विश्वकप फुटबल छनोटया कासाय् नेदरल्याण्ड्स व क्रोएसिया त्यात, सर्बियां पोर्चुगलनाप ज्वलिंज्वः कासा म्हितल
चिल्लाथ्व पुन्ही ११३१, चैत्र १५ आइतबाः
![](https://www.lahananews.com/sites/default/files/1_68.jpg)
विश्वकप फुटबल छनोट अन्तर्गत युरोपेली पुचःया कासाय् नेदरल्याण्ड्स, क्रोएसिया, टर्की, रुस व बेलारुस त्याःगु दु । पुचः ‘जी’ अन्तर्गत नेदरल्याण्ड्सय् जूगु कासाय् घरेलु पुचलं लात्भियायात २–० गोल अन्तरं बुकूगु दु ।
थ्व पुचःया मेगु कासाय् टर्कीं नर्वेयात ३–० गोलं बुकूबलय् मोन्टेनेग्रों जिब्रल्टारयात ४–१ गोलं बुकूगु दु । पुचः ‘ए’ या कासाय् सर्बियां पोर्चुगलयात २–२गु गोलया ज्वलिंज्वः याःबलय् लक्जेम्बर्गं रिपब्लीक अफ आयरल्याण्डयात १–० गोलं बुकूगु दु ।
थ्वहेदथुइ पुचः ‘इ’ या कासाय् बेलारुसं इस्टोनियायात ४–२ गोलं बुकाः चेक गणतन्त्रं बेल्जीयमयात १–१गु गोलया ज्वलिंज्वः यानाः पन ।
अथेहे पुचः ‘एच’ या कासाय् रुसं स्लोभेनियायात २–१ गोल अन्तर अले क्रोएसियां साईप्रसयात १–० गोल अन्तरं बुकूगु दु । स्लोभाकिया व माल्टादथुइया कासा २–२गु गोलया ज्वलिंज्वःनाप क्वचाःगु दु ।