Display Style:
Column Style
वुहानय् कोरोना सिपिनिगु ल्याः १२९० म्ह थपे जुल
लहनान्युज | चौलागा एकादशी ११४०, बैसाख ५ शुक्रवाः
![](https://www.lahananews.com/sites/default/files/bu_2.jpg)
कोरोना भाइरस (कोभिड(१९) पिहा वःगु थाय् चीनया वुहानय् अन महामारीं सिपिनिगु ल्याः द्धःछि व २९० म्ह थपे जुगु दु ।
चिनियाँ सञ्चारमाध्यमया कथं थ्व स्वया न्ह्य मलुगु व ल्याखाय् छुटे जुपि १२९० म्ह लुगु दु । महामारीया इलय् अस्पतालय् पर्याप्त भर्नाया अभावया कारण इमिगु ल्याः छुटे जुगु खः ।
वुहानय् कोभिड(१९ पाखे सिपिनिगु ल्याः पुनरावलोकन यासे स्वद्धः व ८६९ थ्यःगु दु । समग्र संक्रमितया ल्याः न ३२५ म्ह थपे जुगु दु ।
वुहानय् दक्को याना संक्रमित जुपिनिगु ल्याः ५० द्धः व ३३३ म्ह थ्यःगु दु ।
चीनं सार्वजनिक याःगु तथ्यांकय् हलियकं हे आशंका उत्पन्न जुया च्वंगु इलय् वुहानय् थःगु तथ्यांकय् पुनरावलोकन याःगु दु ।
थ्व स्वया न्ह्यः चीनय् वास्तविक सिपिनिगु ल्याः घटे याना वयाच्वंगु खः ।
अमेरिकाय् कोरोनां ३२ द्धः सित
लहनान्युज | चौलागा एकादशी ११४०, बैसाख ५ शुक्रवाः
![](https://www.lahananews.com/sites/default/files/AMI.jpg)
कोरोना भाइरस संक्रमणया कारण अमेरिकाय् ३२ द्धः व ८६८ म्ह मनूत सिइगु द । अथेहे न्यूयोर्कय् जक ११ द्धः व ४७७ म्ह मनूत सिइगु दु ।
अमेरिका कोरोना संक्रमणपाखे दकलय् अप्वो प्रभावित जुगु देय् खः ।
जोन हप्किन्स विश्वविद्यालयया तथ्यांक कथं अमेरिकाय् कोरोना संक्रमित जुपिनिगु ल्याः ६ लाख ६७ द्धः व २२५ म्ह थ्यःगु दु ।
अमेरिकाय् लच्छिया दुने २ करोड १० लाख म्हसिया जागिर वने धुकुगु दु । आतक अमेरिकाय् बेरोजगारीया ल्याः थ्व न्हुगु रेकर्ड ज्ुगु दु ।
अमेरिकाया श्रम विभागया कथं देय् यकं ११ अप्रिल तक ५२ लाख म्ह बेरोजगार जुइ दुकुगु दु । वया लिपा ६६ लाख म्हसिया जागिर वःगु दु ।
ब्राजिलया स्वास्थ्यमन्त्री बर्खास्त
लहना न्यूज | ने.सं. ११४० चौलागा दसमि (१७ अप्रिल २०२०), शुक्रवाः
![](https://www.lahananews.com/sites/default/files/brazil-health-minister-sacked.jpg)
कोरोना भाइरस संक्रमण पनेगु मुद्दाय् विवाद जुयाच्वंगु इलय् ब्राजिलया राष्ट्रपति जायर बोलसोनारों स्वास्थ्यमन्त्री लुइज हेनरिक मनडेटायात पदपाखें चीकूगु दु ।
