Display Style:
Column Style
व्रिटेनी संसदपिने आतंककारी हमला
लहनान्यूज | चिल्लागा नवमी ११३७ (मार्च २२ २०१७)
लन्डनया व्रिटेनी संसदया पिने जूगु ‘आतंककारी’ घटनाय् प्यम्ह सीगु दु ।
घटनाय् छम्ह आक्रमणकारीलिसें छम्ह प्रहरी नं सीगु स्थानीय प्रहरीं धाःगु दु । घटनाय् २०म्ह घाःपाः जूगु दु ।
व्रिदिश प्रहरीया कथं सेन्ट्रल लंदनय् छगः कारं वेस्ट मिन्स्टर ब्रिजय् न्यासिवनाच्वंपिं मनूतयत ठक्कर नकाब्युगुलिइ छम्ह मिसा सीगु खः । उगु ठक्करं घाःपाः जूपिं १२म्हेसित वासः यायेत अस्पताल यंकूगु दु ।
अथे हे संसदय् छम्ह प्रहरी अधिकारीयात चक्कुं सुयाब्यूगु दु । उम्ह आक्रमणकारीयात पुलिसं गोलिं कयेकाब्यूगु खः ।
ट्रान्सपोर्ट फर लंदनया कथं प्रहरीया उजं धुंकाः वेस्टमिन्स्टर अंडरग्राउंड स्टेशन बन्द यानाः उगु लँ जुयाः न्ह्याइगु सवारी ज्वलंया लँ हिलाब्यूगु दु ।
फिल्मी शैलीं एअरपोर्टय् लुटे यात
लहनान्यूज | चिल्लाथ्व द्वादशी ११३७ (मार्च ९ २०१७)
दक्षिण अफ्रिकाया जोहानेसबर्गया एअरपोर्टय् फिल्मय् क्यनीथें लुटेरातयसं धेबा लुटे यानायंकूगु दु ।
पुलिसया वसः पुनावःपिं लुटेरातयसं छगू कम्पनीया लखौं डलर याउँक हे लूटे यानायंकल । लुटेरातयसं छुं नं कथंया ल्वाभः क्यने हे म्वायक अःपुक हे धेबा लुटे यानायंकूगु खः ।
अंतरराष्ट्रीय एअरपोर्टया सुं नं पिनेयापिं मनूत वये हे मदइगु थासय् लुटेरात याउँक हे दुहांवःगु खः । पुलिस च्वयातःगु गाडिइ च्वनावःपिं लुटेरातयसं थीथी देयया धेबा तयातःगु कन्टेनर ल्ह्वनाः याउँक हे पिहांवनाछ्वःगु खः ।
इमिसं एअरपोर्टय् मूवंगु कन्टेनरया सुरक्षा याइगु छगू सेक्युरिटि एजेन्सीया गार्डतयत नं पंगु खः ।
एअरपोर्टय् सुयातं लुटया आभाष तक नं मजूगु व अनया ज्या याउँक हे जुयाच्वंगु बिबिसिं न्ह्यथंगु दु ।
सिआइएं ह्याक याःगु विकिलिक्सया दाबी
लहनान्यूज | चिल्लाथ्व एकादशि ११३७ (मार्च ८ २०१७)
विकीलीक्सं अमेरिकाया केन्द्रीय जाँच ब्यूरो सीआईएं साइबर हतियार छ्यलाः ह्याकिङ यानाच्वंगु खुलासा याःगु दु ।
साइबर हतियारया हुनिं विन्डोज, एन्ड्रोयड, आइओएस, ओएसएक्स व लिनक्स कम्प्यूटर अले इन्टरनेट राउटर तकंयात आज्जु दयेका वयाच्वंगु दावी विकीलीक्सया दु । लिसें बेलायतया एमआई फाइभं सामसुङ टीभीइ आक्रमण यायेत साइबर हतियार तयार यायेत ग्वाहालि याःगु दावी नं याःगु दु ।
