श्रीलंका आईसीसी टी–ट्वान्टी विश्वकपया पुचः त्याकामि जुयाः सुपर १२य्
कौलागा तृतीया ११४१, कात्तिक ६ शनिबाः
![](https://www.lahananews.com/sites/default/files/srilan.jpg)
श्रीलंका आईसीसी टी–ट्वान्टी विश्वकप क्रिकेटया न्हापांगु चरणया पुचः त्याकामि जुयाः सुपर १२य् दुहांवंगु दु । वंगु बहनी सारजाहलय् जूगु कासाय् नेदरल्यान्ड्सयात ८ विकेटं बुकाः श्रीलंका पुचः त्याकामि जूगु खः ।
श्रीलंकां पुचःया स्वंगुलिं कासा त्याकूगु खः । नेदरल्यान्ड्सं ब्यूगु ४५ रनया आज्जु श्रीलंकां ७ ओभर १ बलय् २ विकेट तंकाः पूवंकूगु खः । श्रीलंकायात त्याकेत कुशल परेरां अविजित ३३ रन दयेकल ।
चारिथ आसलन्का ६ रनय् आउट जूबलय् अभिस्का फर्नान्डो २ रनय् अविजित जुल । ओपनर पाथुम निसान्का शून्य रनय् आउट जूगु खः । नेदरल्यान्ड्सया ब्राण्डन ग्लोभर व पाउल भानं १÷१ विकेट काल ।
थ्वयां न्ह्यः टस बुनाः न्हापां ब्याटिङ याःगु नेदरल्यान्ड्सं १० ओभरय् अलआउट जुयाः ४४ रन दयेकूगु खः । नेदरल्यान्ड्सया कोलिन एकार्मानं ११ रन दयेकूबलय् मेपिं कासामिं निगः ल्याःया रन दयेकेमफुत ।
नेदरल्यान्ड्सयात म्ह्वः रनय् हे पनेत लाहिरु कुमारा व वानिन्दु हसरंगा डी सिल्भां ३÷३ विकेट काल । महेश थिकसानां २ अले दुश्मन्था चामिरां १ विकेट काल । कासा त्याःगुलिसें न्हापांगु चरणया पुचः ‘ए’ लय् दुगु श्रीलंकां ३ कासाय् ६ ल्याः मुंकूगु दु ।
थुगु पुचलं नामिबिया ४ ल्याःलिसें ल्यू त्याकामि जुयाः सुपर १२य् थ्यंगु दु । नेदरल्यान्ड्स व आयरल्याण्ड धाःसा पिहांवंगु दु । थौंनिसें सुपर टुवेल्भ अर्थात् मू धेंधें बल्लाःया कासात न्ह्याइ ।
गुकिया अन्तर्गत थौं निगू कासा जुइ । न्हिनय् जःछि पाः ४ताः इलय् अष्ट्रेलिया व दक्षिण अफ्रिका म्हितीबलय् बहनी जःछि पाः ८ताः इलय् इङ्गल्याण्ड व वेष्ट इन्डिज चुलिंचू लाइ ।
Categorized in कासा