निम्हं नेतातय्गु मतभेद वंगु आइतवाः सार्वजनिक जूगु खः । कोरोना संक्रमण न्यंके मबीगु उपाययात कयाः स्वास्थ्यमन्त्री मनडेटां छगू टेलिभिजनया ज्याझ्वलय् सरकार छधी छप्पँ जुयाः थुकियात ज्यंकेमाःगु अभिव्यक्ति बियादीगु खः । वय्कःया थुगु अभिब्यक्ति खुल्ला हे राष्ट्रपतियात कुंखिनेगु ज्या जूगुकथं काःगु खः ।
स्वास्थ्यमन्त्री हेनरिक मनडेटां कोरोना भाइरसपाखें बचय् जुइत सामाजिक दुरी कायम यायेमाःगु लिसेंया नियम नालेमाःगु धया वयाच्वनादीगु खः । वय्कलं थःथःगु प्रदेशय् लकडाउन याःगु धासें गर्भनरपिन्त च्वछानादीगु खः ।
तर लकडाउन, सामाजिक दुरी लिसेंया ज्याखं जनताय् ग्याचिकु ब्वलनीगु जूगुलिं थथे यायेमज्यूगु राष्ट्रपति बोलसोनारोया धापू खः । वय्कःया धापूकथं मनूतय् ग्याचिकु मदयेक थःगु नियमित ज्या याके बीमाः । थ्व स्वयां न्ह्यः नं राष्ट्रपति बोलसोनारों कोरोना भाइरसयात सामान्य फ्लू धयादिसें ग्यायेम्वाःगु धयादीगु खः ।
हेनरिकं थः बर्खास्त जूगु खँ थःम्हेस्यां हे ट्वीट यानाः जानकारी बियादीगु खः ।
राष्ट्रपतिं स्वास्थ्यमन्त्रीयात बर्खास्त याःगु बुखँ पिदनेवं ब्राजिलया नागरिकतसें छेँया बार्दलीइ च्वनाः भाँडाकुडा थासें राष्ट्रपतिया विरोध याःगु बिबिसीं न्ह्यथंगु दु ।
जोन हप्किन्स विश्वविद्यालयया तथ्यांककथं ब्राजिलय् ३०द्वः ४२५म्ह मनूत कोरोना संक्रमित जुयाच्वंगु दुसा १९२४म्ह मनूत सीधुंकूगु दु ।
दक्षिण कोरियाय् राष्ट्रपति मुनया पार्टीयात बहुमत
लहना न्यूज | ने.सं. ११४० चौलागा नवमि (१६ अप्रिल २०२०), विहिवाः
![](https://www.lahananews.com/sites/default/files/moon.jpg)
कोरोना भाइरस (कोभिड–१९)या प्रकोप दथुइ दक्षिण कोरियाय् जूगु संसदीय चुनावय् राष्ट्रपति मुन जाए इनया पार्टी त्याःगु दु ।
कोरोना भाइरसया प्रकोप शुरु जुइधुंकाः थुखे आम निर्वाचन याःगु दक्षिण कोरिया न्हापांगु देय् खः । कडा सुरक्षा व सामाजिक दूरी कायम यासें क्वचाःगु चुनावय् २८दँ थुखे दकलय् अप्वः मतदान जूगु कोरिया हेराल्डं न्ह्यथंगु दु ।
मतगणनाया अन्तिम चरणय् थ्यंगु इलय् सत्तारुढ डेमोक्रेटिक पार्टीं स्वसःगु सीट मध्ये १६३गू सीट त्याःगु बिबिसीं न्ह्यथंगु दु । गठबन्धनय् दुगु मेगु प्लाटफर्म पार्टीं १७गू सीट व डेमोक्रेटिक पार्र्टीं १८०गू सीटलिसें सरकार दयेकीगु सम्भावना दुगु अन्तर्राष्ट्रिय सञ्चारमाध्यमं न्ह्यथंगु दु ।
कोरोना भाइरस विरुद्धया ल्वापुइ प्रभावकारी पलाः ल्ह्वंगुलिं राष्ट्रपति मुनया पार्टी त्याःगु विश्लेषकतसें दाबी याःगु दु ।