सीआईएया प्रवक्तां धाःसा थुगु दस्तावेजप्रति छुं हे प्रतिक्रिया बी जरुरी मदुगु टिप्पणी याःगु दु । ब्रिटेनया गृह प्रवत्तां नं थुकियाबारे छुं हे प्रतिक्रिया बी मन मक्यं ।
उखे अमेरिकी साइबर क्षमताबारे खुलासा याःम्ह एडवर्ड स्नोडेनं धाःसा विकीलीक्सं तःधंगु ज्या याःगु व दस्तावेज पायछि खःगु धाःगु दु । जून २०१४ तिथि न्ह्यथनातःगु दस्तावेजया कथं सामसुङया एफ ८०० सीरीजया स्मार्ट टीभीइ घूसपैठ यायेगु अभियानयात वीपिंग एन्जल नां बियातःगु नं धाःगु द ।
अष्ट्रेलियाय् वर्किङ भिसा खारेज जुइगु
लहनान्यूज | चिल्लाथ्व चतुर्थी ११३७ (मार्च २ २०१७)
अष्ट्रेलियां बिदेशी नागरीकया नितिं बिया वयाच्वंगु वर्किङ भिसा खारेज याइगु जूगु दु ।
अष्ट्रेलियाया अध्यागमनमन्त्री पिटर डटनं अष्ट्रेलियाली युवाशक्तिया लजगाःया व्हःताः बीमाःगु धासें फास्टफुड उद्योगय् विदेशी कामदारयात वर्किङ भिसाय् रोक तयेगु क्वःज्यूगु धाःगु खः ।
अष्ट्रेलियाया फास्टफुड रेस्टुरेन्टय् सन् २०१२या अध्ययनय् ९५ लख स्वयां आपाः विदेशी कामदार वर्किङ भिसाय् दुगु खनेदुगु खः । आः उगु ल्याः १ करोड पुलेधुंकूगु सीदुगु खः ।
व मध्ये दक्कले आपाः भारतीय कामदार दु । वयां लिपा बेलायती व चिनियाँत दुगु तथ्यांकय् खनेदुगु दु । अष्ट्रेलियायाया थुगु उहलं अन दुपिं नेपाःमितयत नं लिच्वः लायेफुगु अनुमान याःगु दु ।
सन् २०१२ निसें अष्ट्रेलियाया विपक्षी दल लेबर पार्टीं विदेशी नागरिकयात वर्किङ भिसा बीगु प्रावधान न्ह्याकूगु खः ।
नांजाःम्ह च्वमि तारक मेहता मन्त
लहनान्यूज | चिल्लाथ्व तृतीया ११३७ (मार्च १ २०७३)
ताः इलंनिसें म्हं मफयाच्वंम्ह नांजाःम्ह गुजराती नाटककार तारक मेहता थौं सुथय् मन्त ।
८८दँयाम्ह मेहता मदुगु पुष्टि यासें वयकःया परीवारं वयकःया अंगदान याइगु नं धाःगु दु ।
मदुम्ह मेहतां च्वयातःगु सिरीयल तारेक मेहताका उल्टा चश्मा अतिकं लोकं व्हाः । गुजराती म्यागेजिनय् पिदनीगु अतिकं लोकंव्हाःगु स्तम्भ ‘दुनिया ने औंधों चश्मा’पाखें हे टीभि सीरियल ‘तारक मेहता का उल्टा चश्मा’ दयेकूगु खः ।
वयकलं खुगू लोकंव्हाःगु जराती नाटक नं च्वयादीगु दु । मेहताया ८० सफूत बजारय् पिदंगु दु ।
२६ दिसेम्बर, १९२९ कुन्हु बूम्ह तारक मेहतायात २०१५य् पद्मश्री सिरपाः ब्यूगु खः ।
मेहता मदुगुलिइ दुःख प्वंकुसें भारतीय प्रधानमंत्री नरेन्द्र मोदी लिसें आपाःसिनं श्रद्धान्जलि प्वंकूगु दु ।
