Display Style:
Column Style
सुषमा स्वराजया जँलास्येँ स्यन
लहनान्यूज सम्वाददाता | कछलागा द्वितीया ११३७ (नोभम्बर १६ २०१६)
![](https://www.lahananews.com/sites/default/files/swaraj-2.jpg)
भारतीय विदेशमंत्री सुषमा स्वराजया जँलास्येँ स्यंगु दु ।
मन्त्री स्वराजं बुधवाः सुथय् ट्वीट यासें थःगु जँलास्येँ स्यंगु जानकारी बियादीगु खः । लिसें वयकलं थःगु हे देशय् एम्स (अखिल भारतीय आयुर्विज्ञान संस्थान) य् वासः याकाच्वनागु नं धयादीगु दु ।
![](http://www.lahananews.com/sites/default/files/pictures/swaraj.jpg)
वयकःया जँलास्येँ प्रत्यारोपण यायेमाःगु धाःगु दु ।
छुं दिं न्ह्यः जक वयकःयात एम्सय् भर्ना याःगु खः । प्रोफेसर बलराम एरनं वयकःया वासः यानाच्वंगु दु ।
मन्त्री स्वराजयात एम्सय् भर्ना यायेधुंकाः वयकःयात कॉर्डियोथोरेसिक विभाग अर्थात नुगः ल्वयलिसे सम्बन्धित विभागपाखें वासः यायेगु ज्या न्ह्याकूगु खः । सुषमा स्वराजयात छुं दिं न्ह्यःनिसें उसाँय् सम्बन्धि समस्या जुयाच्वंगु खः ।
न्यूजिलायन्डय् भुखाय् ब्वल
लहनान्यूज सम्वाददाता | कछलाथ्व चतुर्दशि ११३७ (नोभम्बर १३ २०१६)
![](https://www.lahananews.com/sites/default/files/newz.jpg)
न्यूजिलायन्डया क्राइस्टचर्चय् ७.४ म्याग्निच्यूडया भुखाय् ब्वःगु दु ।
अमरीकी जियोलोजिकल सर्वेया कथं स्थानीय ईकथं क्राइस्टचर्च स्वयां ९५ किलोमिटर तापाक्क केन्द्रविन्दु दयेकाः ७.४ म्याग्निच्यूडया भुखाय् ब्वःगु खः ।
भुखाचं आःतक्क छुं नं कथंया धनजनया क्षतिया बुखँ मवःनि । भुखायया धक्का वेलिंगटनय् तकं महसूस जूगु धाःगु दु ।
अमरीकाया प्यासिफिक सुनामी चेतावनी केन्द्रं आःतक्क सुनामीया चेतावनी नं ब्यूगु मदुनि ।
२०११य् क्राइस्टचर्चय् ब्वःगु शक्तिशाली भुखाचय् लानाः १८५म्ह सीगु खः । उगु भुखाचय् शहरया सिटी सेन्टरय् तःधंगु हे क्षति जूगु खः ।
ट्रम्प अमेरीकाया न्हूम्ह राष्ट्रपति
लहनान्यूज सम्वाददाता | कछलाथ्व नवमि ११३७ (नोभम्बर ९ २०१६)
![](https://www.lahananews.com/sites/default/files/trump_1.jpg)
डोनाल्ड ट्रंप चुनावी धेंधें बल्लाखय् थः प्रतिद्वन्दि डेमोक्रेट उम्मेदवार हिलारी क्लिन्टनया ल्यूने लाकाः अमेरीकाया ४५म्हम्ह राष्ट्रपति जुइत ताःलाःगु दु ।
त्यायेधुंकाः थःगु सम्बोधनय् अमेरीकाया न्हूम्ह राष्ट्रपति ट्रम्पं थः सकसिगु राष्ट्रपति जुइगु धासें थःके तसकं बांलाःगु आर्थिक योजना दुगु धाल । अर्थव्यवस्थाया आकार निदुगं दयेकाः हलिंया दक्कले बल्लाःगु इकोनोमि जुइगु ट्रम्पया धापू खः ।
