Display Style:
Column Style
अमेरिकी राष्ट्रपति ट्रम्प विरुद्ध खेद प्रस्ताव पारित
लहना न्यूज | ने.सं. ११३९ दिल्लागा पारु (१७ जुलाइ, २०१९), बुधवाः
प्यम्ह मिसा सांसदपिन्त नश्लवादी टिप्पणी याःग धासें अमेरिकी संसदं राष्ट्रपति डोनाल्ड ट्रम्प विरुद्ध खेद प्रस्ताव पारित याःगु दु ।
प्रतिनिधिसभां राष्ट्रपति ट्रम्पया टिप्पणी नश्लवादी जूगु ठहर यासें खेद प्रस्ताव पारित याःगु विविसीं न्ह्यथंगु दु । राष्ट्रपति ट्रम्पं फरक जातीय पृष्ठभूमिपाखें वःपिं मिसा सांसदपिं अलेक्जान्ड्रिया ओकासियो कोर्टेज, राशिदा तलाइब, आयात्रा प्रेस्ली व इल्हान ओमर लक्षित टिप्पणी यानादीगु खः ।
ट्रम्पं उपिं मिसा सांसदपिं पूवंक हे असफल देशपाखें अमेरिका वःगु धयादिसें उमित थःगु हे देशय् लिहां वनेत धयादीगु खः । अथेखःसां वय्कलं धाःसा नश्लीय व अपमानजनक टिप्पणी मयानागु दावी याना वयाच्वनादीगु दु ।
प्रतिनिधिसभाया १८७म्ह डेमोक्राटिक सांसदलिसें संसदय् उपस्थित सुं सुं रिपब्लिकन सांसदतसें तकं खेद प्रस्तावय् ऐक्यबद्धता प्वंकूगु खः । उगु प्रस्ताव प्रतिनिधसभाय् २४०कू मतं पारित जूगु खः ।
ट्रम्पं कम्युनिस्ट व समाजवाद चाहे जुपि अमेरिका त्वःतेत चेतावनी
लहनान्युज | दिल्लाथ्व पुन्हि ११३९ (जुलाई १६ २०१९)
समाजवादी व साम्यवादीपिन्त अमेरिका त्वःत्येत चुनौति बिइगु ट्वीटं अमेरिकी राष्ट्रपति डोनाल्ड ट्रम्प हाकन विवादय् वःगु दु ।
अमेरिकी राष्ट्रपति ट्रम्प खुला सिमानाया पक्षय् न्ववासे डेमोक्रेटिक पार्टीप्रति तक प्रहार याःगु खः ।
ट्रम्पं थौं हे मंगलवाः छकलं स्वक्वः तक ट्वीट यासे अमेरिका गुवलय् न समाजवादी व कम्युनिस्ट जुइ फइ मखु धका धयादिगु खः ।
वयकलं थुगु खँ लय्ता मफुपिन्सं अमेरिका त्वःता वनिगु विकल्प दुगु धका न धयादिगु खः ।
सू मनू न अमेरिकायात घृणा याना च्वंगु धयादिसे ट्रम्पं इपि इजरायल विरोधी, अलकायदा समर्थक जुग धका धयादिगु खः ।
ट्रम्पं वामपन्थी डेमोक्र्याटपिन्स खुला सिमाना चाहे जुगु व इमिस लागू पदार्थ, अपराध व मानव बेचबिखन थेज्यागु ज्याय् यायेत प्रोत्साहन बिगु आरोप न लगे यानादिगु खः ।
मेक्सिकोया वित्तीय मन्त्री कार्लोसपाखें राजीनामा
लहनान्यूज | ने.सं. ११३९ दिल्लाथ्व नवमि (९ जुलाइ, २०१९), बुधवाः
अर्थतन्त्रय् अतिवाद हावी जूगु धयादिसें मेक्सिकोया वित्तीय मन्त्री कार्लोस उर्जुवां राजीनामा बियादीगु दु ।
मेक्सिकोया राष्ट्रपति आन्द्रेस लोपेज ओब्रेडोरं वित्तीय मन्त्रीया थासय् छम्ह उप–मन्त्रीयात प्रस्ताव यायेगु तयारी यानाच्वंगु इलय् कार्लोसं राजीनामा बियादीगु खः ।
