भारतय् २४ घण्टाया दुने १ लाख ९४ हजार म्हेसित कोरोना संक्रमण पुष्टि
लहनान्युज | थिंलागा दशमी ११४२, पुष २८ बुधवाः
![](https://www.lahananews.com/sites/default/files/bharat_2.jpg)
भारतया स्वास्थ्य मन्त्रालयया वंगु २४ घण्टाया दुने जक १ लाख ९४ हजार म्हेसित कोरोना संक्रमण पुष्टि जूगु दु।
अथेहे ४४२ म्ह सीउगु दु। मंगलबाः जक १ लाख ६९ हजार म्हेसित संक्रमण पुष्टि जुगु खःसा २ सय ७७ म्ह सीउगु दु।
भारतया राजधानी दिल्लीइ प्रत्येक प्यम्हे छम्हेसित संक्रमण पुष्टि जुगु धका भारतीय मिडियां धाउगु दु।
दिल्लीइ जक २३ म्ह सीउगु दु धासा थ्व वंगु जुन लिपाय् च्यालाया दुने हे दकलय् अप्वो खः।
छवाः दुने सुपरसोनिक मिसाइल प्रक्षेपण यानागु उत्तरकोरियाया दाबी
थिंलागा दशमी ११४२, पुष २८ बुधवाः
![](https://www.lahananews.com/sites/default/files/rocket_0.jpg)
उत्तर कोरियां म्हिगः परीक्षण याःगु मिसाइल हाइपरसोनिक मिसाइल हे खःगु दाबी याःगु दु ।
उत्तर कोरियाली समाचार एजेञ्सी केसीएनएं मंगलबाः छवाः दुनेया निगूगु हाइपरसोनिक मिसाइल परीक्षण याःगु धाःगु खः । उत्तर कोरियाली नेता किम जोङ उनं तकं मिसाइल परीक्षणया अनुगमन याःगु धासें किपा तकं सार्वजनिक जूगु ुद ।
मंगलबाःया प्रक्षेपण द्वःछि किलोमिटर तापाक्कया आज्जुइ सुथांलाक्क थ्यंगु दाबी नं समाचार एजेञ्सीं याःगु दु । म्हिगःया मिसाइल प्रक्षेपणया बारे दक्षिण कोरिया व जापान निगुलिइ देय्याके जानकारी दुगु खः ।
प्रक्षेपण जापानया विशेष आर्थिक क्षेत्र दुने लाःगु समुद्रय् कुतुंवंगु खः । हाइपरसोनिक मिसाइल ब्यालिस्टिक मिसाइल स्वयां म्ह्वः जालं जुयाः आज्जुपाखे वनीगु कथंया खः ।
उकिया गति धाःसा ध्वनिया गति स्वयां न्यादुगं अप्वः अर्थात् प्रति घण्टा ६द्वः व २सः किलोमिटर जुइ । सन् २०२० या मार्च धुंकाः नेता किम मिसाइल प्रक्षेपणया झ्वलय् उपस्थिति जूगु थ्व न्हापांगु खुसी खः ।
निला दुने युरोपया बच्छि जनसंख्यायात ओमिक्रोन संक्रमण जुइफुगु डब्ल्युएचओया चेतावनी
थिंलागा दशमी ११४२, पुष २८ बुधवाः
![](https://www.lahananews.com/sites/default/files/omm.jpg)
बिश्व स्वास्थ्य संगठन डब्ल्युएचओं युरोपया बछि जनसंख्यायात ओमिक्रोनया संक्रमण जुइफुगु चेतावनी ब्यूगु दु ।
वइगु निला दुने युरोप न्यंक ओमिक्रोन महामारीया रुपं न्यनीगु चेतावनी ब्युसें थथे धाःगु खः । डब्ल्युएचओया बरिष्ठ चिकित्सक हान्स क्लुगें ओमिक्रोन पश्चिम युरोपं पूर्वी युुरोपतक्क न्यनेधुंकूगु धासें याकनं हे बछि युरोप प्रभावित जुइगु दाबी यानादीगु खः ।
सन् २०२२ थीधुंकाःया छवाःत्या दुने युरोपय् ७० लख न्हूपिं संक्रमित अप्वःगु धाःगु दु । डा. क्लुगें पत्रकार सम्मेलन यानाः सन् २०२१य् हलिंया कयौं राष्ट्रतय्सं डेल्टा भेरिएन्ट नियन्त्रणया लागिं याःगु मदिक्कया कुतलं नियन्त्रण ताःलाःसां ओमिक्रोन महामारी नियन्त्रणया लागिं हाथ्या अप्वःगु धयादिल ।
