नेपाल सुपर लिग फुटबल थौंनिसें दशरथ रङ्गशालाय् न्ह्याइगु
चौलाथ्व द्धादशी ११४१,बैसाख ११ सनिवाः
![](https://www.lahananews.com/sites/default/files/Nepal%20super%20league_0.jpg)
नेपालय् न्हापांगु खुसी ग्वसाः ग्वयेत्यंगु फ्रेन्चाइज फुटबल धेंधें बल्लाः नेपाल सुपर लिग एनएसएल थौंनिसें दशरथ रङ्गशालाय् न्ह्यायेत्यंगु दु ।
न्हय्गू फ्रेन्चाइज टिमया ब्वति दइगु धेंधें बल्लाःया उलेज्या कासाय् सनिलया ५ताःत्या इलय् काठमाडौं रेजर्स फुटबल क्लब व ललितपुर सिटी फुटबल क्लब म्हिती । कन्हय्निसें धाःसा हरेक दिनय् निगू कासा जुइ । कोरोना भाइरसया महामारीया हुनिं कासात स्वकुमि मतःसे म्हितकेत्यंगु दु ।
थ्व हे दथुइ, ग्वसाः खलः नेपाल स्पोर्ट्स म्यानेजमेन्टं सिरपाः राशी सार्वजनिक याःगु दु । व कथं त्याकामिं ३५ लख तका ल्हातय् लाकी । ल्यू त्याकामिं १५ लख तका त्याकीबलय् व्यक्तिगत विधापाखे उत्कृष्ट जुइम्हेसिनं म्हतिं १ लख तका अले उत्कृष्ट ल्याय्म्ह कासामिं १ लख तका चूलाकी ।
अथे हे, हरेक कासाया उत्कृष्ट ल्याय्म्ह कासामिं १० द्वः तका अले म्यान अफ द म्याचं २५ द्वः तका ल्हातय् लाकी । राउन्ड रोबिनया लिधंसाय् जेठ १ गतेतक्क जुइगु लिगय् येँ व यललिसें विराटनगर सिटी फुटबल क्लब, एफसी चितवन, पोखरा थन्डर्स, बुटवल लुम्बिनी एफसी व धनगढी एफसीया ब्वति दु ।