आहा रारा गोल्डकप २१ गतेनिसें न्ह्याइगु, उद्घाटन कासाय् सहारा क्लब व एपीएफ म्हितिइगु
चिल्लागा पञ्चमी ११४१, चैत्र २० गते शुक्रबाः
![](https://www.lahananews.com/sites/default/files/aha.jpg)
मोफसलया चर्चित राष्ट्रिय फुटबल धेँधेँबल्ला आहा रारा गोल्डकपया उद्घाटन कासाय् ग्वसाःखलः सहारा क्लब पोखरा व एपीएफ क्लव दथुई धेँधेँबल्ला जुइगु जूगु दु ।
ग्वसाःखलः सहारा क्लब पोखरां छगू पत्रकार सम्मेलन याना १९क्वःगु संस्करणया गोल्डकपया उद्घाटन कासाय् सहारा क्लब व एपीएफ दथुई जुइगु धाःगु खः । पोखराया रंगशाला जुइगु कासा चैत २१ निसें २८ गतेतक्क न्ह्याइ ।
कासाय् त्याइगु टिमं १०गू लखः छद्वः ध्येबाया सिरफा त्याकिइ धाःसा ल्यू त्याकुमिं ५गू लखः व छद्वःया ध्येबा सिरपा त्याकेफइगु ग्वसाःखलकं धयादिल । धेँधेँबल्लाखय् स्वदेशी लिसें विदेशी याना मुक्क च्यागू टिमया ब्वति दई ।
थुगुसीया संस्करणय् नेपाल आयल निगम, मनाङ मस्याङ्ग्दी क्लब, नेपाल पुलिस क्लब, रुस्लान थ्री स्टार क्लब, नेपाल एपिएफ क्लब, संकटा क्लब, मछिन्द्र क्लब, अफ्रिकन रूट एसोसिएसन क्यामरुन व सहारा क्लब पोखराया ब्वति दई ।
वंगु संस्करणय् मनाङ मस्याङ्ग्दीं नेपाल पुलिस क्लवयात बुका उपाधि त्याकूगु खः ।