Display Style:
Column Style
डब्ल्यूएचओयात ३ करोड डलर बिइगु चीनया घोषणा
लहनान्युज | चौलागा औसी ११४०, बैसाख ११ बिहिवाः
चीनं विश्व स्वास्थ्य संगठन (डब्ल्यूएचओ)यात ३ करोड अमेरिकी डलर बिइगु घोषणा याःगु दु ।
अमेरिकां डब्ल्यूएचओयात ग्वाहालि मयायेगु निर्णय याःगु छु ई लिपा चीनं ग्वाहालि यायेगु घोषणा याःगु दु । चीनं कोरोना भाइरस (कोभिड(१९) विरुद्धया लडाइँया लागि थुगु ग्वाहालि यायेत्यःगु खः ।
थ्व स्वया न्ह्यः अमेरिकां डब्ल्यूएचओं थुगु महामारीयात नियन्त्रण यायेत माःगु पलाः मल्ह्वःगु आरोप बिसे आतक बिया वया च्वंगु ग्वाहालि मयायेगु निर्णय याःगु खः ।
चिनियाँ विदेशमन्त्री कङ शुआङं थ्व स्वया न्ह्यः निगु करोड डलर ग्वाहालि यायेगु धाःगु आः स्वगु करोड डलर मेगु ग्वाहालि याये त्यःगु धका धाःगु खः । थुकिइ हलियकं स्वास्थ्य प्रणाली
बलाकिगु ग्वाहालि जुइ धका धाःगु दु ।
अमेरिकी राट्रपति डोनाल्ड ट्रम्पं डब्ल्यूएचओयात पक्षपात याःगु आरोप बिया वयाच्वंगु खः । अमेरिकी राट्रपति ट्रम्पं कथं दँय् दँस अमेरिकाय् कर पुलिइपि मनू तयेस डब्ल्यूएचओ यात ४० निसे ५० करोड डलर बिया वया च्वंगु खः । चीनं चार करोड डलर ग्वाहालि याना वया च्वंगु खः ।
कोरोना परीक्षणया नमूना यंकाच्वंम्हेसित गोलिं कयेकाः स्यात
लहना न्यूज | ने.सं. ११४० चौलागा चतुर्दसि (२१ अप्रिल २०२०), मंगलवाः
कोरोना भाइरस (कोभिड–१९) परीक्षणया नितिं स्वाब मुंकाः प्रयोगशालापाखे वनाच्वंम्ह छम्ह सवारी चालकयात म्यान्मारय् गोलिं कयेकाः स्याःगु दु ।
म्यान्मारया पश्चिमी प्रान्त रखाइनपाखें स्वाब ज्वनाः याङ्गुन वनाच्वंम्ह छम्ह ल्याय्म्हयात गोलिं कयेकाः स्यानाब्यूगु खः । गोलिं लानाः २८दँ दुम्ह प्याए सोन विन माउङ सीगु खँ धाःगु दु ।
संयुक्त राष्ट्र संघयाकथं विश्व स्वास्थ्य संगठनया गाडीइ स्वाब परीक्षणया नितिं याङ्गुन यंकाच्वंगु इलय् गोलि कयेकूगु खः ।
सीम्ह मनू स्वदँ न्ह्यःनिसें विश्व स्वास्थ्य संगठन (डब्लूएचओ)या नितिं ज्या याना वयाच्वंम्ह खः ।
उगु आक्रमणय् छम्ह स्वास्थ्यकःमि नं घाःपाः जूगु दुसा वय्कःया आः वासः जुयाच्वंगु धाःगु दु ।
आःतक म्यान्मारय् सच्छि व झिंगुुम्ह मनूयात कोरोना भाइरसया संक्रमण जूगु दुसा न्याम्ह सीधुंकूगु दु ।
थुगु लागाय् सरकारी सेना व अराकन चरमपन्थी दथुइ युद्ध जुयाच्वंगु दु । कोरोना भाइरसया महामारीया इलय् युद्धविरामया नितिं इनाप याःसां नं युद्ध द्यूगु मदुनि । म्यान्मारया थीथी चरमपन्थीं महामारीइ युद्धविरामया घोषणा याःगु खः । तर म्यान्मारया सेनां उकियात अस्वीकार याःगु खः ।
आक्रमणया जिम्मेवारी आःतक छुं नं पक्षं काःगु मदुनि । छगू पुचलं मेगु पुचःयात द्वपं बियाच्वंगु दु । दच्छि न्ह्यःनिसें थुगु लागाय् युद्ध न्ह्यानाच्वंगु खः । तर, लिपांगु इलय् आक्रमण अप्वया वनाच्वंगु दु ।
म्यान्मारया सेनाया प्रवक्ता टुन टुन नयीं सरकारयात ग्वाहालि यानाच्वंम्ह चालक स्यायेमाःगु सेनायात छुं नं कारण मदुगु धाःगु दु ।
क्यानाडाय् लाथेपाथे गोलिं कयेकूगु इलय् १६म्ह सित
लहना न्यूज | ने.सं. ११४० चौलागा त्रयोदसि (२० अप्रिल २०२०), सोमवाः
क्यानाडाया नोभा स्कटिया प्रान्तय् प्रहरीया भेषय् वःम्ह छम्ह बन्दुकधारीं म्हिगः आइतवाः लाथेपाथे गोलिं कयेकूगु इलय् म्होतिं नं १६म्ह सीगु दु ।
प्रहरीया कथं कोरोना भाइरसया हुनिं लकडाउन जुयाच्वंगुलिं मनूत छेँ दुने दुगु इलय् उम्ह मनू छेँछेँय् दुहांवनाः मनूतय्त गोलिं कयेकूगु व गुलिखे छेँय् मि तयाब्यूगु खः ।