अमेरीकाया पासा जुइ न्ह्याःगु दक्वं देयतलिसे क्वात्तूगु स्वापू दयेकेगु नं ट्रम्पं धाल । लिसें ट्रम्पं हरेक अमेरीकिं थःगु प्रतिभायात पूवंक छ्यलेगु व्हःताः बीगु नं धाःगु खः ।
थः त्याःगुलिइ प्रतिद्वन्दि क्लिन्टनं नं थःत फोन यानाः भिंतुना ब्यूगु जानकारी ट्रम्पं बिल । थम्हं नं क्लिन्टनयात न्ह्यइपूगु व क्वात्तूगु धेंधें बल्लाःया नितिं भिंतुना देछासें सकसितं नापं ब्वनाः न्ह्याःवनेगु धयागु ट्रम्पं कंगु खः ।
इराकय् आत्मघाती हमला
लहनान्यूज सम्वाददाता | कछलाथ्व षष्ठी ११३७ (नोभम्बर ६ २०१६)
![](https://www.lahananews.com/sites/default/files/iraq.jpg)
इराकया तिकरीत व समारा शहरय् जूगु अलग अलग निगू आत्मघाती हमलाय् २१म्ह सीगु दु ।
न्हापांगु हमला तिकरित शहरय् एम्बुलेन्सय् छगलय् विस्फोटक जायेकाः विष्फोट याकूगु धाःगु दु । स्थानीय पुलिसया कथं तिकरीतय् तःग्वः हे कार छगू सुरक्षा नाकाय् मु्नाच्वंबलय् विष्फोट जूगु खः ।
समारा शहरय् शिया तीर्थयात्रितयत आज्जु दयेकाः आत्मघाती हमला जूगु खः । थत मस्जिदलिक्क दिकातःगु छगः कारय् याकूगु विष्फोय् १० ईरानी सीगु दु ।
इराकी सेनाया काउन्टर टेरोरिज्म टीमया मूसल शहरय् न्ह्याकाच्वंगु अभियानं ध्यान छखे लाकेत इस्लामिक स्टेटया चरमपंथितयसं थुगु आत्मघाती हमला याकूगु अनुमान याःगु दु ।
थौं हे तिनि इराकी सेनाया विशेष दलं इस्लामिक स्टेटया चरमपंथितयत मूसल शहरं लिनाछ्वःगु बुखँ वःगु खः ।
अमेरिकी सैनिक प्रशिक्षकयात स्यानाबिल
लहनान्यूज सम्वाददाता | कछलाथ्व पञ्चमि ११३७ (५ नोभेम्बर २०१६)
![](https://www.lahananews.com/sites/default/files/kipa-madu_12.jpg)
जोर्डनय् स्वम्ह अमेरिकी सैनिक प्रशिक्षकतयत स्यानाब्यूगु दु ।
जोर्डनय् च्वंगु हवाई सुरक्षा अड्डाय् गोलिं कयेकाः स्वम्ह सैनिक प्रशिक्षकत स्यानाब्यूगु अमेरिकी अधिकारीं न्ह्यथंगु दु । छम्ह घटना जूगु थासय् सीगु खःसा मेपिं निम्ह वासः यायेगु झ्वलय् अस्पतालय् सीगु खः ।
जोर्डनया दक्षिणी लागाय् च्वंगु अल जाफ्र हवाइ अड्डाया आर्मी प्रशिक्षण केन्द्रया मू लुखाय् थ्यनेत्यंगु इलय् अमेरिकी सैन्य प्रशिक्षक गयावंगु गाडीइ गोली कयेकूगु सिएनएनं न्ह्यथंगु दु । घटनाया कारण छु खः धकाः सीमदुनिगु व जोर्डनलिसे जानाः अनुसन्धान जुयाच्वंगु अमेरिकी रक्षा मन्त्रालय पेन्टागन व राष्ट्रपति ज्याकू ह्वाइट हाउसं न्ह्यथंगु दु ।