रियाल मड्रिड व एथ्लेटिको मड्रिड दथुया कासा ज्वलिन्ज्वः
सिल्लागा दशमी ११४१, फागुन २४ सोमबाः
![](https://www.lahananews.com/sites/default/files/5d18e-16150080412349-800.jpg)
स्पेनिस लिग फुटबलय् शिर्ष क्लबत रियाल मड्रिड व एथ्लेटिको मड्रिड दथुया कासा ज्वलिन्ज्वःलय् क्वचागु दु ।
ल्याः धलःया शीर्ष थासय् दूगु एथ्लेटिको व ३गूगु थासय् दूगु रियाल दथुइ वंगु चान्हय् जूगु मड्रिड डर्बी १गू–१गू गोलया ज्वलिन्ज्वःलय् क्वचागु खः ।
एथ्लेटिको मड्रिडया मैदानय् जूगु कासाय् घरेलु टोलीया लुइस सुवारेजं न्हापांगु गोल याना टोलीयात अग्रता बिउगु खः ।
तर कासा क्वचायेत निगू मिनेट ल्यंदनिबलय् रियाल मड्रिडया करिम बेन्जिमां छगू गोल यायेधुंका कासा ज्वलिन्ज्वःलय् थ्यंगु खः ।
ज्वलिन्ज्वःलिपा शीर्ष थाय्या एथ्लेटिको मड्रिडया २५गू कासां ५९गू ल्याः जूगु दु । छगू कासा अप्वः म्हितुगु बार्सिलोना ५६गू ल्याः नापं निगूगु थासय् दुसा ३गूगु थाय्या रियाल मड्रिडया ५४गू ल्याः दु ।