बन्दुकधारी धाःसा प्रहरी कारबाहीस सीगु बिबिसीं न्ह्यथंगु दु ।
सीपिं मध्ये छम्ह प्रहरी अधिकृत नं जूगु धाःगु दु । हेलिफ्याक्सपाखें उत्तरय् थ्यंमथ्यं १०० किलोमिटरया दुरीइ लाःगु चीधंगु ग्रामीण शहर पोर्टापिय् उगु घटना जूगु खः । प्रहरीया कथं छगू चिखागु छेँया दुने व पिने मनूतय्गु सीम्ह लूगु खः ।
घटना लिपा हे प्रहरीं स्थानीयवासीपिन्त छेँ दुने च्वनेत व छेँय् तालं ग्वयेत इनाप याःगु खः ।
प्रहरीं बन्दुकधारी ५१दँ दुम्ह ग्याब्रियल वोर्टम्यान जूगु धाःगु दु । वय्कः नं पोर्टापिकया हे अस्थायी बासिन्दा जूगु प्रहरीं न्ह्यथंगु दु । वोर्टम्यान प्रहरीया लं पुनाः रोयल क्यानेडियन च्वयातःगु प्रहरी कारय् वःगु खः ।
क्यानेडियन प्रहरीया प्रवक्ता डानियल ब्राइनं उम्ह संदिग्धलिसें १६म्ह सीगु पुष्टि याःगु दु ।
फ्रान्सेली जलसेना कोरोनापाखें संक्रमित
लहना न्यूज | ने.सं. ११४० चौलागा त्रयोदसि (२० अप्रिल २०२०), सोमवाः
फ्रान्सेली जलसेनाका द्वःछि व ८१म्हेसिके कोरोना भाइरसया संक्रमण खनदुगु दु । चाल्र्स द गोल नाबिक रुशोनोटिक जहाजय् च्वंपिं २द्वः व १०म्ह सैनिकया कोरोना परीक्षण याःगु खः । सैनिकतय्के कोरोनाया लक्षण खनेदयेधुंकाः परीक्षण याःगु इलय् द्वःछि व ८१म्हेसिके संक्रमण जूगु खनेदुगु रक्षामन्त्री फ्लोरेन्स पार्लीं सार्वजनिक यानादीगु खः ।
राष्ट्रियसभाया रक्षा, सुरक्षा समितिइ रक्षामन्त्रीं लःल्हानादीगु रिपोर्टकथं कोरोनापाखें संक्रमित द्वःछि व ८१म्ह मध्ये ५४५म्हेसिके लक्षण खनेदुगु खः । मेपिं २४म्ह तुलोय च्वंगु सेन्ट आन मिलिटरी अस्पताल भर्ना याःगु दुसा छम्हेसित संघन उपचार कक्ष (आइसीयू)य् भर्ना याःगु दु ।
कोरोना भाइरस नेगेटिभ खनेदुपिं सैनिकतय्त नं क्वारेन्टाइनय् तःगु दु । परीक्षण जूपिं फुक्कसिगु विस्तृत रिपोर्ट धाःसा तयार मजूनिगु धाःगु दु ।
थुगु घटनालिपा राष्ट्रियसभाया विदेश मामिला, रक्षा व सशस्त्र बल समितिया नायः सिनेटर क्रिश्चियन क्याम्बनं रक्षामन्त्री फ्लोरेन्स पार्लीयात सेनाया दुजःपिं अपरेशनय् वने न्ह्यः व्यवस्थित स्वास्थ्य जाँचया नितिं इनाप यायेगु संकेत ब्यूगु दु ।
मिसनय् खटय् जूपिं सैनिकतय्के कोरोना भाइरसया लक्षण खनेदयेधुंकाः मिसन पूवनेगु स्वयां निवाः न्ह्यः हे लिहांवःगु दु ।
निरन्तर समुद्री यात्राय् वनाच्वंपिं सैनिकतय्त गुथं कोरोना भाइरस संक्रमण जुल धइगु रहस्यमय जूगु खँ धाःगु दु ।
भारतय् कोरोना न्यासः म्ह मनूत सित
लहनान्युज | चौलागा द्धादशी ११४०, बैसाख ७ आइतवाः
भारतय् कोरोना भाइरस (कोभिड–१९) पाखे न्यासः म्ह मनूत सिइगु दु ।
भारतया स्वास्थ्य मन्त्रालयया तथ्यांक कथं आतक कोरोना भाइरसया कारण सिइपिनिगु ल्याः न्यासः व न्ह्यम्ह थ्यःगु दु । वःगु २४ घण्टाय् कोरोना भाइरसं नीन्ह्यम्ह थ्यःगु दु ।
संक्रमित जुपिनिगु ल्याः वःगु २४ घण्टाय् द्धःछि व स्वसः न्हुपि संक्रमित जुपि पिहा वःगु दु । आतक संक्रमित जुपिनिगु ल्याः १५ द्धः व ७१२ म्ह थ्यःगु दु ।
भारतया दकदय् अप्वो संक्रमित जुगु महाराष्ट्रय् २११ म्ह कोरोना भाइरसया कारण सिइगु दु । अथेहे, मध्यप्रदेशय् ७० म्ह, गुजरातय् ५३ म्ह, दिल्लीइ ४२ म्ह सिइ धुकुगु दु ।
भारतया उत्तर प्रदेशय् आतक ९६९ म्ह संक्रमित जुगु दुसा १४ म्ह सिइ धुकुगु दु । अथेतु, बिहारय् ८६ म्ह संक्रमित जुुया निम्ह सिइगु दु ।
आतक भारतय् २२३१ म्ह संक्रमित जुपि वास याका छेँय् लिहा वने धुकगु दु ।
