हलियंक “विश्व नेवाः दिवस” झः झः धायेक हन
राम डंगोल | चिल्लाथ्व पुन्ही ११३१, चैत्र १५ आइतबाः
मार्च महिनाया लिपांगु शनिबाः हलिंयंक थीथी थासय् च्वनाच्वंपिं नेवाः नेवाः समुदायपिन्सं थीथी ज्याझ्वः याना प्यक्वःगु विश्व नेवाः दिवस झःझः धायेक हन ।
थ्वहेझ्वलय् विश्व नेवाः संगठन, नेपाल च्याप्टरं येँया वसन्तपुरय् छगू ज्याझ्वः यात । ज्याझ्वलय् नेवाः समुदायया उत्थानया नितिं थीथी क्षेत्रपाखें योगदान बिउपिं व्यक्तित्व व संस्थायात हनादिगु खः ।
भाषा व सामाजिक क्षेत्रय् निरन्तर योगदान बिया वयाच्वनादिपिं लक्ष्मीदास मानन्धर व मोतिलाल शिल्पकारयात हनादिल धाःसा संगीत क्षेत्रपाखें जनगायक भृगुराम श्रेष्ठ, संस्कृति क्षेत्रपाखें प्राध्यापक प्रेमशान्ति तुलाधर, साहित्यमा कवि भूषणप्रसाद श्रेष्ठ, अथेहे कला क्षेत्रय् राजकुमार शाक्य व कासापाखें सब्बारानी महर्जनयात हनादिगु खः ।
नेवाः पत्रकार राष्ट्रिय दबूयात त संस्थागत कथं हनादिगु खः । अथेहे स्वर्गीय गायक रमेश ताम्राकारया लुमन्तिइ निस्वनातःगु सिरफा गायक जुजुकाजी रंजितयात बियादिल । अथेहे सगरमाथाया उत्तरी व दक्षिणी निगुलीं मोहडां सगरमाथा च्वापूगुँ गया वल्र्ड बुक अफ रेकर्डय् नां तयेत ताःलाम्ह मिसा पत्रकार कल्पना महर्जनयात नं हनादिगु खः ।
वय्कपिन्त येँ महानगरपालिकाया मेयर विद्यासुन्दर शाक्यं दोसल्ला न्येका हनापौ लिसें अभिनन्दन यानादिल ।
ज्याझ्वलय् नेवाः समुदायपिन्त ग्वःहालि यानावयाच्वनादिपिं थीथी व्यक्तित्वपिन्त नं हनादिगु खः । ज्याझ्वलय् मेयर शाक्यं झिपिं दक्व जाना देय्यात थपू यायेमाःगुलिइ बः बियादिल ।
पलेस्वाँपुखुलिइ कंक्रीटया पुखु देयेकूगु भ्रामक प्रचार यागु वय्कलं द्वपं बियादिल । विश्व नेवाः संगठनं प्यदँ न्ह्यःनिसें मार्चया लिपांगु शनिबाः विश्व नेवाः दिवस हनावयाच्वंगु दु । अमेरिकाया बाल्टिमोरय् संगठन निस्वंगु दिंया लुमन्तिइ दिवस हनावयाच्वंगु दु । 
