भारतय् बिहार राज्यया मुख्यमन्त्री नितिश कुमारं मुख्यमन्त्री पदपाखे राजीनामा बिउगु खः।

नितिश कुमारं राज्यपाल फागु चौहानयात नापलानालाई भेटेर राजीनामा बिउगु खः धका बीबीसी हिन्दीं धाउगु दु। वयकलं राजीनामा बुझे याये धुका पार्टीया दक्को विधायक व सांसदपि आः गठबन्धनपाखे अलग जू धका धाउगु दु।

गठबन्धनय् संलग्न भारतीय जनता पार्टी (बीजेपी) नाप मतभेद अप्पोया वनेवं जनता दल युनाइटेडं थौं विधायक व सांसदपिनिगु बैठक सःतूगु खः।

लोकसभाया सांसद व दक्को विधायकपिनिगु बैठकय् आः गठबन्धन एनडीए त्वःतेमाः धइगु विचाः वःगुलि  उकियात स्वीकार याना थःम्हेसिया राजीनामा बियाउगु धका धयादीगु खः।

आ नितिश कुमारं राष्ट्रिय जनता दलया समर्थनय् न्हुगु सरकार दयकेगु विश्वास याउगु दु धका बीबीसी हिन्दीं धाउगु दु।

इजरायलया गाजा क्षेत्रय् याउगु आक्रमणय् म्हति न ३२ म्ह सीउगु दु। सीपि अप्पो याना मस्त जुगु धका प्यालेस्टायनी स्वास्थ्य मन्त्रालयं धाउगु दु।

इजरायली सेनां हतियारधारी समूह प्यालेस्टायन इस्लामिक जिहादया लडाकू विरुद्ध कारबाही याउगु धका धाउगु खः। उकि झ्वलय् जिहादया नेता खालेद मन्सुर व तेसीर जाबिरी न उगु कारबाही याना स्याउगु धका इजरायलं दाबी याउगु दु।

मन्सुर जिहादया निगु तहया खः। इजरायली सेनां याउगु कारबाहीया प्रतिउत्तरय् प्यालेस्टायनपाखे शुक्रबाःतक दुने ६०० गु रकेट क्यके धुकुगु दु धका अन्तर्राष्ट्रिय सञ्चार माध्यमं धाउगु दु।

सन् २०२१ या मेय् ११ दिं तक न्ह्याउगु हताःलिपा इजरायलं आःतक दकलय् अप्पो तधःगु कारबाही सुरु याउगु खः। थ्व कारबाही छवाः तक न्ह्याइ धका धाउगु दु। २०२१ मेय् २०० म्ह प्यालेस्टायनीपि सीउगु खः।

पश्चिम बंगालया पूर्व गभर्नर जगदीप धनखर शनिबाः भारतया न्हुम्ह उपराष्ट्रपतिइ निर्वाचित जूगु दु।

वयकलं विपक्षी उम्मेदवार मार्गरेट अल्भाविरुद्ध १८२ मतया विरूद्ध ५२८ मत हःगु खः। १६ म्ह उपराष्ट्रपति निर्वाचनया लागि अध्यक्षता यानाच्वंम्ह लोकसभाया महासचिव उत्तमकुमार सिंहं मतदानया लागि योग्य ७८० सांसदमध्ये ७२५ सांसदं मतदान याउगु जानकारी बिउगु खः।

झीन्यागु मत अमान्य व ७१० मत मान्य जूगु धका वयकलं धयादीगु खः। न्हुम्ह उपराष्ट्रपतिया निर्वाचनया मतदान शनिबाः सुथय् १० बजेनिसे सुरु जुया ५ बजे क्वचाःगु खः। बंगालया पूर्वगभर्नर तक जूयादीइ धुकुम्ह धनखरयात सत्तारूढ दल भारतीय जनता पार्टीया गठबन्धनं न्ह्यने हःगू खः। भारतया न्हम्ह निर्वाचित उपराष्ट्रपति धनखडं ११ अगस्टय् शपथ कयादीइ।

वर्तमान उपराष्ट्रपति वेंकैया नायडूया कार्यकाल १० अगस्टय् क्वचाइ। भारतय् उपराष्ट्रपति देशया निगुगु सर्वोच्च संवैधानिक पद खः। भारतय् उपराष्ट्रपति राज्यसभाया सभापति न जुइ।

भारतय् थौं उपराष्ट्रपतिया निर्वाचन जुयाच्वंगु दु। थौं शनिबाः सुथय् १० बजे निसे बहनि ५ बजे तक संसद भवनय् उपराष्ट्रपतिया निर्वाचन जुयाच्वंगु दु।

थौं बहनि हे लिच्वः वइगु सम्भावना दु। सत्तारुढ एनडीएं जगदीप धनखर व विपक्षीपाखे उम्मेदवार मार्गरेट अल्भायात उम्मेदवार दयकूगु दु।

पश्चिम बंगालया पूर्व गभर्नरया विजय निश्चित खनेदुगु धका भारतीय सञ्चार माध्यमं धाउगु दु। वर्तमान उपराष्ट्रपति बेकैया नायडूया कार्यकाल वइगु अगष्ट १० य् क्वचाइ।

चीनं अमेरिकी प्रतिनिधि सभाया सभामुख न्यान्सी पेलोसीयात प्रतिबन्ध घोषणा याउगु दु। पेलोसीं ताइवान भ्रमण याना थःगु आन्तरिक मामिलाय् हस्तक्षेप याउगु धासे चीनं पेलोसी व वयागु परिवारपिन्त प्रतिबन्ध घोषणा याउगु खः।

छु दिं न्ह्यः जक पेलोसीं ताइवान भ्रमण याउगुलि चीन तंचाउगु खः व ताइवान न्ह्यने लगातार सैन्य अभ्यास यानाच्वंगु दु।

चीनया विदेशमन्त्री वाङ्ग यी न छगु विज्ञप्ति पिकाया धयादीगु दु, ‘पेलोसीं चीनया आन्तरिक मामिला गम्भीर हस्तक्षेप याउगु दु व चीनया सम्प्रभुता नाप क्षेत्रीय अखण्डतायात क्षति याउगु दु।

चीनं छगु चीन नीतियात न्ह्युइगु कुतः याउगु दु व ताइवानय् शान्ति व स्थिरताय् नोक्सान याउगु दु।’