बेलयतय् कोरोना महामारीया नितिं तःगु प्रतिबन्ध छ्वासुकल
थिंलागा तृतीया ११४२, पुस २१ बुधबाः
![](https://www.lahananews.com/sites/default/files/iukk.jpg)
बेलयतय् कोरोना महामारीया नितिं धका तःगु प्रतिबन्ध छ्वासुकिगु जूगु दु ।
बेलायती प्रधानमन्त्री बोरिस जोन्सनं डाउनिङ स्ट्रीट ब्रिफिङया झ्वलय् प्रतिबन्धत छ्वासुका हे कोरोना नियन्त्रण याये फइगु अवस्था दूगुलिं प्रतिबन्धत छ्वासुकेगु घोषणा यानादीगु खः ।
आम मनूयात छेँ नं हे ज्या यायेगु व्यवस्था व मास्क अनिवार्य जूगु वयेकलं धयादील । देशय् ओमिक्रोन संक्रमण दर उच्च दूगु नालाकासें वयेकलं प्रतिबन्ध छ्वासुकिबलय् छुं हदतक्क असहज महशुष जूसा नं आःयात प्रतिबन्ध छ्वासुकेगु निर्णय जूगु धयादील ।
बेलायतय् वइगु १० जनवरी निसें न्हियान्हिथं १गू लखया दरं कोरोना परिक्षण यायेगु घोषणा नं प्रधानमन्त्री जोन्सनं यानादीगु दु ।
गुकिइ खाद्य् प्रशोधन, यातायात व उद्योग धन्दाय् ज्या यानाच्वंपिं कर्मचारीतयेत प्राथमिकताय् तःगु दु ।
कोरोना संक्रमण अप्वःसेंलि भारतय् वालय् निन्हू कफ्र्यू
थिंलागा तृतीया ११४२, पुस २१ बुधबाः
![](https://www.lahananews.com/sites/default/files/india_12.jpg)
भारतीय राजधानी न्हू दिल्लीइ वालय् २ न्हू शनिबाः व आइतबाः कर्फ्यू तयेत्यंगु दु । कोरोना संक्रमण अप्वःगुलिं न्ह्याकुगु रात्रीकालीन कफर््यु जारी दूगु हे इलय् वालय् २ न्हू पूवंक कफर््यु तयेगु निर्णय जूगु खः ।
भारतय् न्हूगु भेरियन्ट ओमिक्रोन न्यंगु लिसें कोभिड संक्रमितया ल्याः छक्वःलं अप्वःगु दु । म्हिगः तक्क भारतयंक द्वःछि व ७ सःम्हसिके ओमिक्रोन खनेदूगु खः ।
थ्वहे दथुइ कोभिड सक्रमणया जोखिम कायम हे दूगुलिं सार्वजनिक यातायातय् यात्रा यायेबलय् मास्क मतयेकं यात्रा याये मदइगु नियमयात कडाइलिसें लागू याःगु दु ।
अथेहे सरकारं निजी ज्याकुतयेत नं ५०गू प्रतिशत कर्मचारीं ज्या न्ह्याकेत धाःगु दु । ५०गू प्रतिशत कर्मचारीयात बिदा बिइत वा छेँ नं ज्या यायेगु व्यवस्था यायेत निर्देशन बिउगु दु ।
वंगु वालय् मेट्रोरेल व बसयात क्षमताया ५०गू प्रतिशत जक यात्रु तयेत धाःगु खःसा ब्वनेकु व कलेजत बन्द यायेधुंकुगु दु ।
हेइटीया कार्यबाहक राष्ट्रपतियात गोली कयेका स्यायेगु कुतः
थिंलागा द्वितिया ११४२, पुस २० मंगलबा
![](https://www.lahananews.com/sites/default/files/haitee_1.jpg)
क्यारेबियन देय् हेइटीया कार्यबाहक राष्ट्रपति एरिएल हेन्रीयात गोलीं कयेका स्यायेगु कुतः जूगु दु ।
वंगु शनिबाः राष्ट्रिय स्वतन्त्रता दिवसया लसताय् ग्वसाःग्वःगु ज्याझ्वलय् कार्यबाहक राष्ट्रपति हेन्रीयात स्यायेगु कुतः जूगु खुलासा जूगु खः । उत्तरी शहर गोनाइवेसस्थित छगू चर्चय् जूगु ज्याझ्वलय् दुथ्याम्ह हेन्रीयात आपराधिक पुचःलं गोलीं कयेकुगु खः ।
हेन्री व वयेकया अंगरक्षकत गाडीपाखे ब्वाये वनाच्वंगु लुँ सार्वजनिक जूगु खः । घटनाय् सुरक्षाकमीतयेसं कयेकुगु गोलीं लाना १म्ह सीगु दुसा २म्ह घाःपाः जूगु दु । वंगु जुलाई ७ य् हेइटीया राष्ट्रपति जोबेनल मोइजयात थःगु हे निवासय् स्यागु खः ।
मोइजया सरकारय् प्रधानमन्त्री दूम्ह हेन्री मोइजया हत्यालिपा कार्यबाहक राष्ट्रपति जूगु खः । मोइजया हत्या याःगु आपराधिक पुचःलं हे हेन्रीया नं हत्याया कुतः याःगु विश्वास याःगु दु ।
