एएफसी अन्डर २३ एसियन कप नेपाली फुटबल टोली थौं ताजकिस्तान वन
कौलाथ्व चर्तुथी ११४१, कात्तिक २ मंगलबाः
![](https://www.lahananews.com/sites/default/files/taj%20nepal.jpg)
एएफसी अन्डर ट्वान्टी थ्री एसियन कप ल्यज्या म्हितीगु नेपाली राष्ट्रिय फुटबल टोली थौं ताजाकिस्तान प्रस्थान याःगु दु ।
उज्वेकिस्तानय् सन २०२२य् जुइगु ल्यज्या कासाया लागिं राष्ट्रिय टोलीइ लाःपिं मनिष डाँगी, सुमन अर्याल, आयुष घलानयात दुथ्याकाः मुख्य प्रशिक्षक बाल गोपाल महर्जनं २३ दुजःया नेपाली टिमया घोषणा यानादीगु दु ।
फिफा वरियताय् नेपाल स्वयां च्वय् दुगु टोलीलिसे नेपालं ल्यज्या कासा म्हिती । टोलीइ आः ल्याय्म्ह कासामिया बाहुल्य दुसा छुं राष्ट्रिय टोलीं अनुभव काःपिं कासामि नं दुथ्याःगु दु ।
ल्यज्या कासा अन्तर्गत नेपाल पुचः ‘बी’ दुने लाःगु दु । नेपालया पुचलय् ताजिकिस्तान, लेबनान व इरान दुथ्याः । ताजिकिस्तानय् जुइगु ल्यज्या कासा वइगु अक्टोबर २३ निसें ३१ तक्क जुइ ।
नेपालं पुचः झ्वःया न्हापांगु कासाय् इरानलिसे अक्टोबर २५य् म्हिती । अथे हे, निगूगु कासाय् ग्वसाः खलः देय् ताजिकिस्तानलिसे अक्टोबर २८य् धेंधें बल्लाः याइबलय् लिपांगु कासा लेबनानलिसे अक्टोबर ३१य् जुइ ।
ल्यज्याया ११ पुचःया शीर्ष टोलीं एएफसी यू–२३ एसियन कप म्हितेगु ह्वःताः चूलाकी । अथे हे, निगूगु टोलीमध्ये उत्कृष्ट प्यंगू टोली नं यू–२३ एसियन कपया ल्यज्याय् लाइ ।
उज्वेकिस्तानय् हे जुइगु धेंधें बल्लाः २०२२ या जुन १ निसें १९ तकं याइगु धलः दु ।
Categorized in कासा