टर्कीइ तःजिक्क वा वःगुलिसे धाकुफय् वयाः ४म्ह मनूत मन्त ।

दक्षिणी तट धाकुया हुनिं उगू थाय् प्रभावित जूगु दु । प्रतिघण्टा ८१गू माइलया रफ्तारय् वःगु धाकुं राजधानी इस्तानबुलनाप शहरया यक्व धइथें सडक अवरुद्ध जूगु दुसा छेँ न दुनावःगु दु ।

थ्वहेदथुइ सलंसः सवारीसाधनय् क्षति जूगु दु । थाय् थासय् सिमा ग्वःतुलाः यातायात सेवा तकं अवरुद्ध जूगु दु । आः वयाः सलंसःया ल्याखय् उद्धारकःमितय्त परिचालन याःगु दु ।

धाकुफसं प्रभावित जूपिन्त सुरक्षित थासय् यंकेगु ज्या न न्ह्याःगु दु । छुं दिंनिसें मदिक्क वा वःगुनाप धाकुफय् वयाःच्वंगुलिं सर्वसाधारण मनूतय्त सचेत जुइत इनाप याःगु दु ।

अफगानिस्तानय् तालीवानतय्सं सछिम्ह पुलांपिं सेना, प्रहरीनाप खुफिया अधिकारीतय्त स्याःगु खुलासा जूगु दु ।

छुंया ल्याखय् मनूतय्त बेपत्ता याःगु दु । मानव अधिकारया क्षेत्रय् ज्या याइगु पुचलं वंगु अगष्टय् अफगानिस्तानय् सत्ता परिवर्तन जूगु थुखय् तालिवानतय्सं सछिम्ह पुलांपिं सुरक्षाकःमितय्त स्याःगु दाबी याःगु दु ।

सत्ता कब्जा याःगुनाप पुलांपिं सेना, प्रहरी व खुफिया अधिकारीतय्त आममाफी बीगु घोषणा याःसां इमित तालिवानतय्सं स्याःगु रिपोर्टय् उल्लेख याःगु दु । वंगु अगष्ट १५ तारिखनिसें अक्टोबर ३१ दथुइ इमित स्याःगु धागु दु ।

नांगरहार प्रान्तया राजधानी जलालाबादय् ८घौतक गोलाबारी यानाः इमित स्याःगु धयातःगु दु । तालिवानतय्सं इस्लामिक स्टेट समर्थकतय्त निशाना दयेकाः आक्रमण याःगु न रिपोर्टय् उल्लेख याःगु दु ।

पुलांपिं सेना व प्रहरीतय्त स्याःगु घटनां अफगानिस्तानय् आतंक न्यंगु दु । थ्वहेदथुइ अमेरिकां अफगानिस्तानया स्यनाच्वंगु लकसयात ध्यानय् तयाः पाकिस्ताननाप नेटोय् दुथ्याःगु देय्नाप गठबन्धनया कुतः यानाच्वंगु दु ।

अमेरिकाया मिशिगन राज्यय् छगु विद्यालयय् अन्धाधुन्ध गोली प्रहार जुगुलि स्वम्ह विद्यार्थीपिनिगु ज्यान वंगु दु।

सीपि १६, १४ व १७ दँ दुपि खः। ज्यान वःपिनिगु म्हसिका खुले जुगु दु। अथेहे उगु हमलाय् छम्ह शिक्षकनाप च्याम्ह घाइते जुगु दु।

घटनाय् संलग्न जुगु आशंकाय् प्रहरीं १५ दँ दुम्ह छात्रयात ज्वंगु दु। आक्रमण छाय् व छु उद्देश्यया लागि जुगु दु धका सिइमदुनि।

दक्षिण कोरियाय् न कोभिड–१९ या न्हुगु भेरियन्ट ‘ओमिक्रोन’ पिहावंगु दु।

कोरिया रोग नियन्त्रण व रोकथाम एजेन्सी (केडिसीए)या कथं आःतक नाइजेरियापाखे दक्षिण कोरिया वःपि निम्हतिपुयाके उगु न्हुगु भेरियन्ट ओमिक्रोन खनेदुगु खः।

