अमेरिकाया न्यूयोर्कय् आपतकाल घोषणा
लहनान्युज | कछलागा नवमी ११४२, मंसीर १२ आईतवाः
![](https://www.lahananews.com/sites/default/files/kkkkkkk.jpg)
अमेरिकाया न्यूयोर्कय् आपतकाल घोषणा याउगु दु। न्यूयोर्कया गभर्नर क्याथी होचुलं विज्ञप्ति जारी यासे डिसेम्बर ३ निसे लागू जुइगु कथं आपतकाल घोषणा याउगु दु।
आःतक फैलै जुगु कोरोना डेल्टा व नकतिनि हे पहिचान याउगु ओमिक्रोन भेरियन्टया कारण चिकूगु संक्रमण अप्वोया वंगु धका होचुलं आपतकाल घोषणायानागु धका एनबीसी न्यूयोर्क धाउगु दु। होचुलं शुक्रबाः जारी याउगु विज्ञप्तिइ न्यूयोर्कय् च्वपिन्त खोप कायेत न इनाप याउगु दु।
‘महामारीनाप ल्वायेगु दकलय् तधःगु हतियार खोप न खः’, विज्ञप्तिइ धयातःगु दु, ‘हरेक न्यूयोर्कय् च्वपिन्स खोप कायेत प्रोत्साहित याये व पूरा डोज काये धुकुपिन्स बुस्टर डोज कायेत न इनाप याये।’ आपतकाल लागू जुइवं न्यूयोर्क राज्यं महामारीनाप ल्वायेत माःगु सामग्री खरीद यायेत, अस्पतालया क्षमता अप्वोकेत व स्वास्थ्यकर्मीया अभाव पूर्ति यायेगु पलाः ल्ह्वनेत्यःगु दु।
अथेहे, राज्यया स्वास्थ्य मन्त्रालयं अस्पतालया सामान्य उपचार प्रक्रिया तक सीमित याये फइ।
जर्मनय् न्हुगु भेरियन्ट ओमिक्रोन खनेदत
लहनान्युज | कछलागा नवमी ११४२, मंसीर १२ आईतवाः
![](https://www.lahananews.com/sites/default/files/ccc_25.jpg)
दक्षिण अफ्रिकां लिहावपि मनूपिन्त कोरोनाया न्हुगु भेरियन्ट ’ओमिक्रोन’ या शङ्कास्पद सङ्क्रमित खनेदुगुलि जर्मनय् उच्च सतर्कता अपने याउगु दु।
दक्षिण अफ्रिकां लिहावम्ह छम्ह मनूयाके न्हुगु भेरियन्टपाखे सङ्क्रमित जुगु शकां पश्चिमी राज्य हेस्सीया सामाजिक मामिलामन्त्री काइ क्रोजले ट्विटय् उल्लेख याउगु दु।
उम्ह मनूयाके ‘ओमिक्रोन’ भेरियन्ट जुगु सम्भावना दुगुलि वयात होम क्वरेण्टीनय् तया तगु दु धका धाउगु दु। तर पुष्टिया लागि थप अनुसन्धान यानाच्वंगु दु।
कोरोना भाइरसया न्हुगु भेरियन्टया नां ‘ओमिक्रोन’
लहनान्युज | कछलागा अष्टमी ११४२, मंसीर ११ सनिवाः
![](https://www.lahananews.com/sites/default/files/new-virus.jpg)
विश्व स्वास्थ्य संगठनं दक्षिण अफ्रिकाय् पत्ता लगे जुगु कोरोना भाइरसया न्हुगु भेरियन्टया नां ‘ओमिक्रोन’ तःगु दु।
विश्व स्वास्थ्य संगठनं दक्षिण अफ्रिकाय् नकतिनि लुगु कोभिड–१९ या न्हुगु भेरियन्टया नां ‘ओमिक्रोन’ तःगु दु। संगठनं ओमिक्रोन ‘चिन्ताजनक भेरियन्ट’ तक धाउगु दु। समाचार कथं ‘बि.१.१.५२९’ तक धाइगु ओमिक्रोन भेरियन्टया उत्परिवर्तन ल्याः यक्को व यक्को पटक हाकन संक्रमण जुइगु जोमिख अप्वो दु धका धाउगु दु।
आःतक ओमिक्रोन भेरियन्ट दक्षिण अफ्रिका नाप बेल्जियम, इजरायल, बोत्स्वाना व हङकङमा खने दये धुकुगु दु। न्हुगु भेरियन्ट पत्ता लगे जुगु समाचार पिहा वयेवं युरोपेली युनियन व बेलायतं दक्षिण अफ्रिकी मुलुक देयपाखे वइगु हवाई यात्राय् प्रतिबन्ध तःगु खः। अथेहे, अमेरिकां तक दक्षिण अफ्रिका नाप मेमेगु देशपाखे वइगु हवाई यात्राय् प्रतिबन्ध याइगु जुगु दु।कोरोना न्हुगु भेरियन्ट नां ओमिक्रोन भारतय् न खनेदुगु दक्षिण अफ्रिका, बोत्स्वाना व हङकङपाखे वंपि यात्रुपिन्त कडा स्क्रिनिङ व परीक्षण याइगु धका धाउगु दु।