तर घटनाया भाला धाःसा आःतक्क सुनांनं काःगु मदुनि । कार्यबाहक राष्ट्रपति हेनरीं आपराधिक पुचःयात न्हंकेगु प्रतिवद्धता न्ह्यथनावयादीगु दु ।
घटना सार्वजनिक जुइधुंका कार्यबाहक राष्ट्रपतिया ज्याकुथिं नं आतंकवादी पुचःलं हत्याया कुतः याःगु न्ह्यथंगु दु ।
दक्षिण अफ्रिकाया संसद् भवनय् मिं नल
थिंलागा प्रतिपदा ११४२, पुस १९ सोमबाः
![](https://www.lahananews.com/sites/default/files/south%20africa.jpg)
दक्षिण अफ्रिकाया संसद् भवनय् मिं नःगु दु । देय्या दक्वःलय् पुलांगु व निगूगु तःधंगु शहर केपटाउनय् दूगु दक्षिण अफ्रिकी संसद् भवनय् थौं सुथय् मिं नःगु खः ।
सुरक्षाया नितिं गठन जूगु केपटाउन मेयर कमिटीया दुजः जेपी स्मिथया कथं मिं नःगुया हुनिं पुलांगु एसेम्बली हलया पौ छ्वगु दु व पुलांगु चेम्बरय् नं आपालं क्षति जूगु दु ।
दक्षिण अफ्रिाकी अधिकारीतये कथं मिं नःगुया हुनिं भवनय् तःतःधंगु चिरा बाःगु दु । क्षतिया पूर्ण विवरण वयेत धाःसा ल्यंदनिइ । मिं नःगु संसद्या सभा हलं न्ह्यागु खः ।
संसद भवनय् जडान यानातःगु फायर अलार्मं बाँलाक्क ज्या मयाःगु धाःगु दु । घटनास्थलया स्थलगत अवलोकन यासें राष्ट्रपति सिरिल रामापोसां भवनयु जडान यानातःगु अग्नि नियन्त्रण उपकरणं बाँलाक्क ज्या मयाःगु पत्रकारतयेत जानकारी बियादीगु दु ।
अयेसां अग्नि नियन्त्रक टोली ६गू मिनेट दुने हे घटनास्थल थ्यंका मिं नियन्त्रणय् काःगु धका राष्ट्रपति रामापोसां उमिगु च्वछायादील ।
हलिंया जनसंख्या ७गू अर्ब ८०गू क्वःति थ्यन
थिंलागा प्रतिपदा ११४२, पुस १९ सोमबाः
![](https://www.lahananews.com/sites/default/files/populatin.jpg)
हलिंया जनसंख्या ७गू क्वःति ४०गू लखं अप्वःगु छगू तथ्यांकं क्यंगु दु ।
अमेरिकी तथ्यांक व्यूरोया कथं थ्व लिसें हलिंया जनसंख्या ७ गू अर्ब ८० गू क्वःति थ्यंगु दु । चीन आः नं हलिंया दक्वःलय् अप्वः जनसंख्या दूगु देय् खःसा अनया जनसंख्या १गू अर्ब ४०गू क्वःति दु ।
चीनयात लिनाच्वंगु भारतया जनसंख्या १गू अर्ब ३८गू क्वःति थ्यंगु दु । वइग्ु ३दँ दुने भारतं चीनयात लिउने लाकिगु ताकं दु । व्यूरोया कथं जनसंख्याया दृष्टिं अमेरिका हलिंया हे ३गूगु तःधंगु देय् जूगु दु ।
अमेरिकाया जनसंख्या ३३ गू क्वःति २०गू लख थ्यंगु दु । अमेरिकालिपा इण्डोनेसिया व पाकिस्तान छसिकथं ४गूगु व ५गूगु तःधंगु देय् जूगु दु । इन्डोनेसियाया जनसंख्या २७गू क्वःति ५०गू्र लख दुसा पाकिस्तानया २३गू क्वःति ८० गू लख पुलावंगु दु ।
सन् २०२१ य् हलिंिया जनसंख्या शून्य फुति ९गू प्रतिशतं अप्वःगु खः । मुक्कंलय् हलिंया जनसंख्या अप्वःसा नं बृद्धि दर धाःसा सन् १९६० या मध्य निसें मदिक्क कुहाँवनाच्वंगु दु । सन् २१०० सिवें न्ह्यः थुगु दर हाकनं थाहाँवनिगु विज्ञतयेसं ताकं याःगु दु । राष्ट्रसंघं नं हलिंया जनसंख्या सन् २१०० तक्क मदिक्क थाहाँवनिगु तर थुकथंया वृद्धि छुं क्षेत्रय् जक केन्द्रित जुइगु न्ह्यथंगु दु ।
व्यूरोया कथं वइगु छुं दशक कंगो, इजिप्ट, इथोपिया, भारत, इन्डोनेसिया, नाइजेरिया, पाकिस्तान, तान्जेनिया व अमेरिकाय् जनसंख्या थाहाँवनिगु धाःगु दु ।
थुगु शताब्दीया अन्त्यय् ५५गू देय्या जनसंख्या छगू प्रतिशत सिवें अप्वःलं कुहाँवनिइ । राष्ट्रसंघं बुल्गेरिया, लात्भिया, लिथुनिया व युक्रेनया जनसंख्या २०गू प्रतिशतं कुहाँवनिगु न्ह्यथंगु दु ।