छक्वलं छगू हे ज्याझ्वलय् झिंनिम्ह मिसा साहित्यकारपिनिगु उपन्यासया पितब्वज्या जुल । नांजाःम्ह आख्यानकार मथुरा साय्मिं नेपालभाषा साहित्य ख्यलय् मिसा उपन्यासकारपिनिगु उपस्थिति तसकं म्हो जुयाच्वंगु व नेपालभाषा साहित्य ख्यःयात तब्या यायेगु ताःतुनाः नेवाः मिसा साहित्यकारपिंत उपन्यास च्वयेगु ज्याय् हःपाः बीकथं सार्वजनिक रुपं हे उपन्यास च्वयेत आह्वान यानादीगु खः ।

आख्यानकार साय्मिया आह्वानकथं उपन्यास च्वयादीपिं स्थापित व न्हूपिं यानाः झिंनिम्ह मिसापिंसं च्वयादीगु उपन्यास ज्याझ्वलय् पितब्वज्या याःगु खः । कुतः पिकाकःया विमल ताम्राकारया सभापतित्वय् जनकवि दुर्गालाल श्रेष्ठ मूपाहांकथं झायादीगु ज्याझ्वलय् पुलांपिं निम्ह व न्हूपिं झिम्ह मिसापिनिगु उपन्यास पितब्वज्या याःगु खः ।

उगु ज्याझ्वलय् नेदरल्याण्डय् च्वनादीम्ह श्रीलक्ष्मी श्रेष्ठं च्वयादीगु ‘कोरोनाया किचलय्’ नांया उपन्यास उत्कृष्ट जूगु घोषणा यासें नीन्याद्वः तका सिरपाः, अञ्जना ताम्राकारया ‘हिउपाः’यात लिउ सिरपाःकथं झिद्वःतका व पाल्पा तानसेनया अर्चना शाक्यया ‘ख्वबि व लाय्लामा’, नःलि वज्राचार्यया ‘कथहं’, वरिष्ठ साहित्यकार अपर्णा प्रधानया ‘समर्पण’यात हःपाःकथं म्हतिं न्याद्वः, न्याद्वः तका दां सिरपाः लःल्हाःगु खः ।

मिसा उपन्यासकारपिंसं च्वयादीगु उपन्यासया दथुइ धेंधेंबल्लाः हे जूगु कासाय् रीना तुलाधरया उपन्यास अप्रतियोगीकथं दुथ्याःगु खःसा मेपिं मिसा साहित्यकारपिं उर्मिला डंगोल, दिव्या वज्राचार्य, निजिरोस श्रेष्ठ, भवानी तुलाधर, रिता महर्जन, रेणु श्रेष्ठ नं उपन्यास च्वयादीगु खः । उत्कृष्ट उपन्यासयात सिरपाः बीगु नापं न्हूपिं मिसा उपन्यासकारपिंत म्हसीकेकथं जूगु ज्याझ्वलय् उपन्यास च्वयादीपिंत हनेज्या नं याःगु खः ।

नेवाः न्ह्यलुवालिसें उपन्यासकार मल्ल के. सुन्दर, समालोचकलिसें साहित्यकार डा. पुष्पराज राजकर्णिकार व समालोचक प्रा. पे्रमशान्ति तुलाधर निर्णायकमण्डलय् च्वनादीगु खः मिसा उपन्यासकारपिंत सक्वया भाषासेवीनापं साहित्यह्यमि ई. राजदास श्रेष्ठं थीथी उपहार लःल्हानादीगु खःसा अमेरिकाय् च्वँच्वनादीम्ह साहित्यकार रितादेवी प्रधानं म्हति न्याद्वः, न्याद्वः तका दां लःल्हायेगु घोषणा यानादीगु खः । 

Categorized in राष्ट्रिय