Display Style:
Column Style
भारतया पुलांम्ह अर्थमन्त्री चिदम्बरमयात ज्वन
लहना न्यूज | ने.सं. ११३९ गुंलागा सप्तमि (२२ अगष्ट। २०१९), विहिवाः
![](https://www.lahananews.com/sites/default/files/chidambaram.jpg)
भारतीय टेलिभिजन कम्पनी आइएनएक्स मिडियालिसे सम्बन्धित भ्रष्टाचार व मुद्रा निर्मलीकरण मुद्दाय् दुथ्याःगु शंका यासें भारतीय कंग्रेसया नेतालिसें पुलांम्ह अर्थमन्त्री पी चिदम्बरमयात ज्वंगु दु । म्हिगः बुधवाः सनिलय् चिदम्बरमयात केन्द्रीय अनुसन्धान ब्यूरों ज्वनाः हिरासतय् तःगु खः ।
भारतीय अनलाइन पत्रिका स्क्रोल इनकथं चिदम्बरमयाके थौं विहिवाः सुथसिया झिताः इलंनिसें न्हिनसिया छताः ईतक सिबिआइं बयान काःगु खः ।
मनमोहन सिंहया सरकारय् चिदम्बरम गृहमन्त्री जुयादीगु खः । उगु इलय् अर्थमन्त्री जुयादीम्ह प्रणव मुखर्जी राष्ट्रपति जुयादीधुंकाः चिदम्बरमं अर्थ मन्त्रालय् स्वयादीगु खः ।
आइएनएक्स मिडियाया मालिकया जहानया बयानया लिधंसाय् पी चिदम्बरमयात हिरासतय् काःगु खः । अर्थमन्त्री जूगु इलय् चिदम्बरमं थः काय् कर्ती चिदम्बरमया कम्पनीयात आर्थिक ग्वाहालि यायेत इनाप याःगु धासें बयान बियादीगु खः ।
कःनिब्वय् जहाज अवतरण, फुक्क यात्रु सकुशल
लहना न्यूज | ने.सं. ११३९ गुंला पुन्हि (१५ अगष्ट, २०१९), विहिवाः
![](https://www.lahananews.com/sites/default/files/ural_airlines.jpg)
रुसको राजधानी मस्को लिक्कसं थौं विहिवाः छम्ह चालकं कःनिब्वय् जहाज अवतरण याःगु दु ।
मस्कोया जुकोभ्स्की विमानस्थल क्राइमियाया सिम्फेरोपोल वनेगु नितिं ब्वःगु जहाजय् टेक अफ याःगु छुं ई धुंकाः हे चखुंया बथान न्याःगु खः ।
चखुं ठक्कर नयेवं जहाजया निगुलिं इन्जिनय् समस्या वःगु खः ।
जहाज ब्वयेसातं हे यक्व हे संगु छम्ह यात्रुं धाःगु दु ।
जहाज दुनेया मत सीवं यात्रुत तसकं आत्ते जूगु खः । तर चालकं तसकं हे संयम जुयाः जहाजयात कःनिब्वय् आपतकालीन अवतरण याःगु खः ।
युराल एअरलाइन्सया उगु जहाजय् २२६म्ह यात्रु व ७म्ह चालकदलया दुजःपिं दुगु खः ।
विमानस्थलपाखें थ्यंमथ्यं १गू किलोमिटर तापाक्क दुगु कःनिब्वय् जहाज सुरक्षित अवतरण यायेत ताःलाःगु खः । उगु घटनाय् २३म्ह यात्रुपिं घाःपाः जूगु रुसी अधिकारीं न्ह्यथंगु दु ।
जहाजपाखें फुक्क यात्रुयात पिने हःगु दुसा घाःपाः जूपिन्त अस्पताल यंकूगु खः । घाःपाः जूपिं मध्ये ५म्ह मस्त जूगु रुसी स्वास्थ्य मन्त्रालयं न्ह्यथंगु दु ।
युराल एअरलाइन्सं जहाजया पाइलट तसकं हे अनुभवी जूगुलिं सफलतापूर्वक अवतरण यायेफूगु न्ह्यथंगु दु । नां मधाःगु उम्ह पाइलटं ३द्वः घौ उडान यायेधुंकूगु खः ।
राजकीय सम्मानया लिसें सुष्मा स्वराजया अन्त्येष्टि
लहना न्यूज | ने.सं. ११३९ सप्तमि (७ अगष्ट, २०१९), बुधवाः
![](https://www.lahananews.com/sites/default/files/sushma%20swaraj.jpg)
भारतया पूर्व विदेशमन्त्री सुष्मा स्वराजया राजकीय सम्मानया लिसें अन्त्येष्टि यात ।
लोधी रोडय् च्वंगु विद्युतीय शव दाहगृहस वय्कःया अन्त्येष्टि याःगु खः । वय्कःया म्ह्याय् बाँसुरीं अन्तिम संस्कार यानादीगु खः ।
