इजरायलया प्रधानमन्त्री बेन्जामिन नेतन्याहू न इजरायली सुरक्षा बलनाप माफी फ्वंगु दु। अक्टोबर ७ य् हमासं याःगु आक्रमणबारे पूर्वजानकारी कायेत असफल जूगु धका धासे वयकलं उगु इलय् सुरक्षा बलयात द्धपं बिगु खः।

तर, आः थज्यागु परिस्थितिइ छवाः जुइमाःगु व उगु टिप्पणी यानागु गलत जुगु धका धासे माफी फ्वंगु खः। शनिवाः सामाजिक सञ्जाल एक्सय् नेतन्याहू न हमासया आक्रमणबारे खुफिया सेवा व सुरक्षा एजेन्सी सिन बेटं छु न चेतावनी बिइमफुगु धका च्वंगु खः ।

आः हुया छ्वये धुकुगु उगु पोस्टय् वयकलं अःखतं उगु समूहयात निरुत्साहित यायेगु आश्वासन बिःगु उल्लेख याना तःगु दु। हमासया आक्रमणबारे छु न पूर्वजानकारी काये मफुगु कारणं इजरायलया सेना व खुफिया एजेन्सी आलोचित जूगु खः।

थुकिइ सरकार व सुरक्षा निकाय दथुइ खः ल्वागु खः । थुकिया दथुइ नेतन्याहू न आः छवाः जुइमाःगु दु धका धासे माफी फ्वंगु खः।

भारतया आन्ध्र प्रदेश विजयनगरय् निगः रेल ल्वाय्वं झीस्वम्ह सीउगु दु। अथेहे उगु दुर्घटनाय् ५० म्ह मल्याकं घाःपाः जूगु दु ।

आइतवाः चान्ह्यः विशाखापट्टनम–पलासा व विशाखापट्टनम–रायगढा यात्राय् वनाच्वंगु निगः रेल ल्वागू व १३ म्ह सीउगु धका समाचार एजेन्सी पीटीआई न धाःगु दु ।

वंगु जुन महिनाय् ओडिसा जुगु रेल दुर्घटनाय् झण्डै ३०० म्ह सीउगु खः।

चीनया पूर्वप्रधानमन्त्री ली खछ्याङ मन्त। चिनियाँ मिडिया धाःगु कथं ली खछ्याङ हृदयाघातया कारण मदुगु धका धाःगु दु।

चिनियाँ सरकारी टेलिभिजन सीसीटीभीं हृदयघात जूगु धका धाःगु खः। चिनियाँ समाचार एजेन्सी सिन्ह्वां लीयात अक्टुबर २६ या दिं अचानकं हृदयाघात जूगु व अक्टुबर २७ या दिं स्थानीय ई कथं चान्ह्यः १२ बजे जूया १० मिनेटय् मदुगु धका धाःगु दु। ६८ दँ नेता ली वंगु मार्च महिनाय् जक प्रधानमन्त्रीया निगुगु कार्यकाल पूरा याना बिदा जूगु दु ।

राष्ट्रपति सी जिनफिङ लिपा सत्तारूढ कम्युनिस्ट पार्टी अफ चाइनाया निगुगु वरियताय् दुम्ह ली लिपागु इलय्  सांघाइलय् च्वना वयाच्वंगु खः । ली खछ्याङ सन् २०१३ य् चीनया प्रधानमन्त्री जूगु खः ।

वयकः चिनियाँ क्याबिनेटया स्टेट काउन्सिल प्रमुख तक जुयादीम्ह खः।

कतारया छगु अदालतं इजरायलया लागि जासुसी याःगु द्धपनय् च्याम्ह भारतीय तय्त मृत्युदण्डया सजाय न्यंकूगु दु । उपि दक्को भारतीय नौसनिकया पूर्वअधिकारीपि खः।

कतारया स्थानीय सञ्चारमाध्यमया कथं उपि वंगु दँया अगष्टय् ज्वना हिरासतय् तयातःगु खः। नकतिनि जक अदालतं उमित मुद्दाय् लिपागु फैसला न्यकूसे मृत्युदण्ड बिइगु न्यकूगु खः। उपि च्याम्ह हे भारतीय कतारया कन्सल्ट्रि कम्पनी अल दहराय् ज्या याना च्वपि खः, कतारी सरकारयात पनडुब्बी जहाज याःगु अधिग्रहण सम्वन्धय् परामर्श बिइगु ज्या याना च्वपि खः। उपि भारतीय नौसेनाय् दुगु इलय् यक्को हे युद्धया कमाण्ड याना च्वपि खः धका भारतीय सञ्चारमाध्यमं धाःगु दु ।

वंगु अक्टोबर १ य् कतारस्थित भारतीय राजदूतं हिरासतय् तयातःगुलि उपि भारतीय तय्थ नापलाःगु खः। कतार सरकारं थुगु मुद्दाबारे सार्वजनिक जानकारी बिःगु धासा मदुुनि । इजरायल प्यालेस्टिाइन युद्ध जुयाच्वंगुलि थुगु फैसलायात तसकं महत्व बिया स्वया च्वंगु दु । कतार प्यालेस्टाइनया विद्रोही समूह हमासनाप दुगु धका मानेयाना च्वंगु दु ।

सरकारं हमासं बन्धक दयकातःपि इजरायली नागरिक तय्त त्वःत्येगु लागि मध्यस्थता याना वयाच्वंगु खः । अथेहे गाजा क्षेत्रय् आत्यावश्यक वस्तु आपूर्ति सुचारु यायेत न कतारं कुतः याना च्वंगु दु ।

अथेहे, भारत सरकारं भारतीय तय्त मृत्युदण्ड बिइगु फैसलां थःपि तसकं स्तब्ध जूगु दु धका धाःगु दु । थुगु मुद्दाया पूर्णपाठ वयेवं सरकारं माःगु पलां छिलेगु जुइ धका विदेश मन्त्रालयं जारी याःगु विज्ञप्तिइ उल्लेख यानातःगु दु ।

विज्ञप्तिइ धयातःगु दु, ‘जिमिसं उमिगु  परिवारया सदस्य तय्त व कानूनी टिमयात स्वापू तयाच्वंनागु दु व दक्को कानूनी विकल्प मालेगु ज्या जुयाच्वंगु दु । जिमिसं थुगु मुद्दायात महत्व बिया न्ह्यने स्वया च्वनागु दु । जिमिसं दक्को कानूनी ग्वाहालिइ निरन्तर याना च्वनागु दु । थुगु विषययात कया कतारी अधिकारीपि नापं सहलह याना च्वंनागु दु ।’

अमेरिकाया ल्युइस्टन सहरय् गोलाबारी जुगुलि १६ म्हेसिगु ज्यान वंगु दु। अथेहे उगु घटनाय् ५० म्ह स्वया अप्पो घाःपाः जुगु अनुमान याःगु दु ।

स्थानीय प्रहरीं बन्दुकधारीत आः न चाःहिला च्वंगु दु धका चेतावनी बिःगु दु। प्रहरीं थः च्वंगु थासं मेथाय् मवसे अन हे सुरक्षित जुयाच्वने इनाप याःगु दु।

थाय् थासय् जुयाच्व.गु गोलाबारीया अनुसन्धान जुयाच्वंगु दु धका धासे प्रहरीं सावधान याकाच्वंगु धका बीबीसीं धाःगु दु।