Display Style:
Column Style
मेक्सिकोलिसे जूगु सम्झौताया छुं छुं बुँदा सार्वजनिक
लहनान्युज | ने.सं. ११३९ तछलाथ्व दशमि (१२ जुन २०१९), बुधवाः
अमेरिकाका राष्ट्रपति डोनाल्ड ट्रम्पं अवैध आप्रवासीयात थःगु देशय् दुहाँ वइगुया नियन्त्रण सम्बधय् मेक्सिकोलिसे जूगु सम्झौताया छुं छुं बुँदा सार्वजनिक यानादीगु दु ।
सम्झौताय् आप्रवासीया नितिं क्षेत्रीय शरणार्थी शिविरया योजना दुगु धयातःगु खः, गुगु थ्व स्वयां न्ह्यः मेक्सिकिोया विदेशमन्त्रीं वार्तालिपा न्ह्यथनेधुंकूगु दु ।
अमेरिका दुहां वये इच्छादुपिं थीथी ल्याटिन अमेरिकी देशया नागरिकयात थुगु शिविरय् तयेगु धाःगु दु । नापं मेक्सिकों ४५न्हुया दुने देशया कडा सीमा सुरक्षा सम्बन्धि कानून लागू यायेगु प्रतिबद्धता नं याःगु विबिसीं न्ह्यथंगु दु । थौंकन्हय् मेक्सिकोय् ग्वाटेमालालिसेया सीमा क्षेत्रय् ६द्वःम्ह सुरक्षाकःमि तैनाथ यानाच्वंगु दु ।
मेक्सिकोलिसेया सम्झौताय् न्ह्यथनातःगु फुक्क जानबारी बी चाहे मजूगु राष्ट्रपति ट्रम्पया धापू खः । मेक्सिकों पाय्छि इलय् थःम्हेस्यां उगु सम्झौतायात कयाः खुलासा याइ धइगु चाहना दुगु राष्ट्रपति ट्रम्पं धयादिल । यदि मेक्सिकों ४५न्हुया दुने अवैध आप्रवासीत अमेरिका दुहां वइगु ज्यायात मपन धाःसा मेमेगु देशयात तकं लिच्वः लाइगु खनेदु ।
अबैध आप्रवासीया ट्रान्जिट जुयाच्वंगु ब्राजिल, ग्वाटेमाला, पनामालिसेंया देशलिसे नं थ्व सम्बन्धय् सहलह जुइफइगु विविसीं न्ह्यथंगु दु ।
अवैध आप्रवासी पनेत अमेरिकां मेक्सिकोया पूवंक हे प्रतिबद्धता चाहे जूसा व नं सम्भव दुगु विश्लेषकपिनिगु धापू दु ।
बेलायतया प्रधानमन्त्रीया नितिं १०म्ह उम्मेदवार
लहनान्युज | ने.सं. ११३९ तछलाथ्व नवमि (११ जुन, २०१९), मंगलवाः
बेलायतया न्हूम्ह प्रधानमन्त्रीया नितिं अन्तिम १०म्ह उम्मेदवारपिनिगु नां सार्वजनिक याःगु दु । प्रधानमन्त्रीया टेरिजा मे नं वंगु वालय् पार्टी नेतृत्वपाखें राजीनामा बीधुंकाः बेलायतया न्हूम्ह प्रधानमन्त्रीया नितिं दावेदारपिनिगु नां सार्वजनिक याःगु खः ।
कन्जरभेटिभ पार्टीया नायः हे प्रधानमन्त्री जुइगु जुइवं सरकार व पार्टी नेतृत्वया नितिं नेतातय् दथुइ धेंधेंबल्ला जूगु खः ।
विदेशमन्त्री जेरेमी हन्ट, पुलांम्ह ब्रेक्जिट मन्त्री डोमिनक राव, स्वास्थ्यमन्त्री माट ह्यानकक व वातावरण मन्त्री माईकल गोभ नं प्रधानमन्त्री पदया नितिं याःगु सार्वजनिक उम्मेदवारया धलखय् दुथ्यानाच्वंगु दु ।
अथे हे पूर्व सांसद मार्क हार्पर, गृहमन्त्री साजिद जाभिद, पूर्व विदेशमन्त्री बोरिस जोन्सन, संसदया पूर्व नायः आन्ड्रिय लिडसम, पूर्व कार्य तथा अवकाश मन्त्री इस्थर म्याकभे व अन्तर्राष्ट्रिय विकास मन्त्री रोरी स्टेवार्टया नां नं दुथ्यानाच्वंगु दु ।
ब्रेक्जिट मस्यौदायात कयाः संसद नापं पार्टी दुने तसकं आलोचना जुइधुंकाः प्रधानमन्त्री मे नं राजीनामा घोषणा यानादीगु खः ।
बलात्कार लिपा स्याःगु द्वपनय् स्वम्हेसित जन्मकैदया फैसला
लहनान्युज | ने.सं. ११३९ तछलाथ्व अष्टमि (१० जुन, २०१९), सोमबाः
भारत प्रशासित जम्मु–काश्मिरय् च्वंगु कठुआय् ८दँ दुम्ह मिसामचायात बलात्कार लिपा स्याःगु द्वपनय् दोषी ठहर जूपिं स्वम्हेसित विशेष अदालतं जन्मकैदया फैसला याःगु दु । छम्हेसित धाःसा अदालतपाखें सफाइ ब्यूगु दु ।