बिबिसीया सोल सम्बाददाता लाउरा विकरयाकथं जनवरीइ राष्ट्रपति मुनया पार्टीयात कयाः जनसमर्थन तसकं म्हो जक दुगु खः । दक्षिण कोरियाली अर्थतन्त्र कुहां वनाच्वंगु, उत्तर कोरियालिसेया वार्ता ताःमलाःगु व थीथी राजनीतिक काण्डं मुनया पार्टीया लोकप्रियता कुहांवःगु लाउराया विश्लेषण दु । तर कोरोना भाइरस विरुद्धया ल्वापुइ आक्रामक रणनीतिलिसें प्रभावकारी पलाः न्ह्याकेधुंकाः मुनया लोकप्रियता हाकनं च्वन्ह्याःगु खः ।
ट्रेसिङ, ट्रायकिङ व परीक्षणय् आक्रामक ढंगं न्ह्याःवंगुलिं न्हियांन्हिथं च्यासःम्हतक संक्रमण जूगु अवस्थाय् थौंकन्हय् सरकारं स्वीम्हय् थ्यंकूगु दु ।
थुगु चुनाव त्यायेधुंकाः डेमोक्रेटिक पार्टीं सन् १९८७ स कोरियाय् प्रजातान्त्रिक चुनाव लिपा दकलय् तःधंगु बहुमतया सरकार दयेकीगु जूगु दु ।
९९दँ दुम्ह ज्याथःम्ह कोरोना विरुद्धया ल्वापुइ त्यात
लहना न्यूज | ने.सं. ११४० चौलागा नवमि (१६ अप्रिल २०२०), विहिवाः
![](https://www.lahananews.com/sites/default/files/ermando-piveta.jpg)
निक्वःगु विश्वयुद्ध ल्वाःम्ह छम्ह ब्राजिलया ज्याथःम्ह कोरोना भाइरस विरुद्धया ल्वापू त्याःगु दु । कोरोना भाइरसपाखें संक्रमित निक्वःगु विश्वयुद्ध ल्वाःम्ह ब्राजिलया नागरिक एर्माण्डो पिभेटा म्हीग मंगलवाः ब्रासिलियाय् च्व्ंगु आम्र्ड फोर्सेस अस्पतालपाखें डिस्चार्ज जूगु खः ।
सेखं चायेधुंकाः वय्कः च्यान्हु न्ह्यः अस्पताल भर्ना जुयादीगु खः । स्वास्थ्य परीक्षण याःगु इलय् वय्कःयाके कोरोना भाइरसया संक्रमण पुष्टि जूगु खः । चिकित्सकतसें वय्कःयात वंगु मार्च २३ तारिखनिसें निगरानी यानाच्वंगु खः ।
ज्याथःम्ह जूगुलिं संक्रमण जूगु तसकं हे जोखिम जूगु जुल । तर फुक्कसित अजूचायेकेकथं वय्कःया उसाँय् बांलाना वल व ल्वय् विरुद्धया ल्वापुइ त्यात । ‘वय्कःया केसं जिमित अझ हःपाः ब्यूगु दु ।’ ब्राजिलया संक्रामक रोग विशेषज्ञ हेमर्सन क्रुजं सीएनएनलिसे जूगु खँल्हाबल्हाया झ्वलय् धयादिल ।
ब्राजिलया रक्षा मन्त्रालययाकथं कोरोना भाइरसया संक्रमणलिपा ल्वय् लंम्ह एर्माण्डो दकलय् ज्याथःम्ह खः ।
थ्व स्वयां न्ह्यः निक्वःगु विश्वयुद्धय् ब्वति कयादीम्ह ९९दँ दुम्ह छम्ह बेलायती नागरिक नं कोरोना भाइरसया संक्रमण लिपा लंगु खः । बेलायती नागरिक अल्बर्ट च्याम्बर्स कोरोना भाइसरया संक्रमण लिपा लंना छेँय् लिहां वनेधुंकूगु दु ।