महासंघ अन्तर्गत १३गू पत्रकार पुचलं समावेशिताया ग्यारेन्टीया नितिं दबाब बिइत न्यागू बुँदे प्रतिबद्धता लिसें ंसंयुक्त विज्ञप्ति जारी
लहनान्यूज | सिल्लागा तृतीया ११४१, फागुन १७ मंगलबाः
नेपाल पत्रकार महासंया निर्वाचनयात ध्यानतया १३गू पत्रकार पुचलं संयुक्त विज्ञप्ति जारी याःगु दु ।
थी थी राजनीतिक पार्टी व स्वतन्त्रत कथं न्ह्यानाच्वंगु पुचःपिन्स न्यागू बुँदे प्रतिबद्धता लिसें सोमबाः संयुक्त विज्ञप्ति जारी याःगु खः ।
नेपाल पत्रकार महासंघया आसन्न प्रत्यक्ष निर्वाचनपाखें महासंघया स्वंगुगू तहस बिचाः, आस्थालिसें उत्पीडित लागा, लैंगिक जाति व भाषागतकथं पूवंक समावेशिताया ग्यारेन्टीया नितिं दबाबया बिइत राष्ट्रिय अभियान न्ह्याकेगु विज्ञप्ति न्ह्यथनातःगु दु ।
अथेहे महासंघयात साझा दयेकत दक्व संघसंगठनया अनिवार्य प्रतिनिधित्व जुइकथं भलसाःया नितिं आह्वान यायेगु व थःनिगु नेतृत्वदायी भूमिका सुनिश्चितता यायेत दक्व संगठनलिस सहलह यायेगु खँ तकं क्वःज्यूगु विज्ञप्ति न्ह्यथनातःगु दु ।
संयुक्त विज्ञप्तिइ राष्ट्रिय दलित पत्रकार मञ्चया नायः विनोद पहाडी, क्रान्तिकारी पत्रकार संगठनया न्वकू बाबुराम भुसाल, प्रेस सेन्टर नेपालया छ्याञ्जे भीमबहादुर विक, जागरण मिडिया सेन्टरया नायः रेशबहादुर बि, लोकतान्त्रिक छापामाध्यम राष्ट्रिय समाजया नायः दामोदरप्रसाद दवाडी, मिडिया नेपालया नायः गोपाल पौडेल, संचार गृहया पीडित पत्रकार÷कर्मचारी संयुक्त संघर्ष समितिया नायः धमेन्द्र कर्ण, स्थानीय पत्रकार नेपालया नायः शंकरप्रसाद ज्ञवालीपिन्सं संयुक्त विज्ञप्तिइ ल्हाःचिं तःगु खः ।
अथेहे नेवाः पत्रकार रायिष्ट्रय दबूया वरिष्ठ न्वकू नृपेन्द्रलाल श्रेष्ठ, स्वतन्त्र पत्रकार संगठन नेपालया संयोजक एलएस लामा, देशभक्त पत्रकार संघया संयोजक तेजेन्द्र प्रसाई, अनलाइन टिभी पत्रकार संघया नायः जीवन भण्डारी व अनलाइन मिडिया नेटवर्कया छ्याञ्जे लोकश लिवाङ लिम्बुपिन्सं न्यागू बुँदे प्रतिबद्धता विज्ञप्तिइ संयुक्त ल्हाःचिं तयादीगु खः ।