तर ओमिक्रोनया पहिचान लिपा अन्तर्राष्ट्रिय प्रतिक्रियाप्रति दक्षिण अफ्रिकां असहमति क्यंगु खः। शुक्रबाः दक्षिण अफ्रिकाया स्वास्थ्यमन्त्री जो फाहलां हवाइ यात्राय् प्रतिबन्ध यायेगुलि थीथी देशय् ल्ह्वंगु पला ‘गलत’ खः धका निन्दा याउगु दु।
जर्मनीइ समाजवादी पार्टीया नेता अलफ स्कोल्ज न्हूम्ह चान्सलर जुइगु पक्काः
कछलागा षष्ठी ११४२, मंसीर ९ बिहीवाः
![](https://www.lahananews.com/sites/default/files/german%20chansler.jpg)
जर्मनीइ समाजवादी पार्टीया नेता अलफ स्कोल्ज न्हूम्ह चान्सलर जुइगु निश्चित जूगु दु ।
वंगु सेप्टेम्बरय् जूगु आम निर्वाचनय् छुं नं पार्टीैं बहुमत हयेमफयेधुंका सत्ता हस्तान्तरणय् लिबानाच्वंगु इलय् स्कोल्जं बहुमतया नितिं आवश्यक ल्याः मुंका सरकारया नेतृत्वया नितिं दाबी पेश यानादीगु खः ।
आःया छुं वालय् जर्मन संसदं बहुमत सिद्ध याना स्कोल्जं एंजेला मर्केल कार्यकालया अन्त्य यानादी । स्कोल्जयात फेडरल डेमोक्रेटिक व ग्रीन पार्टीं समर्थन याइगु जूगु दु ।
जर्मनीलिसें मुक्कं युरोप हाकनं कोरोनाया भुमरिइ तक्यंगु इलय् सत्ता कःघायेत थ्यंकादीम्ह स्कोल्ज व सहयात्री दलतयेसं घरेलु समस्या, युरोपेली युनियनया भूमिका व विश्व सम्बन्धया खँय् मंका ज्याझ्व नं सार्वजनिक याःगु दु ।
शरणार्थीत दुगु डुंगा दुर्घटना जुया निगू दर्जन मल्याक सित
कछलागा षष्ठी ११४२, मंसीर ९ बिहीवाः
![](https://www.lahananews.com/sites/default/files/boat.jpg)
बेलायत वनाच्वंपिं आप्रवासी व शरणार्थीत दुगु डुंगा ईङ्लिस च्यानलय् दुर्घटना, निगू दर्जन मल्याक मनूत सित, दुर्घटनायात कयाः बेलायत व फ्रान्सदथुइ आरोप प्रत्यारोप ।
बेलायत दुहाँवने चाहे याःपिं आप्रवासी व शरणार्थीत दुगु डुंगा इङ्लिस च्यानलय् दुर्घटना जूगु दु । दुर्घटनाय् म्ह्वोतीं २७म्ह मनूत सीगु दु । बेलायत व फ्रान्स छुटे याइगु समुद्री च्यालनय् डुंगा दुर्घटना जूगु विषययात कयाः निगू देय्दथुइ आरोप प्रत्यारोप यानाच्वंगु दु ।
एटलान्टिक महासागरया उगू च्यानलया लः तुलनात्मक रुपय् शान्त जूगु अवस्थाय् न फ्रान्सया समुन्द्र सिथय् डुंगा दुर्घटना जूगु खः । डुंगाय् यक्व मनूत च्वनाः यात्रा यानाच्वंगु जुयाः दुर्घटना जूगु प्रारम्भिक धलखं क्यंगु दु ।
दुर्घटनाया खबर चूलाःगुनाप बेलायत व फ्रान्सं मंका कथं हेलिकप्टर छ्यलाः उद्धारया कुतः याःगु खः । दुर्घटनाय् लानाः सीपिं मध्ये मिसा व मस्त न दु । इपिं मध्ये छम्ह अफगानिस्तानय् बेलायती फौजनाप ज्या यानाच्वंम्ह अफगान सैनिक जूगु सीदत ।
अन्तर्राष्ट्रिय आप्रवासन संगठनं इङ्लिस च्यानलय् आप्रवासीतय्गु आःतकया दकले तःधंगु दुर्घटना जूगु धागु दु । थुगुसिइ चिचिग्वःगु डुंगाय् च्वनाः ईङ्लिस च्यानल पार याइपिनिगु ल्या अप्वःगु दु ।
मानव तस्करतय्सं आप्रवासीतय्त असुरक्षित ढंगं समुद्री लँपुमार्फत मेमेगु देशय् छ्वयेगु यानाच्वंगु छगू अध्ययनं क्यंगु दु ।