कोरोनाविरुद्धया खोप निगु मात्रा कायेधकुपि उपि निम्हतिपू नोभेम्बर १४ निसे २३ तारिखतक नाइजेरिया भ्रमणय् वःगु खः।

उपि निम्ह कोरिया दुहावयेव परीक्षण यागुलि ओमिक्रोन खने दुगु खः।

अमेरिकी राष्ट्रपति जो बाइडेनं कोरोनाया न्हूगु भेरिएन्ट ओमिक्रोन खनेदुगु चिन्ताया बिषय जूसां आतंकित जुइम्वाःगु धयादीगु दु ।

उत्तर अमेरिकाय् थ्व भेरिएन्ट खनेदयेधुंकाः ह्वाइटहाउसय् सम्बोधन यासें बाइडेनं अमेरिकाय् तत्काल लकडाउन मयायेगु स्पष्ट यानादिल । थ्व भेरिएन्ट अमेरिका दुहांवइगु निश्चित जूगु धासें वय्कलं सकल नागरिकयात कोरोनाबिरुद्धया बुस्टर डोज कायेत नं इनाप यानादिल ।

सम्बोधनया हे झ्वलय् बाइडेनं अमेरिकी खोप कम्पनीतय्सं माःगु योजनात तयार यानाच्वंगु नं स्पष्ट यानादिल । अमेरिकां वंगु वालय् अफ्रिकी देय् दक्षिण अफ्रिाकालिसें मेगु ६ राष्ट्रयात यात्रा प्रतिबन्ध तयेधुंकूगु दु । बाइडेनं प्रतिबन्धया दथुइ ओमीक्रोनबारे तँसा अध्ययन अनुसन्धान यायेगु ई दइगु धासें आम नागरिकयात सचेत जुयाच्वनेत इनाप यानादीगु दु ।

थुखे अष्ट्रेलियां कोरोनाया न्हूगु भेरिएन्ट ओमिक्रोनया संक्रमण जुइफुगु धासें निवाःया लागिं सीमानाका बन्द यायेगु निर्णय याःगु दु । गुकिया तप्यंक लिच्वः नेपालीलिसें मेगु देय्या बिद्यार्थीतय्त लाःगु दु । अष्ट्रेलियाया प्रधानमन्त्री स्कट मरिसनं डिसेम्बर १ निसें बिदेशी बिद्यार्थीयात दुहांवयेके मबीगु निर्णय नं याःगुलिं अष्ट्रेलिया अध्ययनया लागिं वनेगु तयारी याःपिं अलपत्रय् लाःगु दु । आःया निर्णय कथं उपिं डिसेम्बर १५ तक्क अष्ट्रेलिया वनेदइमखु ।

अथेहे बेलायतय् नं कोरोनाया न्हूगु भेरियन्ट ओमिक्रन खनेदय्धुंकाः थौंनिसें अन कडाई न्ह्याकूगु दु । वंगु शनिबाः पत्रकार सम्मेलन यासें प्रधानमन्त्री बोरिस जोन्सनं मेगु देशं बेलायत वइपिं सकसिगु पिसिआर टेस्ट अनिवार्य जुइगु धयादिल । न्हूगु नियम कथं बेलायतं थःगु देशय् दुहांवइपिं हरेक देय्या यात्रुं प्यासेन्जर लोकेटर फर्मया लिसें अनिवार्य रुपं ४८ घौ दुनेया पिसीआर टेष्ट नं बुक याःगु जुइमाः ।

पिसीआर टेष्ट बुक मयाःसे वःपिं यात्रुयात बेलायत दुहां वनेबीमखु सा तत्काल द्वःछि पाउण्ड बं पुइकी । थ्वयां न्ह्यः, बेलायत दुहांवइपिं यात्रुतय्सं निन्हुगु दिनय् ¥यापिड टेष्ट जक याःसा गाःगु खः । न्हूगु नियमं बेलायत दुहांवइपिन्त छुं मछिनीगु जूसां संक्रमण नियन्त्रणया लागिं थ्व पलाःयात उपयुक्त धाःगु दु ।