अन्त्येष्टिया झ्वलय् प्रधानमन्त्री नरेन्द्र मोदीलिसें भारतीय जनता पार्टीया नेतापिनिगु उपस्थित दुगु खः । थ्व स्वयां न्ह्यः स्वराजया सीम्ह अन्तिम श्रद्धाञ्जलिया नितिं भारतीय जनता पार्टीया ज्याकुथिइ तयातःगु खः ।
म्हिगः मंगलवाः ६७दँय् मदुम्ह भारतीय पूर्व विदेशमन्त्री स्वराज मदय् न्ह्यः हृदयघात जुयाः न्हू दिल्लीइ च्वंगु एम्स अस्पतालय् भर्ना यानातःगु खः । जलास्येँ प्रत्यारोपण यानादीम्ह स्वराज बांमलाःगु उसाँय्या हुनिं वंगु मे व अप्रिलय् जूगु लोकसभा चुनावय् उम्मेदवारी मबीगु घोषणा यानादीगु खः ।
सन् २०१४ निसें २०१९ या मार्चतक भारतया विदेशमन्त्री जुयादीम्ह स्वराजं भारतीय जनता पार्टी बिजेपीया इलय् दिल्लीया मुख्यमन्त्रीया जिम्मेवारी तकं कयादीगु खः ।
सुष्मा स्वराज दकलय् म्हो २५दँ दुबलय् भारतया केन्द्रीय मन्त्रीमण्डलय् मन्त्री जुयादीम्ह खः । प्यंगू दशक ताःहाकःगु राजनीतिक यात्राय् स्वराज, ईन्दीरा गान्धी लिपा विदेशमन्त्रीया जिम्मेवारी कयादीम्ह निम्हम्ह मिसाम्ह खः । ५दँ भारतया विदेशमन्त्री जुयादीम्ह स्वराजया नेतृत्वय् नेपाल भारतया स्वापू बांलाकेगु कुतः याःसां नं नेपालय् नाकाबन्दी वय्कःया हे इलय् जूगु खः ।
भारतीया पूर्र्विवदेशमन्त्री स्वराज मन्त
लहनान्युज | गुंलाथ्व सप्तमी ११३९ (अगष्ट ७ २०१९)
![](https://www.lahananews.com/sites/default/files/SuShma-Swaraj-.jpg)
भारतया पूर्व विदेशमन्त्री सुष्मा स्वराज दिल्लीया एम्स अस्पतालय् वासः याकेगु झ्वलय् मन्त ।
नीन्यादँ निसे राजनीति यानादिम्ह स्वराज स्वकः तक विधानसभा त्याःगु खः सा न्ह्यकः तक सांसद जुयादिगु खः ।
मदुम्ह स्वराज छम्ह प्रखर वक्ता, प्रभावी राजनीतिकःमि व कुशल प्रशासक न खः ।
भारतीय जनता पार्टीया नेता स्वराज ६७ दँया म्ह खः । वयकः पार्थिव शरीरयात थौं बुधवाः १२ बजे निसेख३ तक अन्तिम श्रदाञ्जलीया लागि पाटी कार्यालय तइगु दु ।
थौं हे लोधी रोडया क्रेमेटोरियमय् राष्ट्रिय सम्मानया साथ अन्तिम संस्कार याये त्यःगु दु ।
बीजेपी हिटलरया नाजी पार्टीथें जुल : पाकिस्तानी प्रधानमन्त्री खान
लहना न्यूज | ने.सं. ११३९ दिल्लागा षष्ठि (६ अगष्ट, २०१९), मंगलवाः
![](https://www.lahananews.com/sites/default/files/imaran%20khan.jpg)
पाकिस्तानका प्रधानमन्त्री इमरान खानं भारतीय जनता पार्टी (बीजेपी) हिटलरया नाजी पार्टीथें जूगु टिप्पणी यानादिल ।
भारत सरकारं संविधानया अनुच्छेद ३७० खारेज यासें जम्मू कश्मीरयात केन्द्र शासित दय्कूगु कन्हय् खुन्हु प्रधानमन्त्री खानं पाकिस्तानी संसदयात सम्बोधन यानादिसें उकथं टिप्पणी यानादीगु खः । प्रधानमन्त्री खानं बीजेपी सरकार थःगु देशया संविधान, सर्वोच्च व जम्मू कश्मीर उच्च अदालतया फैसला व संयुक्त राष्ट्रसंघया प्रावधान विरुद्ध वंगु तकं धयादिल ।
‘आः पुलवाथें जाःगु आक्रमण जुइफइगु धयादिसें प्रधानमन्त्री खानं धयादिल, ‘थुकिया नितिं नं पाकिस्तानयात दोष बी, जब कि थ्व कश्मीरया जनतायात क्वत्यःगुया लिच्वः खः । आः ग्याचिकु दु कि तःधंगु ल्याखय् मुसलमानतय्गु नरसंहार जुइफु ।’
खानं जम्मू कश्मीर प्रकरणय् विश्व समुदायं हस्तक्षेप मयाःसा लिबाइगु तकं धायादिल ।