सन् २०२४ या न्हापांगु खुल्लाया दुने चीनया सकल घरेलु उत्पादन (जीडीपी) ५ प्रतिशतं अप्वःगु दु।

चीनया राष्ट्रिय तथ्यांक विभागं थौं सार्वजनिक याःगु तथ्यांकं सकल घरेलु उत्पादन ५ प्रतिशतं अप्वःगु क्यंगु दु।

अन्तर्राष्ट्रिय सञ्चार माध्यमया कथं जनवरीनिसें जून तक खुल्लाया दुने चीनया जीडीपी ८० खर्ब ६५ अर्ब अमेरिकी डलर थ्यंगु दु। तर वंगु स्वलाय् जीडीपी ४.७ प्रतिशत जक अप्वःगु बुँखय् उल्लेख जुयाच्वंगु दु।

पश्चिमी संचार माध्यमं निगूगु त्रैमासिकय् चीनया जीडीपी लक्ष्य कथं वृद्धि मजूगु विश्लेषण याःगु दु। विश्वया निगूगु तःधंगु अर्थतन्त्र दुगु चीन ताःई न्ह्यःनिसें आवासया संकट, स्थानीय सरकारया ऋण, म्हो खपत व अप्वः बेरोजगारीया सामना यानाच्वंगु खः।

थ्वहे झ्वलय् चिनियाँ कम्युनिष्ट पार्टी (नेकपा)या केन्द्रीय समितिया पूर्ण बैठक न्ह्याःगु दु। थ्व बैठकयात चिनियाँ कम्युनिष्ट पार्टीया दकलय् तःधंगु बैठकया रुपय् म्हसीकेगु याः।

मुँज्यां देय्या अर्थतन्त्र, बाल नीति, परराष्ट्र नीति लगायतया विषयस सहलह यानाः निष्कर्ष पिकाइगु जूगु दु। चिनियाँ राष्ट्रपति सी जिनपिङया सभापतित्वय् ३७० म्हसिबें अप्वः वरिष्ठ नेता व केन्द्रीय दुजःपिनिगु नापलाये ज्या जूगु खः।

इजरायली सेनां गाजाय् याःगु लिपांगु आक्रमणय् विद्रोही समूह हमासया छम्ह वरिष्ठ कमाण्डरया ज्यान वंगु दु।

इजरायलं शनिवाः इजरायली सेनां याःगु हवाई आक्रमणय् हमासया वरिष्ठ कमाण्डर राफा सलामाया ज्यान वंगु धका इजरायलं दाबी याःगु दु।

हमासं थुकिया पुष्टि याःगु धासा मदुनि धका बीबीसीं जानकारी ब्यूगु दु। सेनां अक्टोबर ७ तारिखय् हमासं इजरायलय् याःगु आक्रमणया मू योजनाकार सलामा जूगु धाःगु दु।

हमास संचालन यानाच्वंगु स्वास्थ्य मन्त्रालयं इजरायलं गाजाया खान युनिसय् च्वंगु छगू शरणार्थी शिविरय् आक्रमण याःगु जानकारी ब्यूगु दु, गन ग्वाहालिया नितिं आपालं सर्वसाधारण च्वनाच्वंगु खः।

मन्त्रालयं थुगु आक्रमणय् ११४ म्ह प्यालेस्टाइनी सीउगु व ४०० म्ह घाःपाः जूगु दाबी याःगु दु। इजरायलं हमासया छम्ह वरिष्ठ नेतायात लक्षित यानागु धाःगु दु। तर हमासया नेतां इजरायलं सर्वसाधारणयात लक्षित याःगु द्वपं ब्यूगु दु

अमेरिकी राष्ट्रपति जो बाइडेनं अमेरिकाया राजनीतिइ वातावरणय् अप्वः क्वाःजः तयेम्वाः धका धयादीगु दु। वइगु चुनावय् थः प्रतिद्वन्द्वी व पूर्वराष्ट्रपति डोनाल्ड ट्रम्पयात गोलीं कयेकूगु घटना लिपा वाइडेनं सार्वजनिक सम्बोधन यासें अमेरिकी राजनीतिक वातावरणयात तिबः बीमज्यू धका धयादीगु खः।

ह्वाइटहाउसया ओभलं न्वचू बिइगु झ्वलय्् बाइडेनंं राजनीतिइ जुइगु शक्ति दथुइ न्ह्याबलें तनाव व असहमति जुइमाःगु आवश्यकता मदुगु धका न धयादीगु खः।

अमेरिकी राजनीति शान्तिपूर्ण जुइमाः धका धयादीसे वय्कलं अमेरिकाय् लोकतन्त्र धयागु व च्वयातःगु खँय् जक सीमित जुइमज्यूगु खँय् बः बियादिल, उकियात व्यवहारय् नं कार्यान्वयन यायेमाः धका धयादीगु खः।

म्हिगः ट्रम्पयात गोली क्ययेकूम्ह २० दँया थोमस क्रुक्सयात छम्ह सुरक्षाकःमिं गोलीं कयेकूगु खः।

अमेरिया पुलांम्ह राष्ट्रपति डोनाल्ड ट्रम्पयात गोली लाःगु दु। गोली लाःगु जूसां नं वय्कः सुरक्षित जूगु धका अन्तर्राष्ट्रिय समाचार संस्थातय्सं जानकारी ब्यूगु दु। घटनास्थलया किपातय् ट्रम्पया न्ह्यापतं निसे न्यतालय् तक हि बाः वःगु खनेदु।

सुरक्षा पुचलं वयकःयात अनं हे अस्पताल यंकूगु खः।पेन्सिलभेनियाया ग्रेटर पिट्सबर्गया बटलर काउन्टीइ चुनावी सभा जुयाच्वंगु इलय् ट्रम्पयात गोली लाःगु खः। प्रत्यक्षदर्शीया कथं थ्यंमथ्यं ३०० गज तापाक्कं राइफलं गोली कयेकूगु खः।

उगु झ्वलय् अन यक्व गोली चलेजूगु सः वःगु खः।

सिंगापुरं थःगु स्वच्छ ऊर्जा दृष्टिकोणयात समर्थन यासे सन् २०२५ निसें न्हूगु डिजेल कार व ट्याक्सी दर्ता यायेगु बन्द याइगु जूगु दु।

डिजेल कारया थुवाःतय्सं हकदाबीया प्रमाणपत्र नवीकरण यायेफइगु तर भुमि यातायात प्राधिकरणं नवीकरण यायेत निरुत्साहित यायेत सतक कर तसकं अप्वयेकेगु घोषणा याःगु दु। सन् २०२१ य् संसदय् सरकारया वातावरण बालाकेगु योजनाय् सहलहया झ्वलय् स्वदँ लिपा प्रदूषण अप्वयेकीगु सवारीसाधनया उत्पादन म्हो यायेगु घोषणा यागु खः।

उगु घोषणा कथं न्हूगु डिजेल कार व ट्याक्सीया दर्ता १ प्रतिशतय् क्वपाःगु चिनियाँ समाचार एजेन्सी सिन्ह्वां जानकारी ब्यूगु दु। न्हूगु कार व ट्याक्सी फुक्कं स्वच्छ ऊर्जा मैत्री जुइमाःगु व्यवस्था हयाः सन् २०३० निसें अनिवार्य यायेगु योजना दु।