खराब मौसम व कोरोनाया हुनि ४द्वः उडान रद्द
थिंलागा पञ्चमी ११४२, पुस १८ आइतबाः
![](https://www.lahananews.com/sites/default/files/cancelled.jpg)
खराब मौसम व कर्मचारीत कोरोना संक्रमित जूगु हुनिं शनिबाः छन्हूं हे हलिंयंक ४४ सः हवाई उडान रद्द जूगु दु ।
उगु मध्ये अमेरिकाय् जक २५सः उडान रद्द जूबलय् द्वलंद्वः यात्रु अलपत्र जूगु दु । थी थी विमान कम्पनीया चालक दलया दुजः लिसें मेपिं कर्मचारीत कोरोना संक्रमित जूगु हुनिं कर्मचारी अभावया हुनिं उडानत रद्द जूगु धाःगु दु ।
अथेहे अमेरिकाया थी थी थासय् तच्वकं च्वापुं गाःगुलिं नं उडान रद्द जूगु दु । उडान रद्द जुइधुंका न्हू दँ व क्रिसमस हनेत थी थी देयया भ्रमणय् वंपिं बिमानस्थलय् हे अलपत्र जूगु दु ।
वंगु डिसेम्बर २४ निसें आःतक्क १२द्वः उडानत रद्द जुइधुंकुगु दु । बिमान कम्पनीया कर्मचारीतयेत कोरोनाया न्हूगु भेरिएन्ट ओमिक्रोन संक्रमण जूगु हुनिं आइसोलेशनय् दूगु बिमान कम्पनीतयेसं न्ह्यथंगु दु ।
पुटिन व बाइडेन दथुई टेलिफोन वार्ता
थिंलागा द्वादशी ११४२, पुष १६ शुक्रबाः
![](https://www.lahananews.com/sites/default/files/BIDEN.jpg)
रुसी राष्ट्रपति भ्लादिमिर पुटिनं युक्रेनया विषययात कया रुसय् न्हूगु नाकाबन्दी तःसा अमेरिकालिसेया स्वापू पूवंक हे विच्छेद जुइगु ख्याच्वः बियादीगु दु ।
अमेरिकी राष्ट्रपति जो बाइडेनलिसे म्हिगः जूगु टेलिफोन खँल्हाबल्हाय् पुटिनं अज्यागु पलाः तःधंगु द्वंका जुइगु धयादीगु क्रेमलिनया प्रवक्तां न्ह्यथंगु दु । तर बाइडेनलिसेया संवाद सन्तोषपूर्ण दूगु नं क्रेमलिनया प्रवक्ता युरी युसाकोभया धापू दु ।
५०गू मिनेट ताः ईया टेलिफोन संवादया झ्वलय् अमेरिकी राष्ट्रपति बाइडेनं युक्रेनयात हताः जूसा अमेरिका व उमिगु सहयात्री देय्तयेसं निर्णायक लिसः बिइगु धयादीगु खः ।
युक्रेनया पूर्वी सिमा क्षेत्रय् रुसं १ गू लख अप्वः सेना तैनाथ यायेधुंका रुस व अमेरिका लिसें पश्चिमा देय्तये दथुइ तनाव तच्वयावंगु दु ।
रुसं धाःसा युक्रेनयात हताः यायेगु छुं नं योजना मदूगु धका थःगु भूमि रक्षाया नितिं युक्रेनया सिमानाय् सेना तैनाथ जूगु तर्क यानावःगु दु ।
बाइडेन व पुटिन दथुइ खँल्हाबल्हा तसकं गम्भीर व अर्थपूर्ण खनेदूगु अमेरिकी अधिकारीतयेसं धाःगु दु । खँल्हाबल्हा लिपा ह्वाइटहाउसया प्रेस सचिव जेन पास्कीं तनाव म्हो यायेत रुसं छु याइ धइगु विषयलं न्ह्योनेया लँपू निर्धारण यायेगु धाःगु दु ।
निगू देय्या अधिकारीतये दथुइ वइगु लाय् जेनेभाय् तप्यंक खँल्हाबल्हा यायेगु तयारी नं जुयाच्वंगु दु ।
युरोप देशय् ओमिक्रोन संक्रमणया सुनामि
थिंलागा एकादशी ११४२, पुष १५ विहीबाः
![](https://www.lahananews.com/sites/default/files/covid_2.jpg)
विश्व स्वास्थ्य संगठनं निगू भेरियन्ट डेल्टा व ओमिक्रोन छक्वःलं न्यंबलय् कोरोना संक्रमणं सुनामीया रुप काइगु ख्याच्वः बिउगु दु ।
