युरोपेली देशय् ओमिक्रोन ग्यानापुक्क न्यनाच्वन
थिंलागा दशमी ११४२, पुष १४ बुधवाः
![](https://www.lahananews.com/sites/default/files/omicron.jpg)
युरोपेली देशय् कोरोनाया ओमिक्रोन भेरियन्ट मि थें न्यनावंगु दु ।
संक्रमणं न्हिं न्हिं न्हून्हूगु रेकर्ड दयेकाच्वंगु दु । फ्रान्सय् मंगलबाः छन्हुं हे १ लख ८०द्वः न्हूपिं संक्रमित लूगु दु । गुगु वंगु शनिबाः १ लख ४द्वः दुगु खः ।
बेलायतय् २४ घौ दुने १ लख २८द्वः स्वयां अप्वः संक्रमित लूगु दु । इटली, ग्रीस, साइप्रसलिसेंया मेगु युरोपेली देशय् नं संक्रमणया गति तच्वःगु दु ।
युरोपय् हे दक्कले अप्वः जनतायात खोप ब्यूगु पोर्चुगलय् नं संक्रमण न्हिं न्हूगु रेकर्ड खनेदु । अथे हे, बेल्जियम, नेदरल्याण्ड व रुसय् नं ओमिक्रोन संक्रमणं मिया रुप काःगु दु ।
उखे, अमेरिकाय् नं संक्रमण परीक्षण याकीपिनिगु अप्वयाच्वंगु लाइनं ओमिक्रोनया संक्रमण गुकथं न्यनाच्वंगु दु धइगु छुमा क्यंगु चारमाध्यमतय्सं न्ह्यथंगु दु ।
अमेरिकी राष्ट्रपति जो बाइडेनं परीक्षणयात अभियानया रुपं न्ह्याकेगु धयादीगु दु ।
लिबियाया पश्चिमी तटीय क्षेत्रय् तःधंगु ल्याःखय् आप्रावासीया सीम्ह लुत
थिंलागा अष्टमी ११४२, पुष १२ सोमवाः
![](https://www.lahananews.com/sites/default/files/libiya_0.jpg)
लिबियाया पश्चिमी तटीय क्षेत्रय् तःधंगु ल्याःखय् आप्रावासीया सीम्ह लूगु दु ।
तटीय क्षेत्र खोम्सया समुद्री सिथय् छम्ह मिजं मचा व निम्ह मिसा लिसें २७ म्हसिया सीम्ह लूगु खः । थुकियात लिबियाया इतिहासय् त्रासदीपुर्ण घटनाया रुपय् व्याख्या याःगु दु ।
लूगु सीम्ह अप्वः धैथें ध्वगिगु अवस्थाय् दु । लिबियाय् दँय्दसं आप्राबासीत गइगु लः जहाज तःधंगु भारया हुनिं दुर्घटना जुइगु याःगु दु ।
थ्वहे दथुइ संयुक्त राष्ट्रसंघं लिबियाय् लिपांगु ई लःजहाज दुर्घटना जूबलय् सच्छि व ६०म्ह सीगु न्ह्यथंगु दु । गुकिइ अप्वः धैथें सिरियाली शरणार्थीत लाःगु दु ।
भारतय् ओमिक्रोन भेरियन्टया संक्रमण हुनिं न्हू दिल्लीइ थौंनिसें रात्रीकालिन कफ्र्यू
थिंलागा अष्टमी ११४२, पुष १२ सोमवाः
![](https://www.lahananews.com/sites/default/files/india_11.jpg)
कोरोनाया ओमिक्रोन भेरियन्ट न्यनिगु खतरा अप्वयेधुंका भारतया राजधानी न्हू दिल्लीइ रात्रीकालिन कफ्र्यू तइगु जूगु दु ।
दिल्ली सरकारं थौंनिसें चान्हय् ११ ता ई निसें सुथय् ५ ता ई तक्क कफ्र्यू तयेगु घोषणा याःगु खः । आइतबाः दिल्लीइ २सः व ९० म्ह न्हु संक्रमित लूगु व छम्ह सिइधुंका सरकारं रात्रीकालीन कफ्र्यू तयेगु निर्णय याःगु खः ।
उकिया छन्हू न्ह्यः दिल्लीइ संक्रमितया ल्याः २सः व ४९म्ह खः । संक्रमण दर मदिक्क अप्वयावंगुलिं पूर्व सतर्कता नालेमाःगु अधिकारीतये धापू दु ।
कोभिड १९ सम्बन्धि नीतित क्वजिइगु दिल्ली डिजास्टर म्यानेजमेन्ट अथोरिटीं थ्वयान्ह्यः हे सरकारयात पूर्व सतर्कताया नितिं निर्देशन बिइधुंकुगु खःसा न्हू दँय् छुं नं भीडभाड मजुइगु निश्चित यायेत नं धाःगु दु ।
