अमेरिकाया न्यूयोर्क व पूर्वी तटया जःखः शहरय् भुखाय् ब्बःगु दु। उगु थासय् भुखाय् ब्बःगु अज्जु चाइपुगु धका माने यानातःगु खः।

लेबनान, न्यूजर्सीनाप ४ दशमलव ८ म्याग्निच्यूडया भुखाय् ब्बगुलि पेन्सिलभेनियानिसे कनेक्टिकटतक महसुस जूगु दु धका बीबीसीं धाःगु दु। तधःगु नोक्सान मजूसा भुखाय् ब्बया गुलि क्षतिबारेय् मूल्याङ्कन जुयाच्वंगु दु धका स्थानिय अधिकारीं धाःगु दु।

भारतीय नेशनल कांग्रेस नेतृ सोनिया गान्धीं राज्यसभाय् सांसद पदया शपथ काःगु दु।

सोनिया राजस्थानपाखे राज्यसभाय् सांसद जूगु खः। विहिवाः भारतया न्हुगु संसद भवनय् उपराष्ट्रपति जगदीप धनखरं गान्धीनाप मेपिन्त राज्यसभा सांसदपिन्त सपथ याकूगु खः। सोनिया गान्धी न्हापागु पटक राज्यसभाया सांसद जूगु खः। वयकः राजस्थानपाखे राज्यसभाय् निर्विरोध निर्वाचित जूगु खः।

नेहरु गान्धी परिवारया सदस्यं राज्यसभा सांसदया कथं शपथ काःगु थ्व स्वक्वःगु पटक खः। थ्व स्वया न्हापां इन्दिरा गान्धी व उमा नेहरु राज्यसभाय् सांसद जुइ धुकुगु दु। उमा नेहरु भारतया न्हापाम्ह प्रधानमन्त्री जवाहरलाल नेहरूया काकि खः। उमाया कार्यकाल सन् १९६२–६३ य् तक जुगु खः।अथेहे इन्दिरा गान्धी सन् १९६४ य् राज्यसभाय् थ्यःगु खः।

इन्दिरा गान्धी सन् १९६४ निसे १९६७ तक राज्यसभा सदस्य जुगु खः। निम्ह हे नेतां राज्यसभाया उत्तर प्रदेशपाखे प्रतिनिधित्व याःगु खः। इन्दिरा न्हापागु पटक प्रधानमन्त्री जुम्ह खः, वयकः राज्यसभाया सदस्य खः । सन् १९६७ य् लोकसभा चुनावय् वयकलं रायबरेली सिटपाखे चुनाव त्याकूगु खः। वयालिपा वयकलं राज्यसभाया सदस्यता त्वतूगु खः। सोनिया गान्धी थ्व स्वया न्ह्यः १९९९ निसे लगातार लोकसभा चुनाव त्याका वयाच्वंगु खः।

सन् १९९९ य् सोनिया उत्तर प्रदेशया अमेठी सिटपाखे त्याका लोकसभाय् थ्यःगु खः। वया लिपा सन् २००४ य् वयकःया काय् पूर्व कांग्रेस अध्यक्ष राहुल गान्धी चुनावी राजनीतिइ दुहावःगु खः। राहुल अमेठी सिटपाखे व सोनिया रायबरेली सिटपाखे चुनावय् ल्वागु खः। रायबरेली उगु सिट खः गन सोनियाया माजु इन्दिरा गान्धीें चुनाव त्याकूगु खः।

सोनियां २००४, २००९, २०१४ व २०१९ य् लगातार प्यकः  तक रायबरेली सिटपाखे चुनाव ल्वागु खः।

भारतया महाराष्ट्र राज्य सम्भाजीनगरय् छगु कापः पसलय् मिँँच्याना न्ह्यय्म्हेसिगु ज्यान वःगु दु।

छत्रपति सम्भाजीनगरय् च्वंगु छगु कापः पसलय् मिँच्यागु धका बीबीसी हिन्दीं धाःगु दु। गुकथं मिँ च्यागु धका सिइमदुनि।

प्रारम्भिक विवरण कथं मिँ च्यागु निगु तल्लाय् थ्यका स्यागु खःसा कुँयाना न्ह्यय्म्ह मनू सीउगु व थप छानबिन जुयाच्वंगु दु धका प्रहरीं धाःगु दु।

विश्व बैङ्कं सन् २०२४ य् दक्षिण एसियाया आर्थिक वृद्धिदर ६ प्रतिशत जुइगु अनुमान याःगु दु।

विश्व बैङ्कं पिकागु लिपागु रिपोटय् चिहाकगु इलय् दक्षिण एसियाया वृद्धिया सम्भावना बालागु दु अय्न कमजोर वित्तीय स्थिति व अप्पो जलवायु प्रभावं समस्या जुइगु उल्लेख याःगु दु।

विकासयात अझ म्हो यायेत निजी लगानीयात अप्पो थाय् बिया रोजगारी अप्पोका नीतिगत व्यवस्था यायेत माःगु रिपोर्टय् धाःगु दु धका एएनआई न जानकारी बिगु दु। रिपोर्टय् व्यापार खुलापन व वित्तय् पहुँच थकायेगु, व्यापारिक वातावरण व संस्थाय् सुधार, वित्तीय क्षेत्रय् प्रतिबन्ध चिइकेगु, शिक्षाय् सुधार, व मिसापिनिगु आर्थिक गतिविधिइ प्रतिबन्ध चिइकेगु थे जाःगु दृढ विकासयात प्रोत्साहित याना रोजगारीयात अप्पोकेगु निति थीथी नीति सिफारिस याःगु खः।

थुगु उपाय न विकास व उत्पादकत्व थकायेगु व जलवायु अनुकूलन सार्वजनिक लगानीया लागि थाय् खाली याना ग्वहालि यायेत विश्व बैंकं धाःगु दु। दक्षिण एसियाय् सन् २०२४–२५ य् दकलय् अप्पो भारतया उत्पादनय् ७ दशमलव ५ प्रतिशतं थहावनेगु भलसा कयातःगु दु।

ताइवानया राजधानी ताइपेय् ७.४ म्याग्निच्युडया भुखाय् ब्बःगु दु। अमेरिकी भौगर्भिक सर्वेक्षणया कथं थौ बुधवाः सुथय् हुलियन सहरय् केन्द्र जूया १८ किलोमिटर दक्षिणय् भुखाय् ब्बःगु धका धाःगु दु।

वया लिपा यक्को हे ६.५ म्याग्निच्युडया तःतधःगु परकम्प वंगु दु धका बीबीसीं धाःगु दु। भुखाय् ब्बया ताइपेयया यक्को थासय् विद्युत् आपूर्ति बन्द जूगु दु धका धाःगु दु।

ताइवानया सेन्ट्रल वेदर एडमिनिस्ट्रेसन प्रवक्ताया कथं नीन्यादँ लिपा ताइवानय् दकलय् तधःगु भुखाय् ब्बगु खः। चीनया दक्षिणपूर्वी फुजियान प्रान्तय् तक भुखाय् ब्बःगु महसुस जूगु दु धका चिनियाँ सरकारी सञ्चारमाध्यमं धाःगु दु।