उर्जाया लागिं ह्यंग्वाःया छ्यलाबुला क्वकायेत हलिंया देय् सहमत
कौलागा त्रयोदशी ११४१, कात्तिक १७ बुधबाः
![](https://www.lahananews.com/sites/default/files/koila.jpg)
इन्धनया लागिं ह्यंग्वः दक्कले अप्वः छ्यलीगु पोल्याण्ड, भियतनाम, चिली, क्यानडालिसेंया ४० देशं जैविक इन्धनया छ्यलाबुला क्वकायेत प्रतिवद्धता प्वंकूगु दु ।
स्कटल्याण्डया ग्लास्गो शहरय् न्ह्यानाच्वंगु जलवायु ह्यूपाः सम्मेलनय् ब्वति कयाच्वंगु देय्तमध्ये ह्यंग्वलाय् आधारित उर्जा उत्पादक छुं मूख्य देय्तलिसें लकस संरक्षणय् क्रियाशील सच्छि व ९० संघ संस्थातय्सं प्रतिवद्धतापतिइ ल्हाःचिं तःगु खः ।
तर अष्ट्रेलिया, भारत, चीन व अमेरिका थुज्वःगु ह्यंग्वालय् अप्वः निर्भर देय्त धाःसा उगु प्रतिवद्धतां तापाःनि । सहमतिइ ल्हाःचिं तःगु देय्तय्सं स्वदेश वा विदेशय् कोइलाय् आधारित उर्जा उत्पादनया आयोजनाय् लगानी मयायेगु प्रतिवद्धता नं प्वंकूगु दु ।
उमिसं सन् २०३० तक्कय् मूख्य अर्थतन्त्र व सन् २०४० तक्क गरीब अर्थतन्त्रया लागिं कोइला उर्जा मदयेकेगु नं न्ह्यथंगु दु । उगु सम्झौताय् ४० देय्या हस्ताक्षर दुसा लकस संरक्षणय् क्रियाशील संघसंस्थातलिसें सच्छि ९०म्हेसिया ल्हाःचिं दु ।
चीनलिसें प्रदुषणय् मूख्य भूमिका दुगु देय्तय्गु प्रतिवद्धता मवःतल्ले धाःसा जलवायु ह्यूपाः पनेगु अभियान ताःलायेमफइगु धासें अभियानकःमितय्सं चिन्ता प्वंकूगु दु ।
उकीसनं चिकं व ग्याँसया छ्यलाबुला क्वकायेगु पाखे नं छुं ठोस पलाः न्ह्याकेत सम्मेलन असफल जूगु दु ।
काबुलयात सैन्य अस्पतालय् विष्फोट, २०म्ह मन्त
कौलागा त्रयोदशी ११४१, कात्तिक १७ बुधबाः
![](https://www.lahananews.com/sites/default/files/kabul_1.jpg)
अफगानिस्तानया राजधानी काबुलया छगू सैैनिक अस्पतालय् याकूगु विस्फोट व हतालय् लानाः २०म्ह मन्त ।
काबुलस्थित सर्दार खान सैनिक अस्पतालय् याकूगु विस्फोटय् लानाः मेपिं १६ घाःपाः जूगु दु । अस्पताल पिने विस्फोट याकेधुंकाः बन्दुकधारीत अस्पताल परिसरय् दुहांवःगु खः ।
आक्रमणया भाला अतिवादी मुस्लिम पुचः इस्लामिक स्टेटलिसे आबद्ध आईएस–कें काःगु दु । विस्फोट धुंकाः घटनास्थलय् कुँत्याः पिहांवःगु भिडियो सामाजिक संजालय् वःगु खः ।
निगू विस्फोटमध्ये छगू आत्मघाती याःगु अस्पतालया डा.सहिद अहदं जानकारी बियादिल । तालिबानं राजधानी काबुल कब्जा यायेधुंकाः आईएसं अफगानिस्तानय् हिंसात्मक हताः यानावःगु दु ।
रुस व चीनया राष्ट्रप्रमुख जलवायु सम्मेलनय् दुमथ्यायेधुंका अमेरीकी राष्ट्रपतिपाखें कुँख्यना
कौलागा द्धादशी ११४१, कार्तिक १६ मंगलवाः
