प्रवर्तन निर्देशनालय (ईडी) या पुचलं दिल्लीया मुख्यमन्त्री अरविन्द केजरीवालयात ज्वंगु दु।

केन्द्रीय वित्त मन्त्रालय, राजश्व विभाग मातहतया ईडीया पुचलं म्हिगिः बिहीवाः मुख्यमन्त्रीया छेय् वना ज्वंगु खः। निघौ ताहकः न्यनेकने धुका ज्वंगु धका भारतीय सञ्चार माध्यमं धाःगु दु।

दिल्ली सरकारया मन्त्री नाप आम आदमी पार्टीया नेता आतिशीं केजरीवालको गिरफ्तारी बीजेपी व प्रधानमन्त्री नरेन्द्र मोदीया राजनीतिक षड्यन्त्र खः धका धाःगु  दु।

दिल्लीं मदिरा नीतियात कया ईडीं केजरीवालयात छानबिन याना वयाच्वंगु खः।

इजरायली सेनां गाजास्थित नुसिराट शरणार्थी शिविरय् आक्रमण याःगु दु। उगु आक्रमणय् लाना २७ म्हेसिगु ज्याना वःगु दु धका अलजजिरां धाःगु दु।

अथेहे आक्रमणय् लाना यक्को घाःपाः जुगु दु। घाःपाः जूपिन्त अल–बालाहया अल–अक्सा सहिद अस्पतालय् वासः याकाच्वंगु दु।

अथेहे गाजाय् भोकमरीया कारण यक्को हे मस्त सी ना च्वंगु दु धका विश्व स्वास्थ्य संगठन (डब्लूएचओ) न धाःगु दु। पोषणया कमीं कम तौलया मस्त बुयाच्वंगुलि अथे मस्त सी ना च्वंगु धका गाजाया स्वास्थ्यकर्मी तय्स धाःगु दु।

थ्व हे दथुइ, बेलायतं गाजाय् २ हजार टन खाद्यान्न ग्वहालि याःगु दु। बेलायतं बिःगु अनुदान २ हजार टन स्वया अप्पो खाद्यान्न ग्वहालि जोर्डन जूया गाजाय् वःगु खः। करिब २ लाख ७५ हजार मनू तय्त नयेत गाइ धका खाद्यान्न विश्व खाद्य ज्याझ्वः न धाःगु दु।

पाकिस्तानया राष्ट्रपतिइ सत्तारुढ गठबन्धनया उम्मेदवार आसिफ अली जरदारी विजयी जूगु दु।

पाकिस्तानया निर्वाचन आयोगया कथं जरदारीं संसद् व प्यंगु प्रान्तीय सभा नावं दक्को निर्वाचक मण्डलपाखे ४ सय ११ मत हया विजयी जूगु दु धका चिनियाँ समाचार संस्था सिन्ह्वां धाःगु दु। जरदारीं सिनेट व नेसनल एसेम्बलीलगायत संसदया निगु हे सदनय् २ सय ५५ मत हःगु खः।

पूर्वी पञ्जाब प्रान्तपाखे ४३ मत, उत्तरपश्चिम खैबर पख्तुनख्वा प्रान्तपाखे ८ मत, दक्षिणपश्चिम बलुचिस्तान प्रान्तपाखे ४७ मत व दक्षिणी सिन्ध प्रान्तपाखे ५८ मत हःगु खः।

जरदारीया प्रतिस्पर्धी विपक्षी दलया गठबन्धनया उम्मेदवार महमुद खान अचकजाई ने कुल १ सय ८१ मत हःगु खः।

६८ दँ दुम्ह जरदारी सन् २००८ निसे २०१३ तक ११ म्ह राष्ट्रपति जुइ धुकुगु खः।

पाकिस्तानय् दक्को किसिमया सामाजिक सञ्जालय् प्रतिबन्ध तयेगु निति छगु प्रस्ताव संसदय् दर्ता जूगु दु।

पाकिस्तान पिपल्स पार्टीया सांसद बहरामन्द तांगीं संसदय् पेस याःगु प्रस्तावय् फेसबुक, एक्स, युट्युब व इन्स्टाग्रामलगायत दक्को सामाजिक सञ्जाल प्लेटफर्मयात प्रतिबन्ध तयेमाःगु माग याःगु दु धका टाइम्स अफ इन्डियां धाःगु दु। प्रस्तावय् सामाजिक सञ्जालया नकारात्मक असरं ल्याय्म्हत ल्यकातयेगु निति प्रतिबन्ध तयेमाःगु धका धाःगु दु।

सामाजिक सञ्जालं ल्याय्म्हत बामलाक्क प्रभावित जुयावंगु व धर्म नापं संस्कृतिविरुद्ध सामाजिक सञ्जालयात छ्यलाच्वंगु धका उगु प्रस्तावय् उल्लेख याःगु दु।

पूर्व प्रधानमन्त्री इमरान खानया पार्टी पीटीआई न सरकारी प्रतिबन्ध व दबाबया बाबजुद सामाजिक सञ्जालया हे बलं वया समर्थित उम्मेदवारपि त्यागुलि न सामाजिक सञ्जालय् प्रतिबन्धया प्रस्ताव संसदय् दर्ता यायेत्यःगु खः।

एलन मस्कं ट्विटरया जिम्मेवारी काये धुका माइक्रो ब्लगिङ प्लेटफर्मय् छगु लिपा मेगु ह्यूपाः वयाच्वंगु दु।

दकलय् न्हापां मस्कं ट्विटरया नां हिलां एक्स तःगु खः। आः थुगु प्लेटफर्मयात हलिमयन्यकं एक्सया नामं म्हसिइगु दु। मस्कं थःगु प्लेटफर्मय् मेगु न्हुगु सुविधा हःगु दु। थुगु सुविधापाखे आः कल तक यायेफइगु जूगु दु।

वास्तवय् एलोन मस्कं थःगु प्लेटफर्म एक्सय् अडियो व भिडियो कल सेवा यायेगु सुविधा न दुथ्याकूगु दु। एक्सया प्रयोगकर्तातय्स आः थःपासापिं दथुइ निः शुल्क अडियो व भिडियो कल याये फइगु जुगु दु।

प्रयोगकर्तातयेत एक्सपाखे अडियो वा भिडियो कल यायेत छु न नम्बर मालिइमखु ।थुकियात कया अप्पोसिया मस्कं ट्विटरय् कल सुबिधा तया मार्क जुकरबर्गया हवाटस अपलाइ चुनौती बिइत्यःगु धका सञ्चारमाध्यं धाय्गु न याना हःगु दु।