Display Style:
Column Style
नरेन्द्र मोदीं थौं पद व गोपनीयताया सपथ ग्रहण याइगु
लहनान्युज | बछलागा एकादशी ११३९ (मे ३० २०१९)
भारतया प्रधानमन्त्री नरेन्द्र मोदीं थौं पद व गोपनीयताया सपथ ग्रहण याइ जुगु दु । मोदीयात राष्ट्रपति रामनाथ कोविन्दं बहनिया ७ बजे सपथ ग्रहण याइगु ज्याझ्वः दु ।
छु दिं न्ह्यःजक क्वचाःगु १७ क्वःगु लोकसभा निर्वाचनय् भाजपां स्पष्ट बहुमत हया मोदी निक्वःगु कार्यकालया लागि प्रधानमन्त्री जुइ त्यःगु खः ।
मोदीया सपथग्रहण समारोहय् ब्बति कायेगु लागि प्रधानमन्त्री केपी शर्मा ओली थौं हे दिल्ली वने त्यःगु खः ।
थौं जुइगु सपथ ग्रहण समारोहय् नेपाल, भुटान, मोरिससया प्रधानमन्त्री नाप श्रीलंका, बंगलादेश, म्यानमारया राष्ट्रपति पिनिगु न ब्बति दइ ।
बेलायती प्रधानमन्त्री थेरेसापाखें राजीनामाया घोषणा
लहनान्युज | ने.सं. ११३९ बछलागा षष्ठि (२४ मे, २०१९)
बेलायती प्रधानमन्त्री थेरेसा मे नं राजीनामाया घोषणा यानादीगु दु ।
वय्कलं वइगु जुन महिनाया ९ तारिखय् कन्जरभेटिभ पार्टीया नेताया पदपाखें राजीनामा बीगु धयादीगु दु । पार्टी नेतापाखें राजीनामा बीधुंकाः न्हूम्ह प्रधानमन्त्री ल्ययेगु नितिं लँपु चाली ।
बेलायत यूरोपेली युनियनपाखें पिहां वनेगु विषयस थःम्हेस्यां देशबासीया समर्थन कायेत यक्व हे कुतः याःसां नं ताःमलाःगु धयादीगु दु । आः न्हूम्ह प्रधानमन्त्रीपाखें नं उगु कुतः न्ह्यानाच्वनीगु प्रधानमन्त्री में धयादिल । वय्कलं थःम्हेस्यां पद त्वःतेगु विषयस कन्जरभेटिभ पार्टीया नेतातय्गु नं समर्थन दुगु धयादीगु दु ।
छगू भावुक सम्बोधनय् थेरेसां प्रधानमन्त्री जुयाः ज्या यायेगु थःगु जीवनया दकलय् लसताया ई जूगु धयादीगु दु ।
भाजपां सरकार दयेकीगु निश्चित, मोदी हाकनं प्रधानमन्त्री जुइगु
लहनान्युज | ने.सं. ११३९ बछलागा पञ्चमि (२३ मे, २०१९)
भारतीय लोकसभा चुनावय् सत्तारुढ गठबन्धनं तसकं न्ह्यःने लानाच्वंगु दु । प्रारम्भिक मतगणनाय् भारतीय जनता पार्टीं जक २९१गू सिटय् न्ह्यःने लानाच्वंगु दु । अथे हे कांग्रेस ५१गू सिटय्
न्ह्यःने लानाच्वंगु दु ।
लोकसभाया मुक्कं ५४३ सिटमध्ये बहुमतया नितिं २७२ सिट माः । सन् २०१४या चुनावय् भारतीय जनता पार्टीं २८२ सिट त्याकूगु खः । भारतीय लोकसभाया दकलय् अप्वः सिट ८०गू सिट दुगु उत्तर प्रदेशय् नं आःया चुनावय् भारतीय जनता पार्टी न्ह्यःने हे लानाच्वंगु दु । भाजपां ५६गू सिटय् न्ह्यःने लानाच्वंगु दु । थ्व स्वयां न्ह्यःया चुनावय् नं भाजपां उत्तर प्रदेशपाखें ७१गू सिट त्याकूगु खः ।
