खोप काइपिनिगु भिड अप्वःल
लहानान्युज | चौलाथ्व पुन्हि ११४१,बैसाख १४ मंगलवाः
![](https://www.lahananews.com/sites/default/files/khop_1.jpg)
कोरोना संक्रमण तीव्र गतिइ न्यनावसेंली येँया अस्पतालय् खोप काइपिं म्वःम्वः जूगु दु । म्हिगः बैशाख १३ गतेनिसें खोप बिइगु ज्या न्ह्याकूगु चिनियाँ खोप भेरोसेल काइपिंनिगु ल्या म्वःम्वः जूगु खः ।
बीर अस्पताल, काठमाडौं मेडिकल कलेज, प्रसुती गृह, नेपाल मेडिकल कलेज, हिमाल अस्पताल, नेपाल प्रहरी अस्पताल, आयुर्वेद अनुसन्धान केन्द्र किपूलिसेंया अस्पतालय् कजय् हे कायेमफइकथं भीड जूगु खः ।
न्हि द्वछिं निसें १२सः पिन्त खोप बिइगु याःसां मनुत चान्ह्य २ ताःईलंनिसें हे लाइनय् च्वनाच्वनिगु धाःगु दु । चीनपाखें अनुदानय् प्राप्त जूगु खोपया न्हापांगु झ्वलय् चीनय् ब्वंवनिपिं ब्वंमि व चीनलिसें व्यापार व्यवसाय याइपिन्त बिउगु खः । निगूगु झ्वलय् सर्वसाधारणपिन्त बिउगु खः ।
थ्वयांन्ह्यः भारतया कोभिसिल्ड खोप स्वास्थ्यकर्मी, फ्रन्टलाईनय् ज्याः याइपिं सुरक्षाकर्मी, सञ्चारकर्मी, सफाइकर्मी, स्वास्थ्य स्वयंसेविकापिन्त बिउगु खःअथेहे ६५दँ च्वयेयापिन्त नं उगु खोप बिउगु खः ।