राजीनामा पौयात माइक्रो ब्लगिङ साइटय् ट्वीटरपाखें सार्वजनिक यानादिसें वित्तीय मन्त्री कार्लोसं सरकारं छुं हे आधार मदयेकं आर्थिक नीति दयेकूगु न्ह्यथनादीगु दु ।
आर्थिक नीतिया न्ह्याबलें बल्लाःगु आधार दयेमाःगु व थुकियात कयाः फुक्कस्यां थःथःगु धारणा तय् दयेमाःगु धइगु विश्वास यानागुलिं हे थःत थीथी द्वपं ब्यूगु नं वय्कःया धापू दु । तर थजाःगु द्वपनं थःगु कार्यकालय् लिच्वः मलाकूगु दावी नं कार्लोसं यानादीगु बिबिसीं न्ह्यथंगु दु ।
अमेरिकाया राजधानी वासिङ्गटन डिसी डुबानय्
लहना न्यूज | ने.सं.११३९ दिल्लाथ्व सप्तमि (९ जुलाइ २०१९), मंगलवाः
अमेरिकाया राजधानी वासिङ्गटन डिसी तसकं वा वयाः खुसिबाः वःगुलिं डुबानय् लाःगु दु ।
वंगु चान्हय् वःगु खुसिबाःया हुनिं वासिङ्गटन डिसिया ह्वाइट हाउसलिसें थीथी क्षेत्रय् तकं लिच्वः लाःगु दु । अथे खःसां ह्वाइट हाउसय् दुगु ऐतिहासिक अभिलेख, दस्तावेज, घोषणा पौ, संविधान थेंजाःगु महत्वपूर्ण दस्तावेज सुरक्षित जूगु अधिकारीतसें न्ह्यथंगु दु । ह्वाइट हाउसया वेष्ट विङ्गया बेसमेन्टय् लः दुहांवंगु नं न्ह्यथंगु दु ।
अथे हे, शहरया थीथी क्षेत्रय् लः दुहांवंगुलिं लँ अवरुद्ध जुयाः गुलिखय् यात्रुत अन हे लानाच्वंगु दु । लँ अवरुद्ध जुइवं उपिं थःपिनिगु सवारी साधन त्वःताः वनेत बाध्य जूगु खः व गुलिखे मनूतय्त उद्धार तकं यायेमाःगु एजेन्सीं न्ह्यथंगु दु । थ्व हे झ्वलय् लःया सतह खुगू न्हय्गू फिट च्वय् थाहां वःगु नं एजेन्सीं धाःगु दु ।
अथे हे, अण्डरपासय् धाःसा २००गू मिटरतक लः दुगु खः । भूमिगत रेलमार्ग नं डुबानय् लाःगु खः ।
शहरय् छक्वलं खुसिबाः वयेधुंकाः नेशनल वेदर सर्भिसं तसकं खुसिबाः वयेफइगु अनुमान याःगु दु । खुसि दुहां वःगुलिं उगु लागाय् सर्वसाधारणपिन्त वयेवने तकं मयायेत इनाप याःगु दु ।
अमेरिकाय् शक्तिशाली भुखाय् ब्बःल
लहनान्युज | दिल्लाथ्व तृतिया ११३९ (जुलाइ ४ २०१९)
अमेरिकाय् शक्तिशाली भुखाय् ब्बःगु दु । क्यालिफोर्निया राज्यया लस एन्जलसपाखे उत्तरपूर्वय् रिजक्रेस्ट नगर केन्द्रविन्दु जुया ६.४ रेक्टर स्केलया भुखाय् ब्बःगु खः ।
आः तक दक्षिण क्यालिफोर्नियाय् निगु दशकय लिपा थःथे तसकं भुखाय् ब्बःगु धका धाःगु दु । उगु भुखाचं गुलि भौतिक क्षति जुल धका सिइ मदुनिसा मानवीय क्षतिबारे न सिइ मदुनि ।
उगु भुखाय् ब्बःगु धक्का नेभादा राज्यया लास भेगास तक महसुस जुगु खः । भुखाचं करिब निगु दर्जन ति थासय् मिं न नःगु खः । छु मनूत घाइतया उद्धार यासे अस्पताल छ्वया बिगु खः ।
६.४ रेक्टर स्केलया भुखाय् ब्बःगु लिपा आः न निरन्तर परकम्प जुया च्वंगु दु । अमेरिकी भूगर्भ निकाय (यूएसजी) न भूकम्पविद् पिन्स आ न परकम्प वनातु च्वनि धका न धाःगु दु ।