अमेरिकां युक्रेनय् थःगु सेना छ्वइगु निर्णय
लहनान्युज | सिल्लाथ्व द्धितीया ११४२, माघ २० बिहीवाः
![](https://www.lahananews.com/sites/default/files/us-army.jpg)
युक्रेनय् रुसं आक्रमण यायेफइगु धासे अमेरिकां थुगु हे वाःया दुने युरोपय् थःगु सेना छ्वयेगु निर्णय याउगु दु।
अमेरिकी राष्ट्रपति जो बाइडनं करीब निद्धः सैनिक युरोप सीमाय् छ्वयगु निर्णय यानागु धका ह्वाइट हाउसया अधिकारीयात उद्धृत यासे बीबीसीं धाउगु दु। थुगु सैनिकपि फोर्ट ब्राग, नर्थ क्यारोलिनापाखे पोल्याण्ड व जर्मनी छ्वयेत्यःगु खः।
अथेहे जर्मनीइ न्हापानिसे च्वनाच्वंपि द्धःछि सैनिकयात रोमानिया तैनाथ याइ धका बीबीसीं धाउगु दु। युरोपय् छ्वइपि अमेरिकी सैनिक युद्धय् सामेल जुइ मखु।रुसं युक्रेनय् आक्रमण यायेगु योजनाया खण्डन यासे, अमेरिकां जबरजस्ती युद्धय् घ्वायेत स्वंगु धका धाउगु दु।
अय्न रुसं युक्रेनया सीमा क्षेत्रय् करीब १ लाख सैनिक तैनाथ यानातःगु दु। युक्रेन धासा आक्रमणया आतंक अर्थव्यवस्था स्यनिइगु धासे पश्चिम देशय् इनाप याउगु खः। रुसं युक्रेनया दक्षिणी क्षेत्र क्राइमिया कब्जा याउगु च्यादँ लिपा संकट वंगु खः। रुस समर्थित विद्रोही समूह युक्रेनया पूर्वी क्षेत्रय् पकद दु।
सन् २०१४ निसे आःतक करीब १४ हजार म्हेसिगु ज्यान वने धुकुगु दु।
मुम्बई, दिल्लीइ राज्यय् चान्ह्यया कर्फ्यु हटे याइगु
लहनान्युज | सिल्लाथ्व पारु ११४२, माघ १९ बुधवाः
![](https://www.lahananews.com/sites/default/files/cinima.jpg)
कोरोना भाइरस संक्रमणया स्वक्वगु लहर मत्थर जुगुलि भारतया मुख्य राज्य मुम्बई, दिल्ली लगायत राज्यय् चान्ह्यया कर्फ्यु आदेश जारी याउगु दु।
मुम्बईलय् जनवरी ९ तारिखनिसे चान्ह्य कर्फ्यु लागु याउगु खः। हल आः सुथय् ८ निसे चान्ह्यः १० बजे तक खोले यायेगु निर्देशन बिउगु खः। आः मुम्बईलय् कर्फ्यु हटे याउगु दु।
ब्रिह्न्मुम्बई म्युनिसिपल कर्पोरेसन (बीएमसी) न बुधबाः फेब्रुअरी २ निसे मुम्बईलय् चान्ह्य याउगु घोषणा याउगु खः। हलय् आः सामान्य अवस्थाय् थे चान्ह्यया शो सञ्चालन याये फइगु जुगु दु।
अय्न, ५० प्रतिशत अकुपेन्सीया नियम धासा कायम हे दु। स्वगुगु लहर डिसेम्बर २४ लिपा रिलिज यायेत राजकुमार राव व भूमि पेडनेकरया संकिपा ‘बधाई दो’। थुगु संकिपा आः फेब्रअुरी ११ य् रिलिज हलय् जुइत्यंगु खः।
अमेरिकां रुसयात जबर्जस्ती ल्वापुइ घ्वान्छ्वयेत स्वगु राष्ट्रपति पुटिनया द्वपं
सिल्लाथ्व पारु ११४२, माघ १९ बुधवाः
![](https://www.lahananews.com/sites/default/files/putin_2.jpg)
रुसी राष्ट्रपति भ्लादिमिर पुटिनं अमेरिकायात रुसयात जबर्जस्ती ल्वापुइ घ्वान्छ्वयेत स्वगु द्वपं बियादीगु दु ।
रुस व अमेरिका दथुइ युक्रेनया खँय् जुयाच्वंगु तनावया दथुइ न्ववासें राष्ट्रपति पुटिनं छुं नं त्वःहलय् रुसयात ल्वापुइ घ्वान्छ्वयेगु अमेरिकाया आज्जु जूगु धका युक्रेन कचवंनय् नं अथे हे यायेत स्वगु जिकिर यानादील ।
राजधानी मस्कोय् हङ्गेरीया प्रधानमन्त्री भिक्टर ओर्बानलिसेया वार्तालिपा संचारकर्मीतयेलिसे खँ ल्हासें पुटिनं युरोपय् अप्वःगु नेटो ज्यापहः सम्बन्धी रुसया सरोकारया नं अमेरिकां वास्ता मयाःगु धयादील ।