भूतपूर्व सरकारी कर्मचारी सान्जी राम, वय्कःया पासा परेवेश कुमार व प्रहरी अधिकारी दीपक खजुरियायात जन्मकैदया फैसला न्यंकूगु खः ।
मेमेपिं प्रहरी अधिकारीपिं तिलक राज, आनन्द दत्ता व सुरेन्द्र कुमारयात धाःसा न्यादँया कैद सजाँय फैसला याःगु दु । सबुतया अभाव धासें सान्जी रामया काय् बिशालयात धाःसा अदालतं सफाइ ब्यूगु खः । पञ्जाबया पठानकोटय् च्वंगु विशेष अदालतं थगुने जनवरीइ जूगु उगु घटनाया ८म्ह अभियुक्तमध्ये ६म्हेसित थौं सोमबाः दोषी ठहर याःगु खः ।
अभियुक्तमध्ये छम्ह मिजंमचा तकं दुगु खःसा भारतया कानूनकथं नाबालिग हे जूगुलिं वय्कःयात अलग्ग हे सजाँय जुइगु बिबिसीं न्ह्यथंगु दु ।
मुस्लिम समुदायया उम्ह मिसामचाया सीम्ह कठुआय् च्वंगु जंगलय् लूगु खः । व लिपा हे हत्याया द्वपं बियाः च्याम्हेसित ज्वंगु खः । गुकिया विरोधय् दक्षिणपन्थी हिन्दू समूह व वकिलतसें प्रदर्शन यायेधुंकाः उगु विषय चर्चाय् वःगु खः ।
अभियुक्तपिं फुक्क घुमन्ते मुसलमान समुदायलिसे भूमि विवादय् दुथ्याःगु स्थानीय हिन्दू समुदायया दुजः जूगु प्रहरीं न्ह्यथंगु दु ।
पाकिस्तानका पूर्वराष्ट्रपति जरदारीयात ज्वन
लहनान्युज | ने.सं. ११३९ तछलाथ्व अष्टमि (१० जुन, २०१९), सोमबाः
पाकिस्तानका पूर्वराष्ट्रपति आसिफ अली जरदारीयात ज्वंगु दु ।
पाकिस्तान पिपुल्स पार्टीया सह–अध्यक्ष जुयादीम्ह जरदारीयात नेशनल अकाउन्टिबिलिटी ब्यूरो (एनबी)या पुचलं ज्वंगु खः ।
इस्लामावाद हाईकोर्टं छगू मुद्दाय् जरदारी व वय्कःया केहेँया अग्रिम जमानतया निवेदन खारेज याःगु खः ।
न्यायाधीश आमिर फारुक व मोहसिन अख्तर कियानीया इजलासं निवेदन खारेज यासें ज्वनेत उजं ब्यूगु खः ।
अष्ट्रेलियाय् पत्रकारपिन्त खानतलासी
लहनान्युज | ने.सं. ११३९ तछलाथ्व तृतिया (६ जुन, २०१९), विहिवाः
अस्ट्रेलियाया प्रहरीं अनया पत्रकारपिन्त खानतलासी यायेगु क्रम न्ह्याकाच्वंगु दु ।
पत्रकारपिन्त लक्षित यासें खानतलासीयात निरन्तरता बियाः थौं विहिवाः नं अष्ट्रेलियन ब्रोडकाष्टिङ्ग कर्पोरेशन (एबिसी)या सिड्नीइ च्वंगु मू ज्याकुथिइ छापा मारे याःगु दु ।
अफगानिस्तानय् अष्ट्रेलियाली सेनां दुव्र्यवहार याःगु धइगु खबरया सन्दर्भय् उकथं छापा मारेयाःगु बिबिसीं न्ह्यथंगु दु । खानतलासीया नितिं एबिसी ज्याकुथिइ थ्यंबलय् प्रहरीं समाचार निर्देशक व संवाददाताया नामय् जारी यानातःगु सर्च वारेन्ट ज्वनावंगु खः ।
एबिसीं सन् २०१७य् न्ह्याकूगु ‘द फाइल्स’ श्रंखलाय् अफगानिस्तानय् परिचालन याःगु अष्ट्रेलियाया विशेष सैन्य फोर्सया सेनातसें गैरकानूनी हत्या व दुव्र्यवहार याःगु तथ्य पितहःगु खः । सरकारया गोप्य सरकारी दस्ताबेज सार्वजनिक याःगुलिं छापा मारे यायेमाःगु अष्ट्रेलियाली प्रान्तीय प्रहरीं न्ह्यथंगु दु ।
थ्व स्वयां न्ह्यः नं वंगु मंगलवाः न्यूज कर्पया पत्रकारया छेँय् नं प्रहरीं खानतलासी याःगु खः ।
प्रहरी छापायात कयाः अष्ट्रेलियाय् विरोध जुयाच्वंगु दु । अष्ट्रेलियाया पत्रकार संगठनं पत्रकार व सञ्चारमाध्यमयात यानाच्वंगु थुकथंया खानतलासी देशया प्रेस स्वतन्त्रताया विपक्षय् दुगु न्ह्यथंगु दु । घटनाया अष्ट्रेलियन ब्रोडकाष्टिङ्ग कर्पोरेशन (एबिसी) नं विरोध याःगु दु ।
