प्रिमियर लिग फुटबलय् म्यान्चेस्टर सिटी व टोटनह्याम हट्सपर विजयी
चौलाथ्व दशमी ११४१,बैसाख ९ बिहीवाः
![](https://www.lahananews.com/sites/default/files/tottham.jpg)
इंग्लीश प्रिमियर लिग फुटबलय् वंगु चान्हय् म्यान्चेस्टर सिटी व टोटनह्याम हट्सपर त्यागु दु । धलःया शीर्ष थासय् दूगु म्यान सिटीं एस्टन भिल्लायात उमिगु हे मैदानय् २–१ गूया गोल अन्तरं बुकुगु दु ।
सिटी त्यागुलिइ फिल फोडेन व रोड्रिं छगू छगू गोल याःगु खः । भिल्लाया जोन क्याक्गीनं न्हापांगु गोल याःगु खः । कासाया ४१गूगु मिनेटय् सिटीया जोन स्टोन्स व ५७गूगु मिनेटय् भिल्लाया म्याटी क्यासं ह्याउँगु कार्ड नयेधुंका निगुलिं टोली १०म्ह कासामिइ लिकुंगु खः ।
प्रिमियर लिगया हे मेगु कासाय् टोटनह्याम हट्सपरं साउथह्याम्टनयात २–१गूया गोल अन्तरं बुकुगु दु । टोटनह्याम त्यागुलिइ ग्यारेथ बेल व हिउङ मिन सनं छगू छगू गोल याःगु दु । साउथह्याम्पटनया ड्यानी इंग्सं न्हापांगु गोल याःगु खः ।
वंगु चान्हय्सिया कासा लिपा प्रिमियर लिगया धलःखय् ३३गू कासापाखें ७७ गू ल्याः लिसें म्यान्चेस्टर सिटी शिर्ष थासय् दु । छगू कासा म्हो म्हितुगु म्यान्चेस्टर युनाईटेड ६६ गू ल्याः लिसें निगूगु थासय् दु ।
Categorized in कासा