प्रधानमन्त्री पुष्पकमल दाहाल प्रचण्ड व भारतीय प्रधानमन्त्री नरेन्द्र मोदी नापलायेगु ज्या जुगु दु।

म्हिगः आइतवाः बहनि निम्ह दथुइ नापलायेगु झ्वलय् नेपाः–भारत दथुइ सम्बन्ध व निगुपक्षीय हितया विविध विषय सहलह जुगु खः।

नापलायेगु झ्वलय् वंगुु इलय् निगु पक्षीय दथुइ जुगु समझदारी नाप सम्झौताया विषय विचारविमर्श जुगु खः। मोदीया शपथ ग्रहण समारोहय् ब्बनि कायेगु निति प्रधानमन्त्री प्रचण्ड आइतवाः न्हिनय् नयाँदिल्लीइ वःगु खः।

प्रधानमन्त्री पुष्पकमल दाहाल प्रचण्ड भारतीय प्रधानमन्त्री नरेन्द्र मोदीया शपथग्रहण ज्याझ्वलय् ब्बति कायेगु निति थौ भारतया राजधानी नयाँदिल्लीइ वःगु दु।

प्रधानमन्त्री दाहालयात नयाँदिल्लीस्थित इन्दिरा गान्धी अन्तर्राष्ट्रिय विमानस्थलय् भारतीय सरकारया विशेष प्रतिनिधिं लसकुस याःगु दु धका दिल्लीस्थित विदेश मन्त्रालयं धाःगु दु। स्वक्वःगु कार्यकालया लागि भारतीय जनता पार्टीया नेता मोदीं थौ बहनि भारतया प्रधानमन्त्री पदया शपथ काइगु ज्याझ्वः दु।

प्रधानमन्त्री प्रचण्डनापं वयकःया म्ह्याय् स्वकीय सचिव गङ्गा दाहाल, कानुन, न्याय लिसे संसदीय मामिलामन्त्री पदम गिरी, परराष्ट्र सचिव सेवा लम्साललगायत उच्चपदस्थ सरकारी अधिकारीपि उखेपाखे वःगु खः। प्रधानमन्त्री दाहाल सोमवाः स्वदेश लिहावइगु ज्याझ्वः दु।

भारतीय प्रधानमन्त्री नरेन्द्र मोदी स्वक्वःगु पटक प्रधानमन्त्री कार्यकालया शपथग्रहण ज्याझ्वलय् प्रधानमन्त्री प्रचण्डं ब्बति काइगु जुगु दु।

नेपाःया प्रधानमन्त्री प्रचण्ड नाप भुटानी जुजु, श्रीलङ्काया राष्ट्रपती, बङ्गलादेश व मौरिससया प्रधानमन्त्रीपि नापं उगु शपथ ग्रहण ज्याझ्वलय् ब्बति काइगु जुगु दु।

मोदीं शपथ शनिवाः काइगु जुगु दु।

भारतया प्रधानमन्त्री नरेन्द्र मोदी लोक सभा सदस्यय् निर्वाचित जूगु दु। बाराणसी क्षेत्रय् उम्मेदवार जूम्ह मोदीं कांग्रेस प्रदेश अध्यक्ष अजय राईयात १ लाख ५२ हजार मतान्तरं पराजित याःगु दु।

मोदी उगु थासं स्वक्वःगु पटक निर्वाचित जुगु खः। थुगु पटक धाःसा मतान्तर म्हो जुगु दु। २०१९ य् मोदीं ४ लाख ७९ हजार ५०५ मतान्तरं विजयी जूगु खः।

मोदीया दल भारतीय जनता पार्टी (भाजपा) धासा उगु इलय् बहुमत हयेत ताः मलागु खः। आः जुगु च्वंगु मत गणनाय् भाजपा २४३ सिटय् न्ह्यने खने दु सा एनडीए गठबन्धन धाःसा २९३ सिटय् न्ह्यने दु।

इरानया राष्ट्रपति इब्राहिम रैसी च्वना वःगु हेलिकप्टर दुर्घटना जुगु दु। बीबीसीया कथं अजरबैजानस्थित छगु ज्याझ्वलय् ब्बति कया लिहावयेगु झ्वलय् हेलिकप्टर दुर्घटना जूगु खः।

इरानया गृहमन्त्री अहमद वाहिदीें राष्ट्रपति रैसी व विदेशमन्त्री हेलिकप्टरय् च्वना वःगु पुष्टि याःगु दु। अलजजिरां खराब मौसमया कारण हेलिकप्टर दुर्घटनाय् आशंका याःगु दु।

राष्ट्रपति रैसी च्वना वःगु हेलिकप्टरय् विदेशमन्त्री होसेन अमिर अब्दुल्लाहियान, इरानया सर्वोच्च नेताया प्रतिनिधि अयोतल्लाह मोहम्मद अली अल हसम, इरानया पूर्वी अजरबैजान प्रान्तया गभर्नर मलिक रहमाती व मेमेपि न च्वना वःगु खः।