः दुने थन ७९म्हेसिके थ्व भाइरस खनेदुगु प्रमाणित याःगु दु ।
दिल्लीया उपमुख्यमन्त्री मनिस सिसोडियां जिका भाइरसया संक्रमण राजधानीइ ह्वात्तहे थहांवंगु व थुकिया निराकरणया लागिं सरकारं गाक्कं सतर्कता नालाकाःगु जानकारी बियादिल ।
विश्व जलवायु सम्मेलन जुयाच्वंगु ग्लास्गो शहरय् द्वलंद्वःम्हसिया ब्वज्या
कछलाथ्व तुतीया ११४२, कात्तिक २१ आइतबाः
![](https://www.lahananews.com/sites/default/files/cop_2.jpg)
विश्व जलवायु सम्मेलन जुयाच्वंगु स्कटल्याण्डया ग्लास्गो शहरय् द्वलंद्वःम्हसिया ब्वज्या याःगु दु ।
जलवायु परिवर्तन याइगु ज्यापहः दिकेगु नितिं आवश्यक पलाः न्ह्याकेमाःगु माग यासें वातावरणवादी संघसंस्था व सर्वसाधारण सडक ब्वज्याय् कुहाँवःगु खः । हलिंयंक हे लकसया क्षेत्रय् क्रियाशील संघसंस्थातयेसं दबाब अप्वयेकाच्वंगु इल् ग्लास्गोय् छगू लख सिवें अप्वः मनूखं ब्वज्या याःगु खः ।
थुगु ब्वज्या जलवायु परिवर्तन पनेगु अभियानय् दक्वःलय तःधंगु ब्वज्या याःगु खः । ब्वज्याया झ्वलय् रिभरक्लाइड शहरया सतकय् साङ्लो दयेका दनाच्वंपिं २१ म्ह वैज्ञानिकतयेत प्रहरीं नियन्त्रणय् काःगु दु ।
बेलायतया मेगु शहरय् नं जलवायु परिवर्तनया मुद्धा सम्बोधनया माग यासें ब्वज्या जूगु दु । विरोध ब्वज्याय् ऐक्यवद्धता न्ह्यथंपिं हलिंयंकया थ्यंमथ्यं १५ द्वःम्ह वैज्ञानिकतयेसं नं जलवायु क्षेत्रयात न्याय चूलाकेत आकस्मिक पलाः न्ह्याकेत लिबायेधुंकुगु धाःगु दु ।
इराकी प्रधानमन्त्रीया निवासय् ड्रोन हता
कछलाथ्व तुतीया ११४२, कात्तिक २१ आइतबाः
![](https://www.lahananews.com/sites/default/files/iraq_1.jpg)
इराकी प्रधानमन्त्रीया निवासय् ड्रोन हताः जूगु दु । प्रधानमन्त्री मुस्तफा अल–कादिमी धाःसा ड्रोन हताःपाखें ल्यनेत ताःलाःगु दु ।
राजधानी बग्दादया ग्रीनजोनय् दूगु प्रधानमन्त्री निवासय् विष्फोटक ज्वलं दूगु ड्रोनं हताः याःगु खः । प्रधानमन्त्री कादिमीया हत्या यायेगु आज्जुं उगु हताः जूगु इराकी अधिकारीतयेसं धाःगु दु ।
ड्रोन हताःलं इराकी प्रधानमन्त्री घाःपाः जूगु व वयेकयात अस्पताल यंकुगु धाःसा नं प्रधानमन्त्री कादिमी थःपिन्सं हे सामाजिक सञ्जालं थःपिं सुरक्षित दूगु जानकारी बिउगु खः ।
वयेकलं इराक व इराकी जनताया हितया नितिं शान्त व धैर्य जुइत नं इनाप याःगु दु । आपालं सरकारी ज्याकुत व विदेशी दूतावास तकं दूगु भीआपी क्षेत्रय् जूगु हताःया भाला धाःसा सुनां नं काःगु मदुनि ।
लिपांगु दिंलय् इरानी सत्तालिसे स्वापू दूपिं छुं हतियारधारी पुचःतयेसं वंगु लाय् इराकय् क्वचागु निर्वाचनया लिच्वःया खँय् ग्रीनजोन लिक्कसं विरोध ब्वज्या यानावयाच्वंगु दु ।
पटका मुइकुगुया हुनिं न्हू दिल्ली जुल हलिंया हे दक्वःलय् अप्वः प्रदुषित शहर
कछलाथ्व द्धितीया ११४२, कार्तिक २० शनिवाः
![](https://www.lahananews.com/sites/default/files/pataka.jpg)
भारतया राजधानी न्हू दिल्ली हलिंया हे दक्वःलय् अप्वः प्रदुषित वायु दूगु शहर जूगु दु ।
वंगु बिहीबाः चान्हय् लक्ष्मीपूजा व दिपावालीया लसताय् मुइकुगु पटकाया हुनिं दिल्लीया वायुलय् प्रदुषणया मात्रां खतराया तह पार याःगु बीबीसीं न्ह्यथंगु दु । म्हिगः सुथय्निसें दिल्लीया सर्ग कुँ त्वपूगु दुसा दिल्लीया एयर क्वालिटी इन्डेक्स (एक्वुआई)४सः व ५१गू थ्यंगु दु ।
सरकारं पटाका मुइकेत प्रतिबन्ध तःसा नं उकिया कार्यान्वयन जुइ मफूबलय् दिल्ली लिसें भारतया मेगु शहरय् नं वायु प्रदुषण अप्वःगु भारतीय सञ्चारमाध्यमतयेसं न्ह्यथंगु दु । स्विट्जरल्याण्डया एक्युएआइआरया कथं म्हिगः न्हिने दिल्लीया एयर क्वालिटी इन्डेक्स ३सः व ९२गू थ्यंगु दु ।
एक्वुआई ५० गू बाँलाःगु नालेगु याः । ० निसें सच्छि तक्कयात मोडरेट नालेगु याः । एक्वुआई सच्छि व ५०गू तक्क थ्यनिबलय् संवेदनशील पुचःयात अस्वस्थकर जुइ । २सः तक्क थ्यंसा सकसिया नितिं अस्वस्थ जुइ ।
एक्वुआई ३सः थ्यंगु धइगु जोखिमपूर्ण खः । ३सः सिवें अप्वः थ्यंगु धाःसा घातक खः ।