लहना न्यूज | ने.सं. ११३९ गुंलाथ्व पञ्चमि (५ अगष्ट, २०१९), सोमवाः

भारत सरकारं उत्तरी राज्य जम्मु कश्मिर कयाः वयाच्वंगु विशेष राज्यया मान्यतायात खारेज यायेगु ऐतिहासिक निर्णय याःगु दु ।

 

भारत शासित जम्मु कश्मिरय् राजनीतिक संकट तच्वया वनाच्वंगु इलय् न्हू दिल्लीया लोककल्याण मार्गय् च्वंगु प्रधानमन्त्री नरेन्द्र मोदीया निवासय् थौं सोमवाः च्वंगु मुँज्यां उकथंया निर्णय याःगु खः ।

 

मुँज्यां दफा ३७० खारेज यायेकथं भारतया संविधानय् संशोधन यायेगु प्रस्ताव पारित याःगु खः । मन्त्रीपरिषदया मुँज्या लिपा हे जम्मु कश्मिरया सुरक्षा व्यवस्थायात कयाः सहलह यायेत सुरक्षा समितिया मुँज्या तकं च्वंगु खः ।

 

उगु धारां जम्मु कश्मिरयात विशेष राज्यया मान्यता बियातःगु खः । थुकिया अतिरिक्त सरकारं जम्मु कश्मिरयात निगू अलग केन्द्र शासित राज्यय् विभाजन यायेगु निर्णय तकं याःगु दु । गुकिया कथं आः जम्मु कश्मिर नापं लद्दाख निगू केन्द्र शासित राज्य जुइ । 

 

मन्त्री परिषदया मुँज्या लिपा न्ह्याःगु राज्यसभाया मुँज्याय् गृहमन्त्री अमित शाहं विपक्षीतय्गु विरोधया दथुइ दफा ३७० खारेज यायेगु सम्बन्धय् संकल्प प्रस्ताव न्ह्यब्वयादीगु खः । यदि संसदया निगुलिं सदनय् उगु प्रस्ताव पारित जुल धाःसा भारतीय राष्ट्रपतिं ल्हाःचिं तयेवं जम्मु कश्मिरं कया वयाच्वंगु विशेष राज्यया अधिकार अन्त्य जुइ ।

 

उगु धाराय् रक्षा, विदेश मामिला, अर्थ व सञ्चार बाहेकया कानून लागू यायेमाःसा केन्द्र सरकारं राज्य सरकारया सहमति माःगु व्यवस्था दु । सरकारया निर्णययात कायः विपक्षीतसें तसकं विरोध याःगु दु ।

 

राज्यसभाय् विपक्षी दलया नेता गुलाम अवि आजादं दफा ३७० खारेज यायेगु सरकारया निर्णयपाखें भारतया संविधानया हत्या जूगु दावी यानादीगु दु । अथे हे, जम्मु कश्मिरया पुलांम्ह मुख्यमन्त्री महबुबा मुफ्तिं ट्वीट यानादिसें सरकारया निर्णय गैरकानूनी व लोकतन्त्रया हाकूगु दिं जूगु धयादीगु दु । नापं वय्कलं उगु निर्णयपाखें बांमलाःगु लिच्वः ब्वलनीगु तकं ख्याच्वः बियादिल ।

 

मन्त्रीपरिषदया मुँज्यां संविधानया धारा ३५ (क)या सम्बन्धय् धाःसा छुं नं निर्णय याःगु मदुनि । जब कि थौंया मन्त्रीपरिषदया मुँज्यां उगु धाराया संशोधन यायेगु सम्बन्धय् नं निर्णय याइगु अपेक्षा यानातःगु खः । उगु धारां जम्मु कश्मिरय् छेँ जग्गा न्यायेत व स्थायी बसोबास यायेत अनया नागरिकयात विशेष सुविधा ब्यूगु दु । भारतीय जनता पार्टी भाजपां थःगु चुनावी घोषणापतिइ हे उकियात संशोधन यायेगु न्ह्यथनातःगु खः ।

 

मोदी सरकारं निक्व खुसी निर्वाचित जुइवं उगु धारा संशोधन याइगु अनुमान याना वयाच्वंगु खः । तर, राज्यया राजनीतिक दलं धाःसा उगु धारा संशोधन याःसा थःपिन्त मान्य मजुइगु धया वयाच्वंगु खः ।

लहना न्यूज | ने.सं. ११३९ दिल्लागा आमै (१ अगष्ट, २०१९), विहिवाः

अमेरिकां इरानी विदेशीमन्त्री जावेद जारिफ विरुद्ध प्रतिवन्ध तःगु दु । नाप थःगु देशय् दुगु जारिफया फुक्क सम्पत्तिइ तकं अमेरिकी विदेश मन्त्रालयं प्रतिबन्ध तःगु दु ।

 

इरानी सर्वोच्च नेता आयोतोल्लाह खोमेनीया लापरवाहीपूर्ण एजेण्डायात कार्यान्वयन याःगु धासें जारिफया सम्पत्तिइ प्रतिबन्ध तःगु अमेरिकी विदेश विभागयात उद्धृत यासें विविसीं न्ह्यथंगु दु ।

 

इरानी विदेशमन्त्रीं धाःसा थःगु एजेण्डायात ख्याच्वःयाकथं काःगु हुनिं अमेरिकां प्रतिबन्ध तःगु प्रतिकृया बियादीगु दु ।

 

