Display Style:
Column Style
हिटलरया फोन २,५०,००० डलरं लिलाम
लहनान्यूज | सिल्लागा नवमि ११३७ (फेब्रुअरी २० २०१७)
जर्मन नेता एडोल्फÞ हिटलरया टेलीफोन सेट मुक्कं २,५०,०० डलरं लीलाम जूगु दु ।
अमरीकाय् जूगु लिलामिइ छम्ह अज्ञात मनुखं हिटलरया फोन करीब २त्या लख डलरं न्यानाकाःगु खः । फोन न्यानाकाःम्हेसिया म्हसिका धाःसा सार्वजनिक याःगु मदुनि ।
ह्याउँगु रंगया थुगु फोनय् हिटलरया नां, स्वस्तिक चिं व चीलया चित्र कियातःगु दु । सन् १९४५स निगूगु विश्वयुद्ध क्वचायेधुंकाः बर्लिनया छगू बन्दरगाहलय् थुगु फोन लूगु खः ।
फोन लिलाम याःगु मेरीलायन्ड राज्यं थुकियात ‘आः तक्कया दक्कले विध्वंसक ल्वाभः’या नां ब्यूगु दु । जर्मनीं सरेन्डर यायेधुंकाः सोभियत सैनिकतयसं थुगु फोन ब्रितेनी ब्रिगेडियर राल्फ रेनरया चिं कथं ब्यूगु खः ।
अक्सन हाउसया अधिकारी बिल पैनागोपुलसं हिटलरं युद्धया झ्वलय् थुगु हे फोनपाखें ब्यूगु आदेशं यक्व हे मनूत सीगु जूगुलिं थुकियात जनसंहारया ल्वाभः धाःगु बिबिसिं न्ह्यथंगु दु ।
लाहौरय् विष्फोट, १० सित
लहनान्यूज | सिल्लागा तृतीया ११३७ (फेब्रुअरी १३ २०१७)
पाकिस्तानया लाहौरया पूर्वी लागाय् जूगु विष्फोटय् १० सीगु दुसा ४० स्वयां आपाः घाःपाः जूगु दु ।
घटनाय् सीपिंलय् लाहौरया ट्राफिक पुलिसया डीआईजी अहमद मुबीन व एसएसपी अपरेशन जाहिद महमूद गोंदल नं लाःगु दु । घाःपाः जूपिंलय् ७म्हेसिया अवस्था तच्वः दुगु धाःगु दु ।
घटनाप्रति समवेदना प्वंकुसें पाकिस्तानया प्रधानमन्त्री नवाज शरीफं लाहौरयात आज्जु दयेकेगु कुतः जुयाच्वंगु धाःगु दु । प्रधानमन्त्री शरिफं सरकारया सिक्रेट एजेन्सीयात सतर्क च्वनाच्वनेत नं उजं बीधुंकूगु दु ।
लाहौरय् स्थानीय फर्मासिस्टतयगु विरोध प्रदर्शनया झ्वलय् थुगु घटना जूगु खः । विरोध ब्वज्या जुयाच्वंथाय् मोटरसाइकलं वःपिन्सं विष्फोट याकूगु धाःगु दु ।
थुगु विरोध प्रदर्शन वासःया विक्रि सम्बन्धि न्हूगु कानूनया विरोधय् जूगु खः ।
श्रोत : बिबिसि
पाकिस्तान एअरलाइन्सया विमान दुर्घटना
लहनान्यूज सम्वाददाता | थिंलाथ्व अष्टमि ११३७ (डिसेम्बर ७ २०१६)
पाकिस्तान इंटरनेशनल एयरलाइन्सया विमान पीके–६६१ पाकिस्तानया उत्तरपाखे हवेलियां लिक्क दुर्घटनाग्रस्त जूगु दु ।
एयरलाइंसया प्रवक्ता दानियाल गिलानीयात उद्धृत यासें विमानय् ४० यात्री लिसें न्याम्ह चालक दलया दुजः गयावंगु दुगु बिबिसिं न्ह्यथंगु दु ।
गिलानीया कथं विमान ३ः४०ताः इलय् चितरालं इस्लामाबादया नितिं ब्वःगु खः । ४ः१६ताः इलंनिसें विमान स्वापुतिं पिहांवंगु खः ।
थुगु विमानयात न्हापा नं ‘सेफ्टी फेलियर’या द्वपं लायेधुंकूगु दु । सन् २००६स नं पीआईएया हे छगू विमान दुर्घटनाय् ४४म्ह मनूत सीगु खः ।
यूरोपीय संघं सन् २००७य् पीआईए विमानयात यूरोपय् उडानया नितिं रोक तयाब्यूगु खः ।
इन्डोनेसियाय् भुखाय् ब्वल
लहनान्यूज सम्वाददाता | थिंलाथ्व अष्टमि ११३७ (डिसेम्बर ७ २०१६)
इन्डोनेसियायय् थौं सुथय् भुखाय् ब्वयाः म्ह्वतिं १८ सुीगु दु ।
भुखाचय् लानाः तःम्ह हे मनू घाःपाः जुइगुया लिसें तःखा हे भवन दुंगु अन्तर्राष्ट्रिय संचार माध्यमतय्सं न्ह्यथंगु दु । भग्नावशेष दुने मनूत ल्हानाच्वंगु दयेफुगुलिं सीपिनिगु ल्याः थहांवने फुगु नं न्ह्यथंगु दु ।
स्थानीय ई कथं सुथसिया ८ः१३ताः इलय् इन्डोनेसियाया उत्तरी लागा आचे प्रान्तयत केन्द्रविन्दु दयेकाः ६.५ म्याग्निच्यूडया भुखाय् ब्वःगु न्ह्यथंगु दु ।
भुखाय् ब्वयेधुंकाः मनूत छेँय् नं पिने चकंगु थासय् पिहांवःगु खः । आःतक्क सुनामिया चेतावनी धाःसा जारी याःगु मदुनि ।
आचे प्रान्तय् हे सन् २००४य् ब्वःगु भुखाचं यानाः सुनामि तकं वःगु खःसा जनधनया तःधंगु क्षति नं जूगु ख ।
तमिलनाडुया मुख्यमन्त्री जयललिता मन्त
लहनान्यूज सम्वाददाता | थिंलाथ्व सप्तमी ११३७ (डिसेम्बर ६ २०१६)
भारत तमिलनाडुया मुख्यमंत्री जे जयललिता वंगु चान्हय् मन्त ।
चेन्नईया अपोलो अस्पतालं पिथंगु प्रेस नोटया कथं जयललिता वंगु चान्हय् ११ः३०ताः इलय् मदुगु खः । ६८दँयाम्ह जयललितायात वंगु आइतबाः (डिसेम्बर ४ कुन्हु) हृदयाभात जुइधुंकाः अपोलो अस्पतालया आइसीयूलय् तयाः वासः यानाच्वंगु खः ।
जनताया दथुइ तसकं लोकंव्हाःम्ह जयललितां दक्षिण भारतीय संकिपाय् अभिनय नं यानादीगु दु । १४० संकिपा म्हितादीगु दु ।
वयकलं ८क्वः विधानसभाया चुनाव ल्वायेगुया लिसें छक्वः राज्यसभाया नितिं मनोनीत जुयादीगु दुसा ४क्वः तमिलनाडुया मुख्यमंत्री जुयादीगु दु ।