उत्तरप्रदेश व हरियाणा राज्यं म्हिगः निसें हे रात्रीकालिन कफ्र्यू लागू यायेधुंकुगु दु ।
रूसी अदालतं गुगलयात ९ क्वःति ८० लख जरिबाना पुइकेगु आदेश
थिंलागा षष्ठी ११४२, पुष १० सनिवाः
![](https://www.lahananews.com/sites/default/files/google.jpg)
रूसी अधिकारीतय्सं तःधंगु विदेशी प्राविधिक कम्पनीविरूद्धया कारबाहीयात न्ह्यःने यंकुसें अवैध ज्वलंत चीकेमफूगु द्वपनय् हलिमय् नांजाःगु अमेरिकी कम्पनी गुगलयात बं पुइकीगु जूगु दु ।
मस्कोया छगू अदालतं शुक्रबाः गुगलयात ९ क्वःति ८० लख अमेरिकी डलर ज्वलिंज्वःया बं पुइकेगु आदेश ब्यूगु खः । जरिवानासम्बन्धी उगु खँ अदालतया प्रेस सेवां टेलिग्राममार्फत् जानकारी ब्यूगु खः ।
छुं यूरोपेली देशं थें गुगलं अवैध ज्वलं तःगु धासें आपत्ति क्यनाः थज्याःगु ज्वलं चीकेत दबाव बियावःगु दु । ईन्टरनेट सर्च, क्लाउड कम्प्युटिङ व विज्ञापन ख्यलय् अप्वः लगानी याःगु गुगल संयुक्त राज्य अमेरिकाया छगू बहुराष्ट्रीय सार्वजनिक कम्पनी खः ।
इन्टरनेटय् आधारित बहुसंख्यक सेवा अले उत्पादनया आयोजना विकास यानाः थःगु विज्ञापनिक ज्याझ्वः ‘एडवर्ड्स’ या माध्यमं हे गुगलं लबः मुंकी ।
ओमिक्रोन संक्रमणं क्रिसमसया इलय् हलिंन्यंक यात्रा अवरोध फयेमाल
थिंलागा षष्ठी ११४२, पुष १० सनिवाः
![](https://www.lahananews.com/sites/default/files/arival.jpg)
कोरोनाया न्हूगु भेरियन्ट ओमिक्रोनया हुनिं क्रिसमसया इलय् हलिंन्यंक लखौं मनूतय्सं यात्रा अवरोध फयेमालाच्वंगु दु ।
कोभिड प्रतिबन्ध, अप्वयाच्वंगु ओमिक्रोन संस्करणं सुरक्षा व्यवस्था क्वात्तुकूबलय् तःगु हे अन्तर्राष्ट्रिय उडान रद्द जूगु दु । फ्लाइट अवेयर वेबसाइटया कथं हलिंन्यंक द्वलंद्वः उडान रद्द याःगु दु ।
इटाली, स्पेन व ग्रीसं हाकनं छेँय् नं पिहां वयेबलय् मास्क अनिवार्य याःगु दु । उत्तरी स्पेनया क्याटालोनियां चच्छिया कर्फ्यू तःगु दु । नेदरल्यान्ड्सय् कडा प्रतिबन्धात्मक व्यवस्था जारी याःगु दु ।
ओमिक्रोन मेगु भेरियन्ट स्वयां हल्का धइगु प्रारम्भिक लिच्वःया दथुइ वैज्ञानिकत संक्रमिततय् बढ्दो ल्याखं चिन्तित जुगु दु । बिहीबाः बेलायत, फ्रान्स व इटालीइ संक्रमणया न्हूगु रेकर्ड कायम जूगु दु ।
अमेरिकाय् न्हिंया ओमिक्रोन केस लिपांगु डेल्टा लहरया चरम सीमा स्वयां नं अप्वःगु दु । देय्न्यंकया अस्पतालय् विरामीं जाःगु दु ।
अमेरिकाया शीर्ष संक्रामक रोग विशेषज्ञ, डा एन्थोनी फाउचीं क्रिसमस यात्रां पूर्ण खोप काःसां कोरोनाया संक्रमण फैलावटयात पनेमफइगु चेतावनी ब्यूगु दु ।
क्रिसमसया पूर्वसन्ध्याय् अमेरिकन एयरलाइन्सं चालक दलया दुजःतय्त यायेमाःगु कोरोना परीक्षणं कर्मचारी अभावया स्थितिं पीडित जुइमाःगु धाःगु दु ।
अष्ट्रेलियाय् नं शुक्रबाः नखःचखःया यात्राय् द्वलंद्वःया ल्याखय् लिच्वः लाःगु दुसा सिड्नी व मेलबर्नं मेगु सहरया सच्छि स्वयां अप्वः आन्तरिक उडान रद्द जूगु दु ।