![](https://www.lahananews.com/sites/default/files/biden_8.jpg)
अमेरिकी राष्ट्रपति जो बाइडेनं चीन व रुसया कुँख्यनादीगु दु । बेलायतया ग्लास्गोय् न्ह्यानाच्वंगु जलवायु सम्मेलनय् दुमथ्यागु धका राष्ट्रपति बाइडेनं चीन व रुसया तच्वकं कुँख्यनादीगु खः ।
सम्मेलनयात सम्बोधन यासें राष्ट्रपति बाइडेनं चीन व रुसया राष्ट्रप्रमुख दुमथ्यागु धका कुँख्यनादीगु खः । वयेकलं जलवायु हिउपाया मुद्दा विश्वव्यापी चिउताया विषय जूसा नं चीन व रुसं उकियात प्राथमिकताय् मतःगु टिप्पणी यानादील ।
हलिंमय् दक्वःलय् अप्वः उत्सर्जन याइगु देय् चीन जूगु धका बाइडेनं निगुलिं देशं थःपिनि प्रतिनिधि जक सम्मेलनय् छ्वयाहःगु धका तँ प्वंकादीगुृ खः । थ्वहे नोभेम्बर १४ तक्क न्ह्याइगु सम्मेलनय् सच्छि व २०गू सिवें अप्वः देय्या नेतातये ब्वति दुथ्यागु दु ।
चीनलिपा कार्बन उत्सर्जन याइगु देशय् अमेरिका व रुस युरोपियन युनियनलिपा ५गूगु थासय् भारत दु । सम्मेलनय् हलिंया नेतातयेसं थ्वयान्ह्यः हे सन् २०३० तक्क वन विनासया अन्त्य यायेगु घोषणा यायेधुंकुगु दु ।
कोप–२६ : सन् २०३० तक वन फडानी नियन्त्रण यायेगुलिइ सहमत
कौलागा द्धादशी ११४१, कार्तिक १६ मंगलवाः
![](https://www.lahananews.com/sites/default/files/cop%2026.jpg)
जलवायु हिउपा सम्बन्धी विश्व सम्मेलन थौंनिसें स्कटल्याण्डय् न्ह्याइगु
कौलागा दशमी ११४१, कात्तिक १४ आइतबाः
![](https://www.lahananews.com/sites/default/files/cop_1.jpg)
जलवायु हिउपा सम्बन्धी विश्व सम्मेलन (कोप–२६) थौं निसें स्कटल्याण्डया ग्लास्गोय् न्ह्यायेत्यंगु दु ।
सम्मेलन नोभेम्बर १२ तक्क न्ह्यायेत्यंगु खः । सम्मेलनय् हलिंया राष्ट्रप्रमुख, सरकार प्रमुख, सरकारी प्रतिनिधित, विषय विज्ञ, नागरिक समाज, व्यवसायिक क्षेत्र व सञ्चार माध्यमया प्रतिनिधित लिसें द्वलंद्वःम्ह मनूतय् ब्वति दुथ्यायेत्यंगु दु ।
कोप २६ अन्तर्गत हलिंया नेतातये शीर्ष सम्मेलन कन्हय् व कंसः जुइत्यंगु दु । सम्मेलनय् जलवायु सम्बन्धी थी थी समस्या व ज्यंकेगुया कुतःया खँय् सहलह जुइत्यंगु दु । हलिंया नेतातयेसं पृथ्वीयात भविष्यय् नं जीवनयोग्य दयेकेत गुकथंया पलाःत न्ह्याकेगु धइगु सकसिया चिउताया विषय जूगु दु ।
कोपया लक्ष्य सफलतापूर्व चूलाकेत व जलवायु हिउपालिसे ल्वायेत शीर्ष नेतातयेसं स्यल्लागु योजना व विश्वसनीय योजनात दयेकेगु अपेक्षा याःगु दु । सन् २०१५ य् फ्रान्सया पेरिसय् जूगु सम्मेलनं क्वजिउगु लक्ष्यत थुगु सम्मेलनं छुं परिमार्जन याइगु ताकं याःगु दु ।
सम्मेलनय् नेपाःया पाखें प्रधानमन्त्री शेरबहादुर देउवा दुथ्यानादी ।