थ्व हे झ्वलय् भारतीय कांग्रेसका नायः राहुल गान्धीं चुनावी हार स्वीकार यानादीगु दु व प्रधानमन्त्री नरेन्द्र मोदीयात भिन्तुना देछानादीगु दु ।
मतगणना जुयाच्वंगु इलय् पत्रकार सम्मेलन यानाः राहुलं पराजयया जिम्मेवारी कायेगु धयादीगु दु । विचारधारया लडाई न्ह्यानाच्वंगु धयादिसें वय्कलं विचलित मजुइत पार्टीइ नेता व कार्यकर्तातय्त इनाप यानादिल । राहुल थः हे अमेठीइ भारतीय जनता पार्टीया उम्मेदवार स्मृति ईरानीलिसे पराजित जूगु दु । अथेखःसां मेगु क्षेत्रपाखें चुनाव त्याकादीम्ह राहुलं अमेठीया जनताया फैसलायात सम्मान यायेगु धयादिल ।
मतगणना स्थानीय ईकथं सुथसिया ८ताः इलंनिसें न्ह्याःगु खः । हलिमय् दकलय् अप्वः ९०गू करोड मतदातापिन्सं ब्वति काःगु चुनाव न्हय्गूगु चरण यानाः वंगु आइतवाः जक क्वचाःगु खः
वीडोडो निगूगु कार्यकालया नितिं इण्डोनेशियाया राष्ट्रपतिइ निर्वाचित
ने.सं. ११३९ बछलागा तृतिया (२१ मे, २०१९), मंगलवाः
राष्ट्रपति जोको वीडोडो निगूगु कार्यकालया नितिं इन्डोनेशियाया राष्ट्रपति जुयादीगु दु ।
वंगु महिनाय् राष्ट्रपतीय निर्वाचनय् पूर्व सेनापति प्रावाओ सुवियान्तोयात बुकूसें वीडोडो हाकनं निर्वाचित जुयादीगु खः । निर्वाचनय् वीडोडों ५५ फुति ५गू व वय्कःया निकतम प्रतिद्वन्दी सुवियान्तों ४४गू फुति ५गू प्रतिशत मत काःगु अनया निर्वाचन आयोगं न्ह्यथंगु दु ।
१९गू करोड २०गू लख मतदातां ब्वति काःगु इन्डोनेशियाया चुनावय् थ्यंमथ्यं २०द्वःम्ह स्थानीय व राष्ट्रिय सांसदपिनिगु चुनावया नितिं मतदान जूगु खः ।
धर्मपाखें निर्वाचनयात प्रभावित याःगु धइगु आलोचनाया दथुइ स्वतन्त्र अनगमनकर्तापिन्सं धाःसा निष्पक्ष निर्वाचन जूगु दावी याना वयाच्वंगु दु ।
अमेरिकां भारतयात व्यापार सहुलियत बन्द
लहनान्युज | सिल्लागा औंशी ११३९ (मार्च ६ २०१९)
संयुक्तराज्य अमेरिकां भारतयात बिया वयाच्वंगु व्यापार सहुलियत बन्द यायेगु घोषणा याःगु दु । तर भारत धाःसा अमेरिकी सहुलियत कटौतीं निगु देय् दथुइ व्यापारय् छु हे असर मजुइ दाबी याःगु दु ।
अमेरिकां भारतपाखे वार्षिक करिब ८० अर्ब डलर बराबरया सामान निर्यात जुया वयाच्वंगु खः । भारतया वाणिज्य सचिव अनुप वद्धवनया अनुसार अमेरिकी सहुलियत प्रणाली (जीएसपी) अन्तर्गत भारतपाखें करिब ६ अर्ब डलर बराबरया सामान जक निकासी जुइ धका धाःगु खः ।
अमेरिकी व्यापार प्रमुखया ज्याकुथिं पिकाःगु छगु वक्तव्य जारी यासें भारत व टर्कीयात बिया वयाच्वंगु जीएसपी दर्जा तत्कालै खारेज यायेगु धका धाःगु खः ।
