नगेन्द्रप्रसाद–आशालता रिजाल सिरपा शताब्दी पुरुष जोशीयात
लहनान्यूज | चिल्लाथ्व नवमी, ११४१, चैत्र ८ आइतबाः
नगेन्द्रप्रसाद–आशालता रिजाल प्रतिष्ठानं थुगुसीया नगेन्द्रप्रसाद–आशालता भाषा, साहित्य संस्कृति सिरपा वरिष्ठ संस्कृतिकर्मी एवं साहित्यकार शताब्दी पुरुष सत्यमोहन जोशीयात लःल्हाना दिगु दु ।
म्हिगः प्रज्ञा प्रतिष्ठानय् ग्वसाग्वःगु ज्याझ्वलय् १गू लखः ११द्वः व ११ तकाः राशीया पुरस्कार जोशीयात लःल्हानादिगु खः । पुलाँम्ह प्रधानमन्त्री नगेन्द्र प्रसाद रिजाल व वय्कया तिरिमय्जु आशालता रिजालया नामय् निस्वनातःगु सिरपा साहित्य कला क्षेत्रय् योगदान बिउपिं स्रष्टापिन्त लःल्हाना वयाच्वंगुदु ।
ज्याझ्वलय् नेपाल प्रज्ञा प्रतिष्ठानया कुलपति गंगा प्रसाद उप्रेतीं रिजाल निर्विवाद व देशभक्त प्रधानमन्त्री जूगु लुमंकादिल । प्रष्ठिानया छ्याञ्जे लिसें साहित्यकार दधिराज सुवेदीं प्रतिष्ठानं वंगु दिंलय् स्रष्टा सम्मान ज्याझ्वःयात निरन्तरता बिइगु धयादिल ।
हनाज्या लिपा शताब्दी पुरुष सत्यमोहन जोशीं प्रज्ञा प्रतिष्ठानया पदाधिकारी जुया ज्याः यानां रिजालयात बाँलाक्क म्हसिकेगु ह्वःता चुलागु स्मरण यानादिल ।
निष्पक्ष मनुया नामं निस्वनातःगु सिरपालं थम्हेसित पुरस्कृत यागुलि सकसित सुभाय् देछानादिल ।
