जामनः गुभाजुया ट्रेलर व म्येचाया पितब्वज्या
लहनान्युज | कौलाथ्व षष्ठी ११३७ (सेप्तेम्बर २६ २०१७)
![](https://www.lahananews.com/sites/default/files/jaamana%20gubhaju6_0.jpg)
नेपालभाषाया संकिपा “जामनः गुभाजु”या ट्रेलर छगु ज्याझ्वःया दथुइ पितब्वज्या जूगु दु ।
नांजाम्ह संगीतकःमि गोल्डेन भ्वाइस अफ नेपाल प्रेमध्वज प्रधान व नांजाम्ह ख्यालःकःमि गणेश साय्मिपिं निम्ह मूपाहाँ कथं झायादीगु उगु ज्याझ्वः येँया आशिर्वाद कलेजया कम्पाउण्डय् जूगुु ज्याझ्वलय् नेपाःदेय्या इतिहासय् मल्लकालिन छम्ह पुलाम्ह तान्त्रिक गुभाजु कथं प्रसिद्धम्ह जामनः गुभाजुया बाखंया लिधंसा कया दय्कूगु “जामनः गुभाजु”या म्येचा व पोस्टरया नं पितब्वज्या जूगु खः ।
![](http://www.lahananews.com/sites/default/files/pictures/a1_1.jpg)
उगु ज्याझ्वलय् थ्व संकिपा दयेकेत ज्वमदुगु योगदान बियादीपिं यज्ञमान पनि बज्राचार्य, डा.नरेशमान बज्राचार्य, शान्तरत्न बज्राचार्य, सरोज बज्राचार्य, सबिन बज्राचार्य, बीरेन्द्र मानन्धर, पूर्णकाजी ज्यापु, आशिर्वाद कलेजया ध्रुबनारायण मानन्धर, संगीतकार बालकुष्ण बंशी, थ्व संकिपाया च्वमि व मूपात्रय् अभिनय यानादीम्ह सुशील राजोपाध्याय, केशरीदेबी श्रेष्ठ या नापनापं थुगु संकिपाया निर्मातापिं राजेन्द्रभक्त श्रेष्ठ व वीरन्द्रभक्त श्रेष्ठ अले थ्व संकिपाया निर्देशक रवि साय्मिया मां व अबु पूर्णकुमारी मानन्धर व धर्मनारायण मानन्धरपिं विशिष्ट पाहाँ कथं झायादीगु खः ।
थुगु संकिपाय् सुशील राजोपाध्यायं जामनः गुभाजु जुया म्हिता च्वंगु दुसाः थुके सञ्चारकःमि व साहित्यकार पुष्कर भक्त माथेमां जुजु प्रताप मल्ल जुया म्हिता दीगु खः । सुरज व्यञ्जनकार, अमिता जोशी,अन्नपुर्णेश्वरी श्रेष्ठ, संघरत्न शाक्यया नापनापं आपालं कलाकारतसें म्हिता तःगु थ्व “जामनः गुभाजु”या सह निर्देशक रवि महर्जन खःसा निर्देशक रवि साय्मि खः ।
![](http://www.lahananews.com/sites/default/files/pictures/a2_2.jpg)
ट्रेलर व म्येचा पितब्वज्या ज्याझ्वःया लसताय् “जामनः गुभाजु”या सकलें कलाकार , प्राविधिक व ग्वाहालिमिपिन्त मूपाहाँपिं प्रधान व साय्मिं सुभाय्पौया लिसें जामन गुभाजुया चिं कथं ट्रफी नं लःल्हागु खः ।
Categorized in मनोरन्जन