सन् २०१५या अमेरिका व इरान दथुइ जूगु आणविक सम्झौतापाखें अमेरिका थगुने लिचिलेवं निगू देय् दथुइया स्वापू स्यना वनाच्वंगु खः । नापं इरानयात अमेरिकी प्रतिबन्ध व खाडीया सामुन्द्रिक लँपुइ इरानं थना वयाच्वंगु पंगःया हुनिं स्वापू अझ स्यनावंगु खः ।

लहनान्युज | दिल्लागा औसी ११३९ (अगष्ट १ २०१९)

चीनया हुवावे टेक्नोलोजिज कम्पनीया वःगु खुलाया दुने आयपाखे २३ प्रतिशत स्वया अप्वःगु दु ।

 

 

वःगु मंगलवाः सार्वजनिक तथ्यांक कथं सन् २०१९ या न्हापांगु अर्धवार्षिक अवधिइ कम्पनीया आयय् वःगु दँय् स्वया तुलनात्मक २३ दशमलब २ प्रतिशतय् अप्वःगु खः ।

 

 

अमेरिकी नाप पश्चिम देय् पाखे प्रतिबन्ध जुसा हुवावया सेवा नाप उत्पादनया प्रयोगय् कडाइ जुसा हुवावेया आयय् वृद्धि जुगु सकारात्मक कथं कायेगु याना च्वंगु खः ।

 

 

वःगु त्रैमासिक आर्थिक विवरण सार्वजनिक याःगु हुवावेया अनुसार सन् २०१९ न्हापांगु खुलाय् कम्पनीं ४ खर्ब १ अर्ब ३० करोड युआन अर्थात् ५८ अर्ब २८ करोड अमेरिकी डलर आम्दानी यायेत तालाःगु खः ।

 

 

सन् २०१८ या न्हापागु अर्धवार्षिकय् हुवावें ३ खर्ब २५ अर्ब ७० करोड आम्दानी याःगु धका धाःगु खः ।

 

लहना न्यूज | ने.सं. ११३९ दिल्लागा त्रयोदशि (३० जुलाइ, २०१९), मंगलवाः

ब्राजिलया पारा राज्यया छगू जेलय् कैदीत दथुइ ल्वापु जूगु इलय् म्होतिं ५२म्ह सीगु दु । उकी १६म्हेसिगु छ्यं ध्यनाब्यूगु दु ।

 

अधिकारीया कथं अल्टामिरा जेलय् थ्यंमथ्यं न्याघौतक ल्वापु जूगु खः । स्थानीय ईकथं सुथसिया ७ताः इलंनिसें शुरु जूगु उगु ल्वापु न्हिनय् जक नियन्त्रणय् काःगु खः ।

 

स्थानीय मिडियाकथं जेलया छखे च्वनाच्वंपिं कैदीत मेखेर च्वंपिं कैदीत थ्यनेवं शुरु जूगु विवादं ल्वापु जूगु खः । कैदीतसें जेलया निम्ह अधिकारीपिन्त बन्धक नं दयेकूगु खः । अथेखःसां उमित कैदीया नियन्त्रणपाखें मुक्त यायेधुंकूगु दु ।

 

ल्वापुया झ्वलय् जेलदुने हे मि तयाब्यूगु खः । कुँया हुनिं सासः ल्हाये थाकुयाः नं सुंसुं कैदीत सीगु खँ धाःगु दु । ब्राजिलया टेलिभिजनं जेलया भवनपाखें कुँ पिहां वयाच्वंगु व सुं सुं कैदीत जेलया पल्लिइ न्यासि वनाच्वंगु लू प्रसारण याःगु खः ।

 

ब्राजिलया सञ्चारमाध्यमकथं अल्टामिरा जेलया क्षमता २सः म्ह जक दुसां अन ३११म्ह कैदीत तयातःगु दु ।

 

ब्राजिलय् जेल दुने जुइगु हिंसायात सामान्यकथं कायेगु याः । वंगु मे महिनाय् छन्हुं हे प्यंगू अलग अलग जेलय् हिंसा जूगु इलय् ४०म्ह सीगु खः ।

लहना न्यूज | ने.सं. ११३९ दिल्लागा त्रयोदशि (३० जुलाइ, २०१९), मंगलवाः

अफ्रिकी देय् इथियोपियां छन्हुं हे ३गू करोड ५०गू लख स्वयां अप्वः सिमा पिनाः विश्व कीर्तिमान तःगु दु ।

 

संयुक्त राष्ट्र संघ व अफ्रिकी युनियनया स्वयम् सेवीपिन्सं १२घौया इलय् उकथं सिमा पीगु ज्या जूगु इथियोपियाया खोज लिसें प्रविधि मन्त्रीयात उद्धृत यासें बिबिसीं न्ह्यथंगु दु । हरियाली वातावरणया नितिं धयादिसें प्रधानमन्त्री अबी अहमदं न्ह्यब्वयादीगु योजनाकथं देय् न्यंकया द्वःछि स्वयां अप्वः थासय् सिमा पीगु ज्या जूगु खः ।

 

बन फडाँनी नापं जलवायु परिवर्तनया हुनिं खडेरीपाखें ग्रस्त जुयाच्वंगु देशयात हरियाली दयेकेगु नितिं सिमा पीगु अवधारणा हःगु अहमदया धापू दु । इथियोपियाय् मुक्कं ४गू अर्ब सिमा पीगु लक्ष तयातःगु दु ।

 

संयुक्त राष्ट्र संघयाकथं २०गूगु शताब्दीइ ३५गू प्रतिशत बन लागा दुगु धयातःगु इथियोपियाया वन लागा सन् २०००तक थ्यंबलय् ४गू प्रतिशतय् कयेकुंगु अन सार्वजनिक याःगु तथ्याङ्कयात उद्धृत यासें विविसीं न्ह्यथंगु दु ।

Pages