लिसें, वय्कलं युरोप वप मध्य एशियाली राष्ट्र ओमिक्रोनया चपेटाय् लाइगु दावी नं यानादिल । पूवंगु मात्राय् खोप काःपिं मनू तकं ओमिक्रोनया शिकार जुइगु धासें डब्ल्युएचओं भचा नं लापरवाही मयायेत सकसित इनाप याःगु दु ।
अर्बपति रोवर्ट डस्र्ट कारागारय् मन्त
थिंलागा नवमी ११४२, पुष २७ मंगलवाः
![](https://www.lahananews.com/sites/default/files/milliner.jpg)
आजीवन कारागारया सजाय फयाच्वंम्ह अमेरिकी अर्बपति रोवर्ट डस्र्ट कारागार दुने हे मन्त ।
थः हे सहकर्मीयात स्याःगु द्वपनय् क्यालिफोर्नियाया छगू कारागारय् जन्मकैदया सजाय फयाच्वंम्ह डस्र्ट कारागारय् हे मदुगु खः । ७८दँया डस्र्टयात थगुने सेप्टेम्बरय् ज्वंगु खः ।
जहान वेपत्ता जूगु विषय मेपिन्त धयाबीगु ग्याःचिकुं वय्कलं थः सहकर्मीयात स्यानागु स्वीकार याःगु खः । वनापं वय्कःयात निम्ह जःलाखलायात स्याःगु द्वपं नं लाःगु खः ।
रियल स्टेट ब्यापारी डस्र्टया अमेरिकाया वल्र्ड टे«ड सेन्टरय् तकं लगानी दु ।
उत्तर कोरियां हाकनं यात ब्यालिस्टक मिसाइल परीक्षण
थिंलागा नवमी ११४२, पुष २७ मंगलवाः
![](https://www.lahananews.com/sites/default/files/misile.jpg)
उत्तर कोरियां थौं सुथय् हाकनं मेगु मिसाइल परीक्षण याःगु दु । हाइपरसोनिक मिसाइल परीक्षण यानागु धाःगु छवाः हे मब्यूनिबलय् उत्तर कोरियां मेगु मिसाइल परीक्षण याःगु दक्षिण कोरिया व जापानं धाःगु दु ।
स्थानीय ई कथं थौं सुथय् ७ताः ई जुयाः २७ मिनेट वंबलय् जमिनं पूर्वी समुद्रपाखे मिसाइल परीक्षण याःगु व उगु परीक्षण ब्यालेस्टिक मिसाइल जुइफुगु दक्षिण कोरियाया सैन्य प्रमुख ज्याकुथिं धाःगु दु ।
अथे हे, जापानी कोस्ट गार्डं नं ब्यालेस्टिक मिसाइल थें खनेदुगु परीक्षण उत्तर कोरियां याःगु धाःगु दु । उगु मिसाइल जापानया एक्सक्लुसिभ इकोनोमिक जोन दुने कुतुंवंगु नं क्योदो न्युज एजेञ्सीं धाःगु दु ।
जापानी प्रधानमन्त्री फुमिओ किसिदां उत्तर कोरियां मदिक्क मिसाइल परीक्षण याःगु चिन्ताया विषय जूगु धयादीगु दु । अमेरिका, जापानलिसें ६ राष्ट्रं वंगु वालय् कोरियाली प्रायद्विपयात अस्थिर दयेकेगु ज्याखँ मयायेत इनाप यासें मंकाः विज्ञप्ति पिथनेधुंकाः थ्व न्हापांगु परीक्षण खः ।
राष्ट्रसंघया लागि अमेरिकी राजदूत लिण्डा थोमस ग्रिनफिल्डं उत्तर कोरियाया ज्याखं क्षेत्रीय सुरक्षायात अस्थिर दयेकूगु प्रतिक्रिया ब्यूगु दु ।
उत्तर कोरियाली नेता किम जोङ उनं धाःसा अन्तर्राष्ट्रिय समुदायया चिन्तायात बेवास्ता यासें थः देय्या प्रतिरक्षा प्रणालीयात बल्लाकेत व अत्याधुनिक दयेकेत प्रतिवद्ध दुगु धयावःगु दु ।