इन्डोनेसियाय् थौं शुक्रबाः ६.२ म्याग्निच्युडया भुखाय् ब्बःगु दु।

भूकम्पया कारण अन निम्हेसिगु ज्यान वंगु दु धका अनयाउगु सरकारी अधिकारीपिन्स जानकारी बिउगु दु।

अनया सरकारी अधिकारी कथं २० म्ह घाइते जुगु दु सा क्षतिया विवरण वये ल्यदनी।

इन्डोनेसियाया सुमात्रा केन्द्रविन्दु जुया भुखाय् ब्बःगु खः।

रुसी सेनां युक्रेनया राजधानी किभय् शुक्रबाः सुथनिसे बमबारी व क्षेप्यास्त्र प्रहार याउगु दु।

रुसी बमबारी लिपा किभया आकाशय् मिँ च्याना कुँ खनेदुगु दु। युक्रेनया रक्षा मन्त्रालयं क्षेप्यास्त्र प्रतिरक्षा प्रणालीया ग्वाहालिं रुस प्रहार याउगु छगु क्षेप्यास्त्र आकाशय् ध्वस्त याउगु दु।

तर छगु क्षेप्यास्त्र धासा आवासीय भवनय् कतु वंगु दु धका अनया सरकारं धाउगु दु। अथेहे, एसयू–१७ नांया थःगु लडाकु विमान कुकाउगु दु धका युक्रेनं दाबी याउगु दु।

अथेके, रुसी सेनाया लडाकु ट्याङ्क किभपाखे न्ह्यने यकाच्वंगु धका बेलायती समाचार माध्यमं धाउगु दु।

बेलायत लानि एलिजाबेथ द्वितीय न कोभिड–१९ या सङ्क्रमण जुगु दु।

कोभिडया सामान्य लक्षण खनेदेयवं स्वास्थ्य परीक्षण याउलि वयकःयात सङ्क्रमण पुष्टि जुगु दु धका बीबीसी धाउगु दु।

९५ दँ दुम्ह लानि वंगु वाःनिसे थगु निवासय् हे जनस्वास्थ्यया मापदण्ड पालना यासे व वयकःया निरन्तर स्वास्थ्य उपचार जुयाच्वंगु खबरय् उल्लेख दु।

वयकलं वंगु वाः दुने दरबारय् थीथी मनूपिन्त नापनालादीगु खः। उपिमध्ये छम्हेसित कोभिड सङ्क्रमणया स्पष्ट लक्षण खनेदुगु धका धाउगु दु।

बेलायतया प्रधानमन्त्री बोरिस जोनसनं वयकः याउगु भिंउसाँय् या कामना यानादीगु दु।

भारतया चलचित्र ख्यलय् लोकह्वाम्ह गायक नाप संगीतकार बप्पी लहरी थौं सुथय् ७० दँय् मन्त।

लच्छि न्ह्यः उपचार याना सोमबाः जक लहरी अस्पतालं डिस्चार्ज जुगु खः। हाकन स्वास्थ्यय् समस्या वयेवं म्हिगः चान्ह्यः अस्पताल यकूगु खः।

बप्पी लहरी भारतय् डिस्को किंग कथं कायेगु याः।

बलिउड ख्यलय् सक्रिय लहरीया ’आइ एम अ डिस्को डान्सर’,’यार बिना चेन कहाँ रे’, ’रात बाँकी’, ’बम्बइ से आया मेरा दोस्त’ लगायत म्ये तसकं लोकह्वाःगु खः।

युक्रेनं थःगु सीमाय् तनाव अप्वयेधुंका रुसलिसे वार्ताया प्रस्ताव याःगु दु ।

युक्रेनया बिदेशमन्त्री दिमिट्रो कुलेबां रुसी अधिकारीत व युरोपेली सुरक्षा पुचःया दुजःतयेत ४८ घौया ई सीमा दुने वार्ताया नितिं ब्वनादीगु खः । बिदेशमन्त्री कुलेबां युक्रेनप्रतिया रुसी योजना पारदर्शी जुइमाःगु धका वार्ताया कुतनः जूगु धयादीगु दु ।

युक्रेनया सीमाय् छगू लख अप्वः रुसी सेनाया तैनाथी लिपा युक्रेन व रुस दथुइ ल्वापु जुइफइगु ग्याचिकु दथुइ युक्रेनं वार्ताया प्रस्ताव तःगु खः । अयेसां रुसं युक्रेनयात वार्ताया प्रस्तावया खँय् छुं नं लिसः बिउगु मदुनि ।

थ्वयान्ह्यः युक्रेनं भियना सम्झौताया भ्वँया खँय् अध्ययन यायेत रुसयात इनाप याःगु खः । युक्रेनयात पश्चिमा देय्तयेसं रुसं याये फइगु हताःया नितिं सचेत जुइत तक्वःमछि अपिल यायेधुंका युक्रेन सशंकित जूगु दु ।

थ्वयान्ह्यः हलिंया छगू दर्जन सिवें अप्वः देय्तयेसं युक्रेनय् दूगु थःपिनि नागरिकयात लितयेंकेधुंकुगु दु । नेटोय् युक्रेनयात आवद्ध याःगु विषयलय् रुष्ट जूगु रुसं युक्रेनयात हःताः यायेगु योजना दयेकाच्वंगु आशंका याःसा नं रुसं धाःसा खण्डन यानावःगु दु ।