नेपाः, नेदरल्यान्ड्स व मलेसिया दुथ्याःगु त्रिकोणात्मक ट्वेन्टी ट्वेन्टी क्रिकेट जुइगु
लहनान्यूज | चौलाथ्व पञ्चमी ११४१, वैशाख ४ शनिबाः
![](https://www.lahananews.com/sites/default/files/tri-nation-t20-international-cricket-series-nepal-trophy-with-all-three-captain.jpg)
नेपाः, नेदरल्यान्ड्स व मलेसिया दुथ्याःगु त्रिकोणात्मक ट्वेन्टी ट्वेन्टी क्रिकेट च्याम्पियनसीप थौंनिसें येँय् न्ह्यायेत्यंगु दु ।
न्हिनय् जःछि पुलाः छताः ईलय् किपूया मैदानय् कासा जुइत्यंगु दु । नेपालं नेदरल्यान्ड्सनाप दोहोरो लिग प्रणालीइ धेंधेंबल्ला याकीगु धागु दु ।
नेपालं निगूगु कासा मलेसियानाप वैशाख ६ गते, स्वंगूगु कासा नेदरल्यान्ड्सनाप वैशाख ७ गते अले लिपांगु लिग वैशाख ९ गते मलेसियानाप जुइ ।
लिगया दकले न्ह्यःनय्या निगू पुचलं उपाधिया नितिं वैशाख ११ गते फाइनल कासा म्हिती । कासा न्ह्याये न्ह्यः म्हिगः स्वंगुलिं देय्या कप्तानपिन्सं मंका कथं च्याम्पियनसीपया ट्रफी सार्वजनिक याःगु खः ।
थ्वहेदथुइ, नेपाल क्रिकेट संघ, क्यानं म्ह्वोंया ल्याखय् स्वकुमिपिन्त जक टियु क्रिकेट मैदानय् दुकाइगु धागु दु । कोरोना महामारीयात ध्यानय् तयाः म्ह्वों ल्याखय् स्वकुमिपिन्त कासा स्वकेत अनुमति बिइगु धागु दु ।
क्यानं कासा स्वयेगु नितिं टिकटया व्यवस्था न याःगु दु । नेपाली पुचःया कप्तान ज्ञानेन्द्र मल्लं आःया तयारी ट्वेन्टी ट्वेन्टी विश्वकपया जूगु धासें थ्व च्याम्पियनसीपं थःपिन्त अभ्यासया नितिं ग्वहालि याइगु धयादीगु दु ।
नेपालं १४लालिपा अन्तर्राष्ट्रिय च्याम्पियनसीपय् ब्वति काइ ।