आङ सान सुकीयात खुदँ जेल सजाय
लहनान्युज | गुंलागा पंचमी ११४२, साउन ३१ बुधवाः
![](https://www.lahananews.com/sites/default/files/suki_1.jpg)
म्यानमारया छगु अदालतं नेत्री आङ सान सुकीयात भ्रष्टाचारय् मेगु प्यंगू मुद्दाय् दोषी ठहर याःसे खुदँयानिति जेल सजाय न्यकूगु दु।
नोबेल पुरस्कार विजेता सुकीविरुद्ध थुगु फैसला नाप वयकःयात जेल सजाय १७ दँ थ्यःगु दु।
वंगु जुनय् ७७ दँ थ्यम्ह सुकी थ्व स्वया न्ह्यः भ्रष्टाचारनिसे चुनाव उल्लंघनतक यक्को अपराधय् दोषी ठहर जुइ धूकुगु दु। सुकीयात राजधानी नेपिताउया जेल एकान्त कारावासय् तया तःगु खः।
वयकलं थःयात द्धपः बिःगु दक्को अस्वीकार याना वयाच्वंगु खः।
सलमान रुस्दीया स्वास्थ्य् सुधार
लहनान्युज | गुंलागा तृतीया ११४२, साउन २९ आईतवाः
![](https://www.lahananews.com/sites/default/files/salama_0.jpg)
अमेरिकाया न्युयोर्कय् आक्रमण जूया गम्भीर घाःपाः जूम्ह सलमान रुस्दी भेन्टिलेटरं पिहावंगू दु।
वयकःया स्वास्थ्यय् भचा सुधार जूगु दु व भेन्टिलेटरं पिहावःगु दु धका रुस्दीया ग्वाहालिमि एन्ड्रयु वाइलीं पुष्टि याःगू दु। आः रुस्दीं न्ववायेफूगु अवस्थाय् दु।
मेगु थप विवरण वंगु मदुनि। ७५ दँ दुम्ह रुस्दीयात न्युयोर्कय् छगू साहित्यिक ज्याझ्वलय् शुक्रवाः छुरा प्रहार याःगू खः।
सलमान रुस्दीया अवस्था गम्भीर
लहनान्युज | गुंलागा द्धितीया ११४२, साउन २८ शनिवाः
![](https://www.lahananews.com/sites/default/files/salama.jpg)
चर्चित बेलायती च्वमि सलमान रुस्दीया अवस्था गम्भीर जूगु दु। वयकःयात प्रतिनिधि एन्ड्रयू वाइलीया भापूया उद्धृत यासे बीबीसीं च्वंगू दु, ‘बालागु समाचार मदू। सलमान भेन्टिलेटरय् दु व न्ववाये फूगु मदु।’
रुस्दीयात म्हिगः शुक्रबाः अमेरिकाय् छगू साहित्यिक ज्याझ्वलय् चक्कू आक्रमण याउगु खः। २४ दँ दुम्ह छम्ह हादी मतरं ७५ दँ दुम्ह रुश्दीया गपतय् व प्वाथय् चक्कूं आक्रमण याःगू खः।
वयात तत्काल प्रहरीं नियन्त्रणय् अनुसन्धान यानाच्वंगु दु। स्येँय् व ल्हाःया नशा चानाबिउगुलि वयकलं छपा मिखाँ खनेमफये फू धका उपचारय् संलग्न चिकित्सकं धाउगु दु। आक्रमणकारी १० निसे १५ पटक तक चक्कु प्रहार याउगु खः।
उपन्यासकार सलमान रुस्दीयात आक्रमण जूल
लहनान्युज | गुंलागा द्धितीया ११४२, साउन २८ शनिवाः
![](https://www.lahananews.com/sites/default/files/salman-rusdi.jpg)
विश्व प्रसिद्ध उपन्यासकार सलमान रुस्दीयात आक्रमण याःगु दु। अमेरिकाया न्युयोर्कय् छगू ज्याझ्वलय् मञ्चय् च्वनाच्वम्ह रूस्दीयात छुरा प्रहार याःगु खः।
वयात गःपा व प्वाथय् छुरा क्यकूगु दु धका न्युयोर्क प्रहरीयात उद्धृत यासे समाचार संस्था एपीं धाउगु दु। रुस्दीयात हेलिकप्टरं तत्कालै न्ह्यने च्वंगू अस्पतालय् यकूगु खः।
वयात भेन्टिलेटरय् तया उपचार जूयाच्वंगु व न्ववाये मफूगु अवस्थाय् दू धका अस्पतालयात उद्धृतयासे बीबीसीं धाउगु दु। प्रहरीं आक्रमणकारी फेयरभ्यु, न्यु जर्सीया २४ दँ दुम्ह हादी माटरयात ज्वंगु दु। वयात घटनास्थलपाखे न्यूयोर्क प्रहरीं ज्वंगू खः।
आक्रमणया कारण स्पष्ट जूगु मदुनि धका राज्यया प्रहरी मेजर युजीन स्टानिस्जेस्की न धाःगू दु। भारतय् जन्मय्् जूम्ह उपन्यासकार रुस्दी सन् १९८१ य् प्रकाशित कृति ‘मिडनाइट चिल्ड्रेन’पाखे चर्चित जूगु खः। सन् १९८८ य् पिहावंगु ‘द सटानिक भर्सेस’ या कारण गुदँतक भूमिगत जुइमाःगु खः।
सफू पिहावंगु दँच्छि लिपा हे इरानया तत्कालीन सर्वोच्च नेता अयोतोल्लाह रूहोल्लाह खोमिनी न रूस्दीयाते हत्या यायेत आह्वान यासे वयागु छ्यं हःम्हेसित ३० लाख अमेरिकी डलर बिइगु धका धाःगू खः।
ईयूलय् ग्यास १५ प्रतिशतं कटौती याइगु
लहनान्युज | गुंलाथ्व द्धादशी ११४२, साउन २४ मंगलवाः
![](https://www.lahananews.com/sites/default/files/eue.jpg)
युरोपेली संघ (ईयू) या ग्यास खपतय् १५ प्रतिशतं कटौती यायेगु योजना थौंनिसे लागू जुइगु दु।
युक्रेन व रुसया युद्धया कारण उत्पन्न ऊर्जा संकटया सामना यायेत थौंनिसे ईयू आवद्ध देशपिन्स १५ प्रतिशतं ग्यास खपत कटौती यायेगु योजना कार्यान्वयनय् हयेत्यःगु दु।
निवाः न्ह्यः २७ राष्ट्र सम्मिलित युरोपेली संघ (ईयू) न ग्यास खपतय् १५ प्रतिशतं कटौती यायेगु सहमती जुगु खः।
यूक्रेनविरुद्ध रूसी सैन्य आक्रमणं हःगु ग्यास आपूर्तिया सुरक्षाय् वःगु खतरायात ध्यानय् तया थुगु नियम तत्काल लागू यायेमाःगुलि थौंनिस कार्यान्वयनमा यायेत्यनागु धका इयू न विज्ञप्तिपाखे धाउगु दु।