ल्याटिन अमेरिकी देय् चिलीया राष्ट्रपतिइ ३५दँया गेब्रियल बोरिक निर्वाचित जुयादीगु दु ।

थः लिक्कसंया प्रतिद्वन्दी जोसे एन्टोनियो कास्टयात बुका बोरिक राष्ट्रपतिइ निर्वाचित जुयादीगु खः । लिपांगु मत लिच्वः कथं बोरिकं ५६गू प्रतिशत मत चूलाकुबलय् कास्टया पक्षय् ४४गू प्रतिशत जक मत लाःगु खः ।

चिलीइ सरकार बिरुद्ध जूगु तःधंगु ब्वज्यालिपा राष्ट्रपतिय पदया निर्वाचन जूगु खः । बोरिक हलिंया हे कान्छाम्ह राष्ट्रपति मध्येया छम्ह जूगु धाःगु दु ।

बिद्यार्थी आन्दोलनपाखें न्ह्योने वःम्ह बोरिकं आन्दालनया हे झ्वलय् चिलीइ स्थिर अर्थब्यबस्था अवलम्बन जुइगु वचं बियादीगु खः ।

चिलीइ राष्ट्रपति पदया नितिं थ्वखुसिइ जूगु निवाचनय् आःतक्कया सरकारी पद धारण मयाःपिं निम्ह बिद्यार्थी नेतात बोरिक व कास्ट दथुइ धेंधेंबल्ला जूगु खः ।

अमेरिकी सरुवा ल्वयेय् बिशेषज्ञ डा.एन्थोनी फाउचीं क्रिसमस नखः हनेगु झ्वलय् ओमिक्रोन भेरिएन्टं महामारीया रुप कायेफइगु ख्याच्वः बियादीगु दु ।

ह्वाइट हाउसय् सञ्चारकर्मीतयेलिसेया साक्षात्कारय् वयेकलं कोरोना बिरुद्धया खोप काःपिं नं थुगु भेरिएन्टपाखें तापाये मफइगु धका सावधानी नालेत बिश्व समुदाययात तकं अपील यानादील ।

कोरोना भाइरसं उत्परिवर्तन जुया वःगु थुगु न्हूगु भेरिएन्ट कडा कथंया जूगु हुनिं थुकिं ग्यानापूगु स्थिति हयेफइगु दाबी नं वयेकलं यानादीगु दु ।

अनुसन्धानकर्तातयेसं बुस्टर डोज काःपिन्त संक्रमण न्युन जुइगु धयाच्वंगु इलय् फाउचीं धाःसा ओमिक्रोनया संक्रमण ग्यानापूगु जुइफइगु ख्याच्वः बियादीगु खः ।

ओमिक्रोन उले घातक मजूगु धइगु दुस्प्रचारय् भलसा मयायेत धासें वयेकलं अमेरिकालिसें हलिंयंकया अस्पतालत खचाखच जायेफइगु धयादील ।

थ्वहे दथृुइ, क्रिसमयात विचाः याना युरोपेली देय्तयेसं धाःसा धमाधम निषेधाज्ञा तयेगु झ्व अप्वयेकुगु दु ।

फिलिपिन्सय् वःगु विध्वंशकारी धाकुफसये लाना ७०म्ह सिवें अप्वः सीगु दु ।

धाकु फसय् आपालं तनाच्वंगु जुइफइगु शंका याःगु दु । टाइफुन राई नाँया धाकुफसं मध्य लिसें दक्षिणपूर्वी टापुइ तःधंगु क्षति याःगु बीबीसीं न्ह्यथंगु दु ।

सच्छि व ९५गू किलोमिटर प्रति घौया रफ्तारय् वःगु धाकु फसं सिमा क्वथःगु लिसें आपालं भौतिक संरचनाय् क्षति याःगु दुुसा विद्युत आपुर्ती बन्द जूबलय् करिब ३० गू लख मनू लिच्वःलय् लाःगु दु ।

घटना लागाय् खोज तथा उद्दारया नितिं १८द्वःम्ह सुरक्षाकर्मी व आपतकालिन कर्मचारीत परिचालन याःगु दु । सियारगाओ व सुरिगाओ क्षेत्रय् सञ्चार बन्द जूबलय् उद्वारय् थाकुगु धाःगु दु ।

टाइफुन राई आः पश्चिमी क्षेत्र जुया चीनपाखे अझ तच्वगु गतिं न्ह्यानावंगुलिं सचेत जुइत अधिकारीतयेसं इनाप याःगु दु । थुगु धाकु फये थुगुसिइया हे दक्वःलय् शक्तिशाली धाकु फये जूगु धाःगु दु ।

सरकारी अधिकारीतये कथं फिलिपिन्सय् दँय्दसं  औषतय् २० गू धाकु फये वयेगुृ याः ।

यहुदीतयेसं पश्चिमी गाजाया तटीय क्षेत्रय् हःताः याःगु दु । विद्रोहीतये हःताःपाखें स्थानीयत विस्थापित जूगु प्यालेस्टाइनी अधिकारीतयेसं न्ह्यथंगु दु ।

प्यालेस्टाइनी बन्दुकधारीतयेसं इजरायलीतयेत गोली कयेका स्यागु लिसें उगु क्षेत्रय् यहुदीतयेसं हःताः जूगु बुखँय् न्ह्यथनातःगु दु । आक्रमणकारीतयेसं उगु क्षेत्रय् हिंसा न्यंकेत स्वगु धका अधिकारीतयेसं चिउता तकं प्वंकुगु दु ।

उगु क्षेत्रय् दूगु शरणार्थी शिविरया अनुगमन याःपिं प्यालेस्टाइनी प्राधिकरणया अधिकारीतयेसं उत्तरी सशर नाब्लस लिक्कसंया प्यालेस्टाइनी गाँमय् हःताः जूगु पुष्टि याःगु दु  ।

उमिसं सर्वसाधारणया निजी आवासय् क्षति याःगु लिसें सार्वजनिक सम्पति नं स्यंकुगु बुखँय् न्ह्यथनातःगु दु । प्यालेस्टाइनी वाफा समाचार एजेन्सीया कथं सेबास्टिया सहर व उत्तरी नाब्लसय् न्ह्योनेलाथें हःताः जूबलय् निजि सम्पतिइ क्षति जूगु दु ।

अथेहे सर्वसाधारणया सवारी ज्वलंनय् नं क्षति जूगु धाःगु दु । प्रहरीं हःताःलय् दुथ्यागु आशंकाय् निम्हसित ज्वंगु धाःगु दु । सन् २००५ य् गाजापट्टीइ जूगु ल्वापुइ ताः ई हिंसा न्यंगु खः  ।

सन् १९६७ या मध्यपूर्व युद्धय् इजरायलं पूर्वी जेरुसेलम व वेस्ट बैंक कब्जाय् काःगु खः ।

क्यारेबियन देय् डोमिनिकन रिपब्लीकय् निजी विमान दुर्घटना जूबलय् ९ म्ह सीगु दु ।

डोमिनिक रिपब्लीकया राजधानी सान्टो डोमिन्गोपाखें अमेरिकाया फ्लोरिडाया नितिं ब्वःगु विमानय् समस्या वयेधुंका आपत्कालिन अवतरणया झ्वलय् दुर्घटनाय् लाःगु खः ।

‘ला इजाबेला’ एयरपोर्टं ब्वःगु १५गू मिनेटय् हे विमानय् समस्या वयेधुंका लिक्कसंया ‘लास अमेरिकाज’ एयरपोर्टय् अवतरणया कुतः याःगु खः । उगु हे झ्वलय् दुर्घटना जूबलय् ६म्ह विदेशी लिसें छम्ह डोमिनिकन यात्रु व चालक दलया निम्ह दुजः मदूगु वायुसेवा कम्पनी हेलीडोसा एभिएसन ग्रुपं न्ह्यथंगु दु ।

सीपिं ६ म्ह विदेशी यात्रुतये राष्ट्रियता व म्हसिका ध्वाथुइकुगु मदु ।