अमेरिकाया चिउता युक्रेनया सुरक्षा सिवे्ं नं रुसयात तक्यंकाच्वनिगु खः धका वयेकलं युक्रेन नं अमेरिकी मोहोरा जूगु द्वपं बियादील । यदि युक्रेनयात नेटोय् दुथ्याकेगु खःसा नेटोया मेगु दुजःत नं रुसलिसेया ल्वापुइ सालिगु पुटिनया स्पष्ट धापू दु । “नालादीसं यदि युक्रेन नेटोय् दुथ्यात व क्राइमियायात हाकनं चूलाकेत सैन्य अपरेसन न्ह्यात धाःसा छु जुइ ? थ्वपाखे सुनानं विचाः याःगु द्ुला ?” रुसी नेतां ख्याच्वःलं जाःगु न्वचूइ धयादील ।
थ्वहे दथुइ , बेलायती प्रधानमन्त्री बोरिस जोन्सनं रुसं हताः याःसा युक्रेनं नं प्रतिवाद याइगु धयादीगु दु । युक्रेनी राष्ट्रपति भोलोदिमिर जेलेन्स्कीलिसे युक्रेनी राजधानी कीभय् जूगु वार्तालिपा जोन्सनं ल्वापुया नितिं युक्रेनी जनतां नं कठोर तयारी यानाच्वंगु धयादील ।
अथेहे युक्रेनी राष्ट्रपति जेलेन्स्कीं नं युक्रेन व रुस दथुइ मजूसें रुस व मुक्कं युरोप दथुइ ल्वापु जुइफइगु धयादील ।
कोरोना खोपयात कया क्यानडाय् ट्रक चालकपिनिगु विरोध ब्वज्या
पोहेलागा पञ्चमी ११४२, माघ १८ मंगलबाः
![](https://www.lahananews.com/sites/default/files/canada_1.jpg)
क्यानडाया राजधानी ओटावाय् ट्रक चालकतय्सं विरोध ब्वज्या न्ह्याकातःगु दु ।
ट्रक चालकया लागिं लागु याःगु नियमतप्रति असन्तुष्टि क्यनावःपिं उमिसं उगु नियमत खारेज यायेत माग यासें ब्वज्या न्ह्याकातःगु खः ।
राजधानी ओटावाय् स्वतन्त्रताया लागिं धासें याःगु ब्वज्याय् द्वलंद्वः प्रदर्शनकारीतय् ब्वति दु । अमेरिका व क्यानडाया सीमा पार याइगु ट्रकया चालकतय् लागिं कोरोनाविरुद्धया खोप अनिवार्य याःगुप्रति ट्रक चालकया दकले अप्वः असन्तुष्टि खनेदत ।
क्यानाडाय् ट्रक चालकया ल्याः १ लख २०द्वःम्ह दु । उपिंमध्ये करिब ९० प्रतिशतं खोप कायेधुंकूगु तथ्यांक दु । ट्रक चालकतय्सं क्यानडाया संसद् भवन जःखःया सडकय् ट्रक तयाः यातायात सेवा अवरुद्ध याःगु दु ।
गुकिया हुनिं अनया यातायात सेवा प्रभावित जूगु दु । प्रहरीं धाःसा प्रदर्शनकारीं राजधानी सहरय् गलत ज्या याःगु धासें अथे मयायेत इनाप याःगु दु ।
सीमा पुलेत खोप अनिवार्य याःगु विरोधय् न्ह्याःगु आन्दोलनय् आः मेगु मागत नं अप्वयावःगु धाःगु दु ।
इजिप्टया ब्रदरहुड पुचःया १०म्हेसित मृत्युदण्डया सजाय
पोहेलागा चतुर्दशी ११४२, माघ १७ सोमवाः
![](https://www.lahananews.com/sites/default/files/egypt%20jail.jpg)
इजिप्टया छगू अदालतं प्रतिबन्धित मुस्लिम ब्रदरहुड पुचःया १०म्हेसित मृत्युदण्डया सजाय न्यंकूगु दु ।
इमिसं प्रहरीयात हताः यायेगु योजना दयेकूगु द्वपनय् मृत्युदण्डया सजाय न्यंकूगु खः । उगु द्वपनय् वंगु दँ ज्वंपिं ९म्ह आः न हिरासतय् हे दु । छम्हेसित धाःसा आः तिनि ज्वंगु खः ।
इमिसं हेल्वान ब्रिग्रेड्स नांया पुचः दयेकाः प्रहरीयात हताः यायेगु कथं सरकारयात असफल याकेगु योजना दयेकूगु द्वपं बियाः सजाय न्यंकूगु खः । इजिप्ट हलिंया दकले उप्वः मृत्युदण्डया सजाय बीगु देय् मध्ये स्वंगूगु थासय् लाः ।
थ्वस्वयां उप्वः चीन व इरानय् मृत्युदण्डया सजाय बिइगु यानाच्वंगु दु । एम्नेस्टी इन्टरनेशनलया कथं इजिप्टय् वंगु दँ जक सछिम्ह मल्याक मनूतय्त मृत्युदण्ड ब्यूगु खः ।