प्रधानमन्त्री ओली कोरोना कन्ट्याक्ट ट्रेसिङय् लात
लहानान्युज | चौलाथ्व पुन्हि ११४१,बैसाख १४ मंगलवाः
प्रधानमन्त्री केपी शर्मा ओली कोरोना कन्ट्याक्ट ट्रेसिङय् लानादिगु दु ।
मंगलबाः उर्जा मन्त्री टोपबहादुर रायमाझी व एमाले नेता विष्णु रिजालयात कोरोना संक्रमण जुसेंलि प्रधानमन्त्री कन्ट्याक्ट ट्रेसिङय् लानादिगु खः ।
मंगलबाः सुथय् उर्जा मन्त्री रायमाझीयात कोरोना संक्रमण जूगु बुखँ सार्वजनिक जूगु खः धाःसा नेता रिजालयात सनिलय् संक्रमण जूगु जानकारी बिउगु खः । रायमाझी व रिजाल आइतबाः बालुवाटारय् नेकपा एमालेया १४क्वःगु महाधिवेशन कमिटिया मुँज्याय् ब्वति काःगु खः । मुँज्याय् प्रधानमन्त्री सम्बोधन यानादीगु खः ।
मुँज्याया झ्वलय् रिजालं प्रधानमन्त्रीया प्रेस सल्लाहकार सूर्य थापालिसें न्याम्ह नेतापिं विना मास्क किपाः कयादिगु खः । प्रेस सल्लाहकार थापा प्रत्यक्ष स्वापुतिइ लाइम्ह जूगु हुनिं प्रधानमन्त्री कन्ट्याक्ट ट्रेसिङय् लानादिगु खः ।
बालुवाटारया मुँज्याय् ब्वति दुपिं ५०म्ह मल्याक एमाले नेतापिं नं कन्ट्याक्ट ट्रेसिङय् लानादिगु दु ।