संगठनया प्रमुख टेड्रोस ग्याब्रियसं अमेरिका व युरोपय् थुपिं निगू भेरियन्टया संक्रमण गुकथं अप्वःगु दु उकियात सुनामी धयादीगु खः । फ्रान्सय् छन्हूं हे म्हिगः २गू लख ८ द्वः संक्रमित थप जूगु दु ।
अन छन्हूं न्ह्यः जक १ गू लख ८०द्वःम्ह संक्रमित लूगुु खः । अथेहे अमेरिकाय् लिपांगु वाया रेकर्डं न्हिं २गू लख ६५द्वः सिवें अप्वः न्हू विरामीत थप जुइगु याःगु क्यंगु दु ।
अष्ट्रेलिया, पोल्याण्ड, डेनमार्क, पोर्चुगल व बेलायतय् नं संक्रमितपिं न्हियान्हिथं न्हू न्हूगु रकेर्ड दयेकुगु दु । औसतय् आः हलिंमय् न्हिं ९ गू लख सिवें अप्वः विरामी थप जुइगु याःगु तथ्यांक सार्वजनिक जूगु दु ।
संक्रमणया गतिं अथे नं त्यान्हु चायेधुंकुपिं स्वास्थ्यकर्मीतयेत थप दबाब अप्वयेकुगु धका ग्याव्रियसं स्वास्थ्य प्रणाली हे फेल जुइगु ला मखु धइगु ग्याचिकु अप्वयेकुगु धयादील ।
तःमि देय्तयेसं चिमि देय्तयेत खोप चूलाकेगु त्वःता थःपिन्सं बुस्टर डोजय् बः बिउबलय् महामारी विचाः याःगु सिवें ताः ई न्ह्याइगु खनेदूगु वयेकया धापू दु ।
आः नं हलिंया सच्छि सिवें आपा देशं थःगु जनसंख्याया ४०गू प्रतिशतयात खोप बिइ मफूगु डब्लुएचओया तथ्यांक दु । डल्ब्लुएचओ प्रमखुं सन् २०२२ या मध्यतक्क हलिंया ७०गू प्रतिशत मनूयात बिइगु न्हू दँया प्रतिवद्धता न्ह्यनेत हलिंया नेतातयेत आह्वान यानादीगु दु ।
न्हुगु दिल्लीइ कडा प्रतिबन्धया घोषणा
लहनान्युज | थिंलागा दशमी ११४२, पुष १४ बुधवाः
![](https://www.lahananews.com/sites/default/files/ddlli_0.jpg)
ओमिक्रोन संक्रमितपि अप्पोया वनेव मंगलबाःनिसे न्हुगु दिल्लीइ मुख्यमन्त्री अरविन्द केजरीवालं सहरय् कडा प्रतिबन्धया घोषणा याउगु दु।
मुख्यमन्त्री केजरीवालं ५० प्रतिशत अकुपेन्सी सञ्चालन जुयाच्वंगु स्पा, जिम व सिनेमा हल बन्द यायेत निर्देशन बिउगु दु।
५० प्रतिशत अकुपेन्सी हे जूसा ‘सूर्यवंशी’, ‘स्पाइडर–म्यान ः नो वे होम’ व ‘पुष्पा’ संकिपाय् दर्शक तयेत हलय् सालाच्वंगु दु।
दिल्ली सरकार थुगु निर्णयनाप तधःगु बजेटया संकिपा रणवीर सिंहया ‘८३’, शाहिद कपुरया ‘जर्सी’ व राजमौलीया ‘आरआरआर’ यात धासा धक्का लाउगु दु।
हङकङया स्ट्याण्ड न्युजका ६ पत्रकार पक्राउ
थिंलागा दशमी ११४२, पुष १४ बुधवाः
![](https://www.lahananews.com/sites/default/files/hongkong_1.jpg)
हङकङया खुम्ह प्रजातन्त्र समर्थक पत्रकारयात देशद्र्रोहया द्वपनय् ज्वंगु दु ।
हङकङया स्ट्याण्ड न्युज अनलाइनया स्वम्ह मिसा व स्वम्ह मिजं पत्रकारयात नियन्त्रणय् काःगु खः । ज्वंपिंलय् स्ट्याण्ड न्युजया पूर्व बोर्ड दुजः तकं दु ।
उगु अनलाइनं देशद्रोही बुखँत पिथंगु द्वपं हङकङ प्रहरीं ब्यूगु दु । उगु अनलाइनया ज्याकुथिइ छापा मारे यायेत करीब २सः सुरक्षाकःमि परिचालन याःगु धाःगु दु ।
प्रहरीं उगु संचारगृहं महत्वपूर्ण भ्वं तकं नियन्त्रणय् काःगु दु । ज्वंपिं पत्रकारत दोषी प्रमाणित जूसा देशद्रोहया मुद्दा न्ह्याकेगु हङकङ सरकारं न्ह